昨夜我在母校分享了以下內容給中四學生聽。
《夢想》
唔知你地覺得自己靚唔靚呢？
覺得自己最吸引人嘅地方係咩呢？
「人無夢想同條咸魚有咩分別？」
你甘願只成為一條咸魚嗎？
我而家係一個自由身工作者，無屬於任何公司，工作都以Part time嘅形式進行，我主職係演員，活躍於舞台同廣告界別，副職歌唱指導、歌唱比賽評判、配音員、KOL、歌唱表演者、硬照模特兒等等，所有搵到錢而不傷天害理不傷自己他人嘅工作我都會做，當挑戰下自己都好。
係香港演藝戲劇學院畢左業啱啱三年，呢三年裏面最多人問我嘅就係我鍾意演戲定唱歌多啲，其實我兩樣都咁鍾意，唔想捨棄任何一邊。
2019年係事業發展上一個幾特別嘅年份，我得到香港戲劇協會嘅認同，獲得最佳女配角提名，劇協可以話係劇壇嘅一個認證，即係電影界嘅奧斯卡，所以對我嚟講係一個極大嘅鼓勵。今年亦都係我嘅人生轉捩點，因為我遇到真正嘅伯樂，佢欣賞我，所以介紹左幾位金牌經理人比我認識。環球唱片公司、英皇娛樂公司等最出名嘅經理人都傾過計，從中了解左娛樂公司嘅限制，成為藝人嘅條件。
看似順利嘅前景我會輕易作出選擇嗎？當我想下決定嘅時候，香港病倒了。因為反送中修訂草案令香港進入黑暗時期，現時為止我一共參與左五次公民運動。對於我嚟講係自由同公義嘅問題，所以呢段期間我喺自己嘅Instagram好積極咁post有關嘅資訊，我發現極大部分嘅藝人都避而不談，怕被內地封殺，減低公司收入。
嗰刻我先覺得，原來我係好藝術家性格架，我嘅性格唔適合簽公司做藝人。因為就算搵到幾多錢都好，但無哂自由，無左本應擁有嘅權利同私隱，連表態都唔可以，我再問自己呢種生活我係咪真係咁想要？「唔係。」
原來對於我嚟講可以有自由做最真實嘅自己先係最重要，所以我拒絕左佢地嘅邀請，拒絕左人生其中一個轉捩點，拒絕左被人控制，拒絕左成為歌手嘅機會。但我無後悔，拒絕後我更肯定自己係做老闆嘅性格。
拒絕佢地嗰刻，我覺得自己係女神。2019年7月，我攞左第一張Estill Voice Training 嘅証書，令我更覺得我不甘成為歌手，而係歌唱指導，為其他人搵到屬於佢嘅聲音我會更快樂，話唔定日後我會成為香港歌手嘅老師。
無論做演員好，做歌唱老師都好，最緊要就係當初追夢嘅初心，搵返堅持嘅原因，你會成功得更快。
我嘅夢想就係一世都忠於自己，追隨自由，我想做一隻自由嘅烏龜，喺自由港灣暢泳。唔需要游得好深好遠，只求游得自由，同埋港灣唔好變細。
無人知道聽日會發生咩事，今日追嘅可能係演員夢，聽日可能係歌唱老師夢，後日可能係自由夢。
咁你想做咸魚定係自由龜呢？
整文：程梓浩
