荷蘭生活知多啲
IG: ally_blahblah
讀書篇 （中）
上回講到喺荷蘭讀書要注意嘅地方，包括語言、當地普遍教育程度、學費同埋學校VS學科，今次就講一下呢邊讀書辛辛唔苦、學生生活，仲有交通及住宿。
5. 讀書辛唔辛苦？
荷蘭教育質素高，其中一個重要原因係當地良好嘅學習同閱讀風氣。無知大家有冇留意過，喺香港搭車見到好多低頭族。喺荷蘭一樣會有低頭族，但更多嘅係睇（電子）書嘅乘客。喺荷蘭，好多學生都會好自覺讀書；平日玩還玩，但認真讀書上黎一啲都唔輕鬆。臨近考試季節嘅時候不時會見到自修室外大排長龍。當年讀國際關係嘅時候，每星期有大量嘅readings要慢慢煲，連牛津畢業嘅同學都忍唔住話喺牛津讀書都冇咁辛苦！不過，唔一定個個科目都咁大閱讀量嘅。
另外，荷蘭嘅老師對於學生嘅批判性思考要求好高。喺當地上堂有唔少討論，需要學生積極發言，同一般華人教育有一定嘅分別，需要時間適應。雖然筆者辯論隊出身，但呢邊嘅教授依然會「想你再批判一啲」，不斷從旁加高要求。另外，華人習慣「畫公仔唔使畫出腸」，好多事情會點到即止，喺荷蘭就未必啱用。所以無論係閱讀量，學習模式，思維模式，都同香港唔同。如果從小到大適應左填鴨式教育，咁出到黎呢邊就肯定會比較吃力。
不過，荷蘭人非常樂於助人，互相幫助嘅風氣好強。喺呢邊讀書，身邊嘅學霸好多都好樂意指導。筆者寫論文嘅時候非常狼狽，幸好有幾個超強嘅學霸一次又一次咁幫我review再俾comment，否則篇論文真係凍過水⋯⋯
6. 學生生活
喺荷蘭讀書，同香港最大分別就係學會同社堂文化。荷蘭嘅大學一樣會有學會（societies）同社堂/兄弟會（fraternity），前者以認識志同道合嘅人為目標，不是都會搞活動，但上下莊文化冇香港大專院校咁強；就算有E會（evaluation），都係以改善為目標，冇香港咁chur。不過，呢邊嘅大學學會，每年開學都會以飲啤酒聯誼，一大班唔同學校嘅學生飲到阿媽都唔認得，喺香港實屬少見。至於呢邊嘅社堂/兄弟會，尤其係全男班的話，一定會比香港嘅癲。同香港唔同嘅係，呢邊嘅社堂唔限制一間大學，一般會係一個城市入面有幾個社堂，只要你係嗰個城市讀書就可以加入。不過一般都係當地學生先會加入，甚少國際學生。荷蘭亦有一般嘅宿舍，真係得個住字。咁當然，住宿舍嘅人好多都會自發搞活動，自由度大。
咁一般學生平時除左讀書仲會做咩？荷蘭運動文化比香港強，課餘時間唔少學生都會做gym，踢波，rowing，或者打hockey。亦有學生會返兼職幫補生活費/存錢去旅遊。由於荷蘭通往歐洲其他國家嘅交通非常發達（由阿姆斯特丹到比利時、法國、德國喺兩三個鐘就可以），好多學生平日搵到外快就會搵機會去其他國家/城市，真係非常方便。
娛樂方面，荷蘭嘅生活就冇香港或者其他亞洲城市咁多姿多彩。呢邊好少行街shopping、唱K、食飯放題。由於平均工資高同要收VAT【註二】，一般學生以好難負擔得起經常外出用膳。不過，荷蘭全國有幾百個博物館，其中梵高博物館（Van Gogh Museum）同安妮之家(Anne Frank Huis)比較為人熟悉。唔少學生會買一張 Museum Card 喺週末嘅時候約三五知己一齊去博物館。
7. 交通及住宿
如果係國際學生，學校一般會係第一年幫助搵宿舍。要注意荷蘭嘅宿舍同社堂一樣，並非由個別大學管理。事實上，荷蘭嘅宿舍一般會由幾個大型「宿舍管理公司」主理。所以宿舍唔一定近學校，而且入面嘅學生可以來自唔同學校。過去幾年，尤其係阿姆斯特丹，吸引左大量國際生，但宿舍供不應求，所以唔少人要自己租地方。
另外，荷蘭容許學生「同時間就讀唔通課程」，有人可以幾日嘅學校A上堂，幾日嘅學校B，變相有時候唔一定喺學校一個城市居住。每日穿州過省嘅學生比比皆是。
交通方面，荷蘭當地學生係免費【註一】，而其他國籍學生都有唔同程度嘅優惠。不過呢，呢邊大部分學生都係用單車代步，既健康又平阿嘛（要穿州過省另計）。
下篇再講下呢邊嘅兼職及實習、就業情況同埋簽證。
【註一】所謂免費，其實只可以揀係一至四，或五六日，並唔係一星期七日都免費。
【註二】長居香港嘅朋友可能會對VAT比較陌生。Value-added tax (VAT) 即係增值稅喺歐美國家非常常見。荷蘭VAT （又作BTW）係21%。簡單黎講，如果一件商品原本價值係100元，加上21%VAT，買家就要付款121元。
以上內容只屬個人分享，如有疑問，以官方資料為準。
讀書篇 （上）
https://www.facebook.com/allyblahblah/photos/a.276193166080761/1216324908734244
讀書篇 （下）
https://www.facebook.com/allyblahblah/photos/a.276125036087574/1223448181355250/
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活
