「思晴想後」--- <唔好畀女朋友見到你love第二個女仔嘅post，會死人㗎！>
最近，Facebook 多咗個新功能，就係你除咗可以like人哋嘅貼文之外，仲可以有唔同嘅表情符號。雖然「嬲爆爆」因為柒出國際嘅特首而一夜成名，但仲有一個萬惡嘅表情叫「Love」。
如果一個女仔見到男朋友，或者鍾意嘅人love另一個女仔嘅post，佢肯定會即時爆發了左右腦嘅運行，隨時仲勁過TVB嘅final fantasy劇情。
「佢㩒錯啫…但會唔會呀？而家想點啫？公開討好人呀！唔係嘅，佢點會咁白痴呀？等等！佢有時真係好白痴。仆街！條女咩料呀？…WTF！張合照，幾時㗎？我都無聽過佢約過呢條女！」
之後，男人個電話會響起，就算你九秒九接，都會聽到以下more or less 嘅對話：
「喂！BB，忙緊咩呀？…哦！打機呀？無上Facebook 咩？…無？真係無？…咩話！我審你？！你周圍flirt 女，當我盲㗎！」
點解咁大反應呢？就係因為平時like只係需要一個制，用嘅時間只係0.30-0.45秒。但如果係比love，就要撳實個like一秒，然後將手指移去右邊撳埋個心心，用嘅時間肯肯定多過1秒，呢種叫「付出」。
無錯！係付出！你無興趣嘅野，只會用平常習慣嘅方式去做，係一種習慣，係鳩like。但你而家畀多1秒嘅時間佢，咁就完全唔同晒。雖然dislike或者「嬲爆爆」符號都係另一種付出，但只女人發現你對其他女人比普通朋友付出得多嘅時候，除咗介意之外，仲係絕對會懷疑你另有所圖嘅！
「胡思亂想？你唔想我亂諗，咁做咩要Love 人哋嘢呀！Love 喎！仲要公開晒畀人知，算咩意思呀！」
就咁睇，真係好似痴左線咁。但係最痴線嘅係Facebook ，因為佢可以神化每一個post充滿唔同嘅情感符號，令到出post嘅人百感交集，媲美於畢業禮上「去年暑假戀事多」，或者婚禮上「新娘不是我」嘅感覺。
當你畀love其他人果時，女朋友個心只會充斥著猜疑，亦會諗點解比佢唔比我。之後，就會轉入直路，FF你係對人有意思嘅瘋狂地步。
如果你唔想為因為一個love嘅emoji，攪到打機都唔得閒的話，識做啦！
咩話？唔係叫你唔用，係叫你只可以畀我呀！白痴！
（每星期寫兩篇文，不求高深，只求kai得認真。）
fantasy emoji 在 Fantasy Emoji Master - Home | Facebook 的推薦與評價
Fantasy Emoji Master. 109 likes. App page. ... <看更多>