絕世好媽（下）
上集：https://bit.ly/3nIZiaz
阿強理直氣壯咁答：「錫我女朋友囉。」
我反駁：「女朋友？你知唔知佢有病㗎？佢得七歲智商，根本冇成熟嘅心智去……」
阿強打斷我嘅說話：「你先有病，小吉講嘢咁有邏輯，點會得七歲智商？」
阿強推起小吉嘅輪椅，就要離開。
我連忙叫兩個阿哥出嚟，截住阿強，爭執咗幾句，三個男人打起上嚟。
我既唔想佢哋出事，又覺得畀啲教訓阿強都好，一時間唔知阻唔阻止好。
「喂，你哋唔好打啦。阿強，走啊！」小吉尖叫一聲，撲埋去推開我阿哥。
小吉當然唔夠力推開我阿哥，但我哋望一望部輪椅，又望一望小吉，大家都呆咗：「你可以企起身？」
小吉都呆一呆，然後成個人軟晒，跌咗落地，我哋連忙去扶佢。
咁樣一擾攘，阿強跑走咗。
我唔再理阿強嘅事，更重要嘅係小吉嘅健康。
小吉同我講，佢細個係可以企起身，但隨住佢慢慢長大，病情愈嚟愈嚴重，就唔再企得起身。
我講：「但你啱啱都企得起喎，可能你嘅病情都唔係好嚴重啫。」
「我有機會好番？」小吉雙眼發光，但光芒轉瞬即逝：「不過，阿媽個個禮拜都帶我去睇醫生，始終都醫唔好。」
阿哥插嘴：「有時醫生嘅嘢，係要睇緣份，可能你冇遇到適合嘅醫生。我舅父咪做醫生嘅，叫佢幫你睇吓。」
為免令夏姨空歡喜一場，我哋趁夏姨唔喺屋企，請舅父嚟幫小吉睇病。
檢查完之後，舅父神色凝重，居然重新檢查一次。
小吉驚到就嚟喊：「我係唔係病得好嚴重，就快死啦？」
舅父檢查嘅結果係：「你根本冇肌肉萎縮症。」
我難以置信：「但係小吉病咗咁多年，企都企唔到。」
「我器材唔夠，叫佢屋企人帶佢嚟醫院，做一個全面嘅檢查。」舅父答。
阿哥好興奮咁話：「可能小吉之前嘅醫生誤診呢，或者拎錯咗另一個病人嘅報告，小吉根本冇病得咁嚴重。」
小吉都好開心，舅父就留低咗張卡片，叫小吉交畀夏姨。
點知，我等到嘅唔係好消息，而係夏姨嘅責備。
夏姨推住小吉嘅輪椅，義正詞嚴咁同我講，小吉已經有睇開嘅醫生，食緊好多種藥，搵其他醫生嚟診斷，只會破壞佢原本嘅療程。
我忍唔住講：「但舅父話，小吉冇肌肉萎縮症。」
「小吉身上有好多病，佢每幾個月就會痙攣發作一次，已經做過好幾次手術，情況同一般人唔同。」夏姨講咗一堆醫學名詞。
自此之後，夏姨好似嬲咗我，唔再畀小吉同我傾計。
直到有一次，我見到夏姨同小吉出門口。
輪椅上嘅小吉張大嘴，口水不由自主咁流出嚟，嘴裡面幾乎冇牙，好似比以前病得更嚴重。
我跑上前去，想同小吉傾幾句，但夏姨睥住我，我都唔敢出聲。
夏姨推住輪椅向前行，呢個時候，一個紙球從輪椅下滾出嚟。
等夏姨離開，我先執起個紙球，係小吉嘅求救信，只有寥寥數句，筆跡好倉促。
小吉話，夏姨唔畀佢再上網，托我聯絡阿強，叫阿強嚟搵佢。
我呆咗，夏姨一直話，小吉腦部受損，只有七歲智商。
但我同小吉識咗咁耐，再加埋紙球呢件事，佢邊度似一個七歲嘅細路？
如果小吉個腦冇事，如果小吉冇肌肉萎縮症，咁講大話嘅就係……夏姨。
我信唔過阿強，佢只係一個網友，所以我將呢件事話咗畀舅父聽。
舅父搵咗個社工，上門查詢小吉嘅情況。
但夏姨有齊文件，證明小吉真係有心智障礙，所以社工都無能為力。
我只好通知阿強，阿強好緊張，馬上嚟搵小吉。
嗰晚，阿強從後門入咗小吉屋企，我個心好亂，我都唔知我做得啱唔啱。
幾日後，夏姨嘅屍體被發現，小吉同阿強不知所蹤。
警方追查後，好快就捉到佢哋兩個。
佢哋爽快認罪，係小吉提供凶刀，阿強郁手殺死夏姨。
至於原因都好簡單，小吉發現自己冇病，唔止係冇肌肉萎縮症咁簡單，係從來都冇任何病。
所有嘅病，都係夏姨幻想出嚟，再將病徵同醫生講，令小吉食咗好多藥，甚至做過手術。
小吉嘅頭髮被剃光晒，由細到大都係用餵食管食嘢，長期坐輪椅，從來都冇返過學。
小吉一直以為，係自己條命唔好，夏姨係世上最好嘅阿媽。
直至我舅父嘅診斷，令小吉開始懷疑，自己嘅情況冇咁差。
小吉偷偷唔食夏姨畀佢嘅藥，居然發現，佢唔食藥之後，身體愈嚟愈好。
佢向夏姨提出質疑，但換來嘅係夏姨嘅暴怒。
夏姨決定令小吉病得更重，夏姨用麻醉劑抹落小吉個牙齦度，令佢不斷流口水，再將佢僅餘嘅牙齒拔走。
小吉意識到，再咁落去，自己遲早會「病」到落唔到床。
但謀殺就係謀殺，小吉被判監十年。
我去咗探監：「對唔住，如果我哋好好商量，如果我唔係就咁放咗阿強入嚟，你就唔會失去自由。」
但小吉笑得好開心：「我曾經許過願，話如果畀我有一日嘅健康，我願意放棄一切。你幫我搵到健康嘅方法，只有消滅我阿媽，我先可以『康復』。」
我打量小吉，佢留咗一把美麗嘅長髮，膚色紅潤，同以前完全唔同。
「我冇失去自由，至少我可以自由咁企起身，我可以用我嘅牙齒去食嘢，我依加先得到自由。」
小吉好認真咁望住我：「多謝你。」
—完—
真人真事改編自「Dee Dee Blanchard謀殺案」，
迪迪對外宣稱女兒吉普賽（Gypsy Rose Blanchard）患有白血病、氣喘、肌肉萎縮症及幾種慢性疾病，無法正常行走及吞嚥，只有七歲智能。
因為「單親媽媽帶着重度殘障的女兒」一事，迪迪經常得到社會的支持，及收到大量慈善捐款。
有醫生推斷，迪迪患有「代理型孟喬森症候群」，指照顧者虛構被照顧者的病情，甚至故意加重病情，以搏取關注。
吉普賽被逼服用大量藥物、剃掉頭髮及接受手術，她以為這是真實的母愛，但長大後逐漸洞悉真相。
後來，吉普賽在網上認識了男友加德強（Nicholas Godejohn），提供凶器予加德強，二人謀殺迪迪後逃走。
結果，吉普賽被判監十年，加德強被判終身監禁。
多個電視台為此製作新聞節目，亦推出了網絡劇集《The Act》。
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #絕世好媽
