自從上年年中拗柴之後，身心狀態都跌入谷底，短途向來冇速度不在話下，就算腳傷好返少少，上年年尾隻埼玉馬哮喘起最後要行返終點。
今年終於冇傷，同時亦冇曬D比賽，年中嗰陣本來心懷大志跟Programme想打好D個底，點知工作關係令精神狀態差，放咗工好多時都希望可以快D返屋企休息下，跟左2個月programme終於放棄咗。
呢幾個月都係隨心跑，有力時會跑下tempo，反而冇乜點衝圈，比之前懶咗，亦重咗好多。
弱弱嘅我星期六盡量跟教練重新學跑，記得年中時教練叫我跑20 mins tempo，只係4分尾，我10 mins已經投降。每次佢俾target我，我都一句話「唔可能」，次次都覺得做唔到。
兩星期前跑5K tempo，教練又叫我跑148一個圈，我又千萬個藉口話自己冇食早餐冇心理準備又冇強大gear...最後半推半就，佢每個圈鼓勵我，我又怕停低要重新起計，最後23分跑完，已經係弱弱的我最快嘅5K。
我問教練，我幾時可以TT，佢話適當時就會叫我跑，因為我冇跟programme所以唔好俾太高要求自己，而其實，我target 係10K 48，但好似遙不可及，5K好似係我嘅終點咁。每次5K之後，我好似完全冇力，pacer同教練都話係我心魔。
本來想喺尋日生日跑隻10K 總結我嘅2020，但pacer話如果失敗左我會生日唔開心，咁就遲一日啦，就算唔成功，教練話聖誕或除夕可以陪我🤣，即係有三次機會。
今日，天氣perfect，馬場圈微上落斜嘅推動，機會嚟喇！Pacer一路喺隔離，3個圈之後突然冇力...我停低咗幾秒，但一諗到要重新起計時，叫pacer俾飲水動樂我飲之後，又繼續跑...好多次好想停，好想俾藉口自己下次再跑，最後7個1400m 圈+200m，終於做到目標時間10K 48分內了，但始終馬場個圈易跑D，運動場我應該跑唔返呢個時間。
多謝教練，佢成日同我講唔好一開始就話自己唔得，同埋唔好set d一定做到嘅target 俾自己，我知我仲係跑得好衰，但係我會繼續慢慢逐少逐少進步架🤣
多謝pacer受氣，跑太前又俾我鬧，又要拎水陪跑，仲要未食早餐。
呢個10K time trial係送俾自己遲來的生日禮物。
