又是多年前的舊文。
————————————
【今夜像霧像雨又像風，不妨卿卿我我】
回到90年代，有唱片公司為了宣傳自己的歌，可以向電視台買一個晚間時段狂播自己的歌。
1.因為這個時段（也因為我當年仲有持續地開電視），我識唱一首歌。
2.今夜的星光燦爛，那半醉一雙眼，透過了友誼界限……
3.林帆《今夜》。一首你明明冇買碟但都應該識得哼頭幾句的歌——唔只識唱，甚或仲好記得個MV：某夜，隆重地著上冷衫乙衫的林帆，在一個沙灘緩緩步行，離奇是沙灘上早就布下了一個由唔知邊個布下的Blur Blur哋燈光陣（Blur是鏡頭效果），而更離奇是，鏡頭突然閃出一條友，著住件Tee，恍如體操選手般過度活躍地跳嚟跳去再打埋斛斗，看得（著住冷衫的）林帆好不興奮，而更更離奇是，這時林帆竟然坐在一張相當歐陸味的床上——Who擺這麼一張床在沙灘上？唔重要，重要是一班幕後創作人為了營造「今夜的星光燦爛那半醉一雙眼透過了友誼界限」這淒美意境，真的苦心孤詣地，做咗好多嘢，擺咗好多Props，也應該使咗公司唔少錢……
4.但真正使錢的是，一間唱片公司為了推廣旗下歌手，是可以向電視台買一個時段，晚晚播幾首歌，持之以恆地播播播播播播播播播到我事隔多年依然識得唱《令夜》，兼背得出個MV。
5.那間唱片公司是飛圖，只是我們大部分人都慣咗口叫佢「飛圖卡拉OK」——在那個未有電腦揀歌再幫你換埋碟的年代（而是有個膠File，攝滿寫著密麻麻編號的紙，你想唱邊首，就唔該根據張紙去櫃枱攞相對應的LD，所以不是揀歌唱，而是揀碟唱，為慳時間惟有成隻碟唱晒），我們去唱K（當時會好隆而重之地講「去唱卡拉OK」，恍如沒有「卡拉」，成件事就冇咁OK），走唔甩，一定唱過飛圖卡拉OK之出品。
6.我尤其欣賞那些為拍而拍的MV。A歌手明明不是飛圖門下，飛圖為了製作A歌手某首作品的卡拉OK版，是會專誠請幾名Model仔或演員仔（有些在好多年後真的紅咗），專誠拍一個MV，MV仲會盡量嘗試配合歌詞內容，從中你會看見一種近乎偏執的認真……也有一些，冇人的——嚴格來說應該是冇一個特定的人，因為成個MV就是齋拍世界各地美景，讓你唱歌之餘眼睛想旅行，一首MV，N種感受。
7.然後，飛圖也有屬於自己的歌手。例如梁雁翎。有一個秘密，咁多年我都冇話俾同學和老師知——我．愛．梁．雁．翎！我由衷地覺得梁雁翎好靚！OK你可以話佢娘，但「靚」和「娘」，是兩種不相關而又可以並存的性質，一個人自然可以靚得來完全唔娘，但娘，同樣也掩蓋不了一個人的靚……但當年的我未讀過亞里士多德，不知道以上道理，以致當同學們話佢娘時，我只能（揞住良心）附和……現在不同了，我已經唔使理班同學，可以大聲講：梁雁翎好靚呀！《像霧像雨又像風》好好聽呀！《你怎麼說》仲好聽啊！同蔡濟文合唱的《慢慢地陪著你走》亦好動人呀（當年我幾咁想邀請女同學L跟我合唱，無奈一直不敢開口……）！
8.當然，還有卿卿。她真的能夠用聲音，演繹出一種唔係你話扮就扮到的性感淒怨 & 風情；當大家只記得她的《擋不住的風情》，《卿卿我我》才是我的卿卿首選。
9.Yes，這就是90年代初的香港樂壇。你可以去迷天王天后，可以去愛純情玉女，可以去捧位置二三線但歌藝相當一級的男歌手，也可以好似我咁，晚晚臨近午夜開電視聽卿卿林帆梁雁翎（而又唔使話俾同學知）——你有得揀，因為真係有得俾你揀。
10.為求懶係首尾呼應，且讓我用《今夜》副歌作結：今宵方知往日孤單，期求明晨夢幻不散，過去欠你現在奉還～～
一個人孤單歌詞 在 一個人孤單歌詞2023-精選在Youtube/網路影片/Dcard上的焦點 ... 的推薦與評價
阿涵- 過客『我只是個陪伴者，陪著你傷心難過。』【動態歌詞Lyrics】. 訂閱頻道收聽更多好聽的歌： https://www.youtube.com/c/EHPMusicChannelII ... ... <看更多>