近日見有舊同學開始煩升中問題，唔講唔覺仲有四年就到我要面對，昕昕升幼稚園和小學真係好彩到一個點，入到我覺得最方便的學校。（升小不用叩門真係好好彩）
但升中我唔可以求方便，亦唔可以太左右昕昕，因為我一向都希望俾昕昕一定的自由度，雖然我心裡最希望昕昕入我的母校（皆因我仲有唔少老師可以做我的線眼）
元朗區的中學排名跟我在95年升中時相差不太遠，昕昕爸爸母校的元官跌咗唔少，我的母校基元現在竟然好過昕昕爸爸母校，昕昕爸爸當年入讀港大現在當言語治療師，我畢業後只是讀副學士加銜接大學畢業的小薯一件。
昕昕依家在別人眼中的一線小學讀書，成績在中游位置，有幸還有幾年可以看看有否轉變，但眼見佢依家怕英文，到2025時不排除搵間一線中中升學😂😂
不過我成日覺得有d野真係早d諗係好事，昕昕歲零我已經諗定入邊間幼稚園，K1我已經諗定讀邊間小學，但升中真係諗都唔敢諗，只係希望在元朗市，不用每天搭車返學。
中二果陣我由朗屏邨搬到屯門近青山公路的三聖邨，每日來回母校花兩小時多，搭輕鐵時試過瞓過龍，搭紅van試過司機等客又花了些時間。間中放學乘機搭老師順風車到屯門市再轉輕鐵都試過。
其實我有時都好奇點解現在有些媽媽要小朋友搭車跨區返學，當年我係因為唔想轉校先至做咗7年傻事（感恩母校遇到好老師），到現在不想自己的小朋友重蹈覆轍。
小朋友不用花時間舟車勞頓咁返學，休息時間多d，有多d精神返學咪更好。
*圖中昕昕用餐的地點背後正是我母校😅
#hkblogger #親子blogger #小學雞 #有感而發
