今日又再同大家講吓性騷擾。
話說，有人pm我，內容一開始都好正常。既然身邊個老公打緊機，我就覆吓佢啦，佢話佢係邊度邊度人，喺邊度邊度做嘢，問返我做乜。（我好傷心，假假地都係歌手仔，呢件事令我反省緊，今年都要出歌啦，唔出歌啲人就會忘記你...）我嬲嬲地叫佢去睇我簡介啦🤦🏻♂️。然後佢就開始問我要line WhatsApp，我其實轉咗用signal好耐，但我都有禮貌覆佢，老公說不可以喔～
而當佢知道我有老公之後，對話各種歪。
當然我都好好奇，乜原來IG仲有人唔知我有老公，我一日三餐，餐前餐後都提起我老公喎。然而，佢依家先知，仲問啲好猥瑣嘅問題，我逐一勸阻解答，最後佢都係問我要多次line，我拒絕，佢就放棄咗。
但，其間佢講咗一句令我幾驚訝嘅說話。
「我都說那樣了，你都不會生氣，你的內心那麼強大，我需要你這樣的女生。」
原來有啲男人，內心深處知道自己猥瑣變態，雖然知道，但唔知自己係性騷擾緊人，佢並不清楚對方年齡幾大，只係因為對方係女仔，就會各種撩、各種騷擾，相信如果我再跟佢個flow講落去，可能會收到不雅相。作為已婚婦女，我又浸喺電視台多年，面對性騷擾我都可以雲淡風輕，但我無法想像有幾多女仔喺IG po過相，就被啲陌生嘅男人睇中進行性騷擾？你問我，言語幾句啫，你有咩損失啫？下？你真係咁樣認為？如果一個男人長時間覺得咁樣做唔會有後果，終有一日佢會破壞一個家庭，終有一日佢會強姦或非禮一個女仔；而女仔長時間受到呢種騷擾，終有一日佢會覺得係常態，幸運嘅話好似我咁百毒不侵，唔幸運嘅話佢會成為受害者，甚至加害者，令其他人受害。
對談過程中，佢多次提起過性能力、金錢等等嘅字眼，不難想像，有啲人嘅世界只追求性、金錢。我忍唔住苦口婆心：你要的不是情人，你要多了解你自己，多愛你自己。
可惜我都未落地成佛，亦無咁多時間普渡眾生，老公話，唔洗覆佢啦。
ok，咁你哋覆我，我可以為性騷擾嘅題目再做啲咩實質性嘅嘢呢？
#年初六 #希望呢個世界可以更好
#我估唔到我po啲咁嘅相都有人撩
#以後影後算啦 #我後面都靚㗎
#明明我老公咁靚仔
#點解有人覺得贏到佢
#如果我咁愛錢就唔會揀佢啦
#想用金錢攻擊嘅人可以放棄了
#我好富有 #心中富有
#比起物質我更在乎靈性
