【年三十演唱會後遺 - 中Q晒毒】
話說係人都知年三十晚公關仔去咗睇鄭中基，一直開心到今日。演唱會好睇，作為歌迷就自然High，仲有少少感觸添。
.
歌迷個個都知鄭中基唱歌好聽，唔駛公關仔再講啦。演唱會裡面一開場佢就講夢想，但暴龍哥即暴龍哥，一開場talking就寸9個政府，口直心快深得愛戴。由黑歷史長髮Look聽佢唱《相思無用》、《你的眼睛背叛你的心》開始一路聽到依家，可謂大家互相陪住大。相信大家都記得佢都有曳過低潮過嘅日子，而當晚睇住佢三代同堂上台Jam歌，佢望住個女溫柔驕傲嘅眼神、大鄭生望住佢驕傲嘅眼神，仲要聽住佢多謝老婆，直頭啲幸福嘭嘭聲咁湧埋嚟。
.
到最後仲有杜生咁出色嘅老友出嚟站台撐場，氣氛高漲之餘，諗深一層，依家下下都自我審查嘅年代，無返咁上下Guts同自信，都唔會同唔駛旨意請得郁杜生啦！
.
出嚟做野都好幾個年頭，日日營營役役，有時諗返轉頭自己都衰過少不更事過，高高低低之後，如果能夠好似暴龍哥咁仍然自傲自信咁做住自己鍾意嘅事，有愛錫自己嘅家庭，願意同你一齊癲癲喪喪嘅老友，仲可以講自己心裡面想講嘅野，真係夫復何求呢？我哋呢班曾經年少氣盛令老豆阿媽心痛，但又想堅持做自己鍾意嘅事，橫衝直撞過、又因大個咗知道責任多咗嘅後生仔 (喂，60都只係中年我唔係後生仔係咩？)，見到佢嘅幸福，除咗羨慕，仲有一種Buddy嘅感動。
.
全晚最令公關仔感動嘅就係encore部份，大家大叫一啲國語歌嘅時候，暴龍歌一句：今晚唱廣東歌！嘩，呢下型棍又感動。本地歌手係香港開演唱會，堅持唱廣東歌，係唱俾我地呢班本地樂迷聽呀！點可以唔感動！
.
嗱又咁講，見到人地風光嘅一面，佢曾經嘅努力同付出，又有邊個知呢？
.
公關仔只衷心希望，暴龍哥可以繼續發光發亮，用歌聲和幽默照亮我哋呢班日日勞勞碌碌嘅人，即使只有一晚演唱會的娛樂，返工放工loop條play list聽下好歌，間中聽下佢窒下啲老友，講下爛gag，有得笑下開心下就好架啦！
.
暴龍哥，加油！我愛你呀！
.
PS：多謝雲妮！你都要加油！
PPS: 估下公關仔最鍾意暴龍哥邊有歌？ (估中無奬)
#演唱會前煲定兩個星期playlist #演唱會後加倍狂煲 #仲睇晒成套錦繡良緣 #仲煲咗我要做model同越光寶盒 #聽日煲返行運超人先得 #中晒毒 #年三十high到凌晨三點幾年初一又要去拜年家陣先得閒寫 #初四唔駛返工就好啦
