如果你一直在餓好睇嘅商業港產片，覺得好耐都冇睇過一套熱鬧過癮無聊，又啱你胃口嘅，唔該快啲去食咗呢部《炸雞特攻隊》。
完全係一部快靚正嘅電影快餐：節奏明快、佈局完整靚正、仲要笑料卜卜趣。
我細個嗰陣時睇「五福星片」，就係呢種「耍呢弄Chung，烏喱單刀」，如果你睇得明呢八個字，港產喜劇感exactly 就係咁喇！去睇你就會明白，重獲久別重逢嘅發傻大笑。
明明係一組人，認真做低能事，錯有錯着，甩轆中見真情，警察5人組由監視到破案，都係反英雄向英雄致敬，losers向hero戲謔膜拜。
武打、威也、對白急轉彎，人物嘅怪、傻、慘，飲港產片奶大嘅人會睇得好投入。
《炸雞》除咗復刻80年代港産英雄片，連一啲都市傻愛電影，好似《長短腳之戀》嘅影子佢都有。韓國人其實真係好鍾意好鍾意港產片，呢部戲係韓國人寫給港產片的情書。最後一幕，係人都講嗰幕，音樂響起，係張國榮嘅《當年情》😱，用廣東話唱出嚟，然之後重演咗《英雄本色》Mark 哥豪哥周身槍傷揸住支槍，坐喺沙發等警察到經典一幕，全場大力拍手掌。係好玩好正，但我深深深深咁樣歎息，全世界拍掌，我歎息，係好深好長咁歎氣，深過深淵，悲從中來😭😭😭
係我哋嘅港產片呀！！依家係韓國人將我哋嗰套功夫，耍得咁出色，而唔係我哋自己承先啟後，韓國人精讀左成個80年代嘅港產商業片，拍咗呢套雞片。
同陳慧交流，佢話好似本家傳秘笈俾人偷咗，人哋而家發揚光大，青出於藍。我覺得換過角度，不如當好似Tesla嘅Elon Musk咁講，open source 囉，各有各做，你叻，你淘汰我。（又或者咁呢，我哋去睇返人哋依家點解成功，下一水輪到我哋痛定思痛，東山再起呢，港產片努力呀！）
#炸雞特工
#港產片精讀
#當年情 #不再
#畢明影評
#係好味嘅快餐
#人哋學晒下山了😭
#你自己呢
