［Harry Potter，Endgame，J.Lo — 22年1蚊變35000，其實唔難］
故事好簡單，就係哈利波特嘅初版，最新拍賣成交，三萬五美金（https://cnb.cx/2ON5Wz1）。其實完全唔貴。不過買嗰個係一蚊美金買返嚟，初版時鬼識大媽乜水咩。一蚊嫌多啦。35000倍嘅回報。
啟示？其實係冇乜嘅。固然，廿二年可以三萬五倍，都好勁。但，就算打中個咁嘅Jack Pot，都不過係三十萬港紙未夠，都未夠你買層元朗樓畀首期。
所以真啟示係，只講回報率冇用，你買幾多先得架。無數咁多人中過幾百或幾千倍嘅冷門，但，買咗幾多？你幾千蚊博幾倍，人地成副身家每年求兩成回報，最後點？
另一問題當然係downside。你去買十蚊雞仔注李斯特城捧英超，或者中國拎世界盃，幾千倍，幾好，但分分鐘未夠你去次日本。 「咁不如買大啲」，但，輸咗點？你買呢啲嘢，輸咗total loss喎。十蚊就當跌咗啫，但你唔會買幾萬蚊掛。但買股票買樓，好多普通人可以幾百萬幾千萬買落去，因為當你買盈富基金，就真係冇乜可能total loss。你話 「咁跌八成呢？」。唔會掛，就算會，喂，回魂夜話齋， 「total loss還total loss，跌八成還跌八成」。都唔係廢話，實務上，我當你幾千萬買落去，跌八成你好難受，但物質上真係未使跳樓（買樓有槓杆就另一回事）。
另外，書嘅嘢，其實都係唔值錢。特別係印刷嘅書，唔係古書。（電子書更加冇價值）。嗰時哈利波特話賣到斷市，都痴Q線，擺明就係行銷技俩。書嘅嘢，要印幾多就有幾多架啦！邊會有缺貨。爭在印唔印
當年嘅初版，印得五百本，三百本去咗圖書館度。親，有冇諗過去偷？話你知，圖書館啲保安好求其咋。但舊文有講，偷呢啲嘢係乜用，得個型字。仲係你以為嘅型（http://bit.ly/2GFVx1Q 你偷過梵高吧，值幾多百？） 。
剩低所謂流傳在世上嘅，兩百本咁大把。我當你當初買晒佢，都不過係值五千萬港紙，幾好架啦。但，講緊出版界近N年奇蹟,，你獨具慧眼，仲要一個人買起晒，先得五千幾萬 —慳慳地夠全家退休，但， 會唔會買幾個太古城單位會簡單啲？
仲唔好計，一年N咁多條友出書，就算撇除啲明顯唔會成名嘅（例如我），你有乜可能估到邊個會掂？定靠AI？只係搵地方擺都係問題。35000倍？但似乎，你買35000個作家，都未必會出到一個J.K. Rowling。
________________________________________
又，另一玩法，都再提下，彼德林治嘅 「生活投資法」，世上最被誤解嘅東西，甚至係最過時嘅嘢（而家股市同四十年前比？）。當年方卓如寫專欄，寫過篇《哈六》，就係哈利波特六（http://bit.ly/2OLiSWg）。
佢提到出版商 Bloomsbury ，叫你當時買，到第七集出時就沽貨。時為2005年7月18號
結果點？寫篇文時，股價差不多四舊水。你跟佢買，摸晒頂。到哈七大結局時（2007年7月），兩年已經輸一半去到兩舊水。之後多年一路尋底，跌到低過一舊水。而家都只係兩百幾蚊，14年後依然輸一半。如果我買層太古城，升幾多？唔好講了。仲計埋槓杆？佛地魔都激撚死，唔使拍第七集。
結論？結論唔係抽佢水，而係發達邊有咁簡單。人人都知成功嘅嘢，price in 晒啦。第六集先嚟買，遲唔遲啲？事實第一集嗰時股價先廿蚊。兩三年已經升十倍了。
好悶好煩，但都係要講
股票嘅嘢，永遠係炒預期（其實其他金融資產都係）
股票嘅嘢，永遠係炒預期（其實其他金融資產都係）
股票嘅嘢，永撚遠係炒預期（其實其他金融資產都係）！
最新近嘅例子？早幾日在《獨角號》，幫佢地寫咗篇文，講迪士尼業績（http://bit.ly/2ON85ee），差過預期，股價即插。點解終極電腦大爆炸嘅EndGame咁收得，業績唔得股價會唔得？
因為，到你老母都知套戲收得時，乜都反映晒啦。你都知嘅內幕邊係內幕?唔好真係睇啲三手料（例如我啲文）以為自己洞悉先機。事實有圖你睇，迪士尼股價幾時爆上去？4月中。套戲幾時上呀？4月24。根本由啲人估套戲票房會好，甚至睇幾多戲院上排幾多場預售幾多，已經大約估到掂唔掂，股價必然先升為敬。等到票房破紀碌先買？而家都未返家。當然，呢啲嘢事後先知，當時嘅往往當局者迷。但的確同哈利波特同一玩法。
________________________________________
又，講起初版，都係要再恥笑。J Lo 嗰套 對面的男孩殺過來（The Boy Next Door），劇情極之例牌，第一分鐘估到結局。失婚靚媽教書，個仔同學又大隻又靚仔又好人又成熟，於是有人濕晒上埋床。點知條仔變態嘅，會放閃卡仲會斬你全家。講完。個半鐘主要係睇J Lo 個籮。
不過仲有個彩蛋：呀大隻仔，屌同學老母就屌老母啦，仲要做文青，送書畀J Lo，初版添。明顯呢幕係抄《格雷》嘅。係，《格雷》咁弱智都仲有人抄。
不過《格雷》唔梳頭SM大王係送咗本黛絲姑娘（Tess of the d’Urbervilles）初版畀呀大學女生。去到呢套，大隻仔送畀大籮文學老師嘅，就係荷馬（Homer）既「伊利亞德」（Iliad）初版！媽的，你都唔好話荷里活唔弱智，編劇導演演員全部都腦殘的，冇讀書都算，有冇常識？當時鬼佬網都齊齊笑
唔知笑位在邊嘅，可以睇返我多年前嘅舊文 （http://bit.ly/2GH7q7p 公元前700年就有印刷術呀！問你服未！）
仆你個街，「伊利亞德」，公元前700年希臘己經有印刷術！仲要英文版添！仲要硬皮！拿，呢本如果一蚊買到，就值錢啦！
________________________________________
可以由文學（哈利波特都唔係文學？）講到電影到投資到人性，唔敢話只此一家，但乜都識啲（而冇嘢真係識）係本人特點。
最後順手講，對偷書有興趣嘅，年頭套 《美式禽獸》（American Animals）堅係好睇（http://bit.ly/2OLlIKQ）。在香港上咗都冇乜人知，亦冇乜人入場，但絶對係今年最好電影之一。真人真事
