《偽君子與偽小人》陳心遙
《信報》2018年7月25日《視線所及》專欄
黃子華棟篤笑，引用已故才子黃霑嘅名句作結：「為真小人爭取社會地位，唔肯畀偽君子們霸佔整個世界。」為現今香港留下註腳。
社會有好多偽君子，位居要職，又或者擁有公權力。當社會上有人做錯事嘅時候，只要嗰個人唔係有財力有權位嘅個體或機關，佢哋都可以義正辭嚴出嚟指摘佢。如果係嘅話，咁偽君子嘅就突然識得「逆向思考」，會為犯事人解說，呼籲大家要原諒佢，畀個機會佢云云。偽君子多數有「政治智慧」，識得「審時度勢」，腦內嘅道德間尺可長可短，可直可曲，視乎「情況」而定，一切不能一概而論。
相反，社會上另外有一班人，平時努力工作，雖則偶然吞Pop，但傷天害理嘅事連想都唔敢想，如果路上遇到有需要嘅人，話唔定仲會伸出援手去幫助。
同一班人，都知道清楚政治形勢，或者聽從長輩提示：「唔關自己事嘅嘢就唔好出咁多聲喇，乖乖做嘢搵錢就好。」所以眼見社會上出現好多其實同自己有切身關係嘅不公義問題，總之一日未殺到埋身，都唔當係自己嘅問題。之但係生活上、工作上，積埋積埋嘅情緒，都總需要有個出口宣洩。
於是遇到有人做錯事，或者疑似做錯事，呢班人就可以圍一個圈，對一個素未謀面嘅人群起而攻之，唔需要證據，唔需要道理，窮追猛打，毫不留手。
最常見嘅例子就係娛樂圈，但凡有藝人或者藝人嘅另一半疑似係出軌、有第三者，當事人就好似犯咗堪比殺人放火、賣假疫苗更嚴重嘅罪行，人人得而誅之。如果電視肥皂劇入面，出現「一班三姑六婆、四叔七舅，喺𨋢口竊竊私語、指指點點某一個隔籬屋阿邊個背夫偷漢」；我作為一個編劇，一定覺得係爛透無聊，脫離現實嘅情節。但事實就係：呢種月旦別人芝麻綠豆私生活嘅慾望，一直冇停止過。不過而家三姑六婆四叔七舅，可以匿喺社交媒體後面，特登開個account網上欺凌一個人，樂此不疲。
呢班人本來就係尋常百姓，就只會喺網上逞口舌之快，我稱之為「偽小人」，佢哋根本係心地善良，不過搵一個出口、同埋一個藉口，去發洩自己嘅負能量。假設佢哋喺網上鬧緊嘅人，而家出現喺佢哋面前，單對單，我輸賭佢哋亦唔會惡言相向。既然口舌之快又過咗癮，點解仲唔放過人哋，放過自己呢？
我都係平凡人，都有嗰種八卦嘅強烈慾望，不過就成日警惕自己：「人哋嘅情事婚事戀事床事，真係關你鬼事咩？」
#偽君子與偽小人 #黃子華棟篤笑 #金盆𠺘口 #黃霑 #偽小人 #信報 #陳心遙
