《#ptgf出租女友》無之前聽人講咁差，或者可以話，套戲部份位對我嚟講係拍得OK好睇。大概似葉念琛嘅愛情喜劇，有留意開就知我一向對呢類作品大致上都喜歡。其實係咩戲用咩心態睇嘅問題，有得笑下輕鬆下，演技唔好太差，就得，唔要求有咩啟發有咩警世道理。
.
前段似返一向“高登電影”嘅套路，要加啲網絡元素，主角突變網絡焦點，毒撚都變溝女大師。新意就無乜，解釋下啲入場觀眾肯定識嘅術語，《起底組》嗰味演繹方式。近中段女主角出場，同男主角發展真愛就開始好睇，即係變返愛情片。要細睇就實有野插有啲轉折寫得唔夠好，但好笑位的確唔少，配角亦幾新鮮出色，鄧月平唔需要拋胸都贏晒所有同劇女演員，真心拍得佢靚。
.
蕭生啲戲一向玩話題，今次睇落都係事前有啲talking point，正片反而偏正經認真。嗰時話請空姐演ptgf俾人鬧爆，實情佢地喺裡面演返空姐無咩唔尊重嘅地方。而班露肉女基本上我都唔識，無咩邊個靚，亦無露點露毛，想睇呢啲勸你返屋企開電腦重温自己啲珍藏好過。整套戲嚟講都算有正常發展無睇到我炆，愛情位笑位都收貨有突，少少咸少少低俗調下味唔錯。個結尾，嗰種從網絡結緣再轉向另一網絡平台重遇嘅感覺，我其實幾鍾意。
.
同場加映：
★加入狂友fb群組【 #狂氏電影綜合症候群 】
★*// http://bit.ly/32xJWLp //
★直接交流 × 影患有救！
