《Kai 子》
是咁的，我叫阿明，喺香港未有「毒男」呢個形容詞時侯，好多人都叫我做「Kai子」，可能我屋企比較窮，無咩錢去打扮下自己，對潮流嘅野都唔係話好熟悉，閒來只係睇下TVB劇打下機咁。每次返學我都羡慕班MK仔，唔知點解佢地可以咁有錢去買煙、又著「喇叭褲」，又可以成日換唔同嘅女朋友。可能每個人生出嚟都有一個角色，而我只能夠安份守已做一個為別人配襯嘅「Kai子」。
大時大節，特別係冬天。身邊都好多朋友都攬住條女出街，而我只係留喺屋企對住ICQ，無無聊聊咁同人搵水吹。
阿媽仲同我講:「係喇!留喺屋企咪幾好!得閒就讀下書!唔好群埋出面嘅人......隔離屋個軒仔呀!上次比我見到佢拖住個女仔呀!細細個學咩人拍拖呀!你唔好學佢呀!」
每次聽到阿媽咁講，我都好想同佢講，其實將來有冇諗過自己個仔好難識到女朋友呢?
有一次喺Online Game入面識到個叫Karen BB嘅女仔，佢性格好好，好照顧班新仔，有時侯同佢傾計都好舒服，我地又好夾，無論咩話題都可以繼續。可能喺網絡世界之中，個人都比較大膽啲，我喺Game入面當住所有玩家，要求佢做我老婆仔，比我照顧佢一生一世。最後一片歡呼聲之中，Karen bb佢終於答應我。
呢一刻應該值得紀念，咁大個仔終於成功追到女仔。幸福係值得炫耀，我都忍唔住同身邊朋友講我終於戀愛了。身邊嘅人都好驚訝，仲叫我快啲比相。於是我就攪咗個網聚。
當日Karen bb話比我地聽，佢會著件白色背心，著條牛仔褲，仲綁咗條馬尾，約咗喺一間網吧門口見面。
點知，我地眼前出現咗一個中年阿叔，佢真係著住件背心同牛仔褲，而且仲係綁住馬尾。佢擔住支煙吸一下，然後以一把粗壯豪邁嘅聲音笑笑口同我地講:「喂Hello Hello!我係Karen bb呀!原來大家都咁細過呀!多多指教呀!」
嗰刻真係唔想面對所有人，如果有消除記憶嘅藥，我唔係比自己，而係比班網友，希望佢地忘記我曾經要求呢個所謂嘅「Karen BB」做我老婆......
網絡嘅失敗，其實現實都係，因為呢件事傳開咗出去，好多人都笑我，亦有好多人覺得我恨拍拖恨上腦，連僅餘嘅單身女性都離我而去，睇嚟我真係注定做一個無女朋友嘅可憐虫。
去到中五會考嗰年，我喺自修室到識到個女仔，佢叫阿雪。佢真係好靚，皮膚白，又高，無論談吐同性格都好成熟，最重要嘅係，佢無介意我咁「Kai」，竟然同我傾計。但佢去次次去自修室都唔係溫書，而係睇好多漫畫，佢同我講，佢無咩朋友，覺得身邊嘅人都好低能，而佢就快去外國，都好想感受一下喺香港自修室溫書嘅感覺。
對住佢，我有好多唔明白同唔理解。一個咁靚嘅女仔竟然無咩朋友? 不過我一聽到佢去外國，我就知道我遲早都會失去佢。我地咩都講咩都傾，關係好好，直至有一日，佢問咗我一條問題。
「阿明，你想唔想試下拍拖呀?」阿雪問。
「拍拖? 哈.....有邊個唔想呀? 拍到先得架。」
阿雪聽到之後，佢拖住我隻手，然後好天真咁講:「我地拍拖丫!」
嗰刻我係呆咗，完全唔識比反應。然後佢見到我咁，補上一句:「我就嚟要走架喇，就當我走之前，比你體驗下拍拖嘅感覺，但唔可以話比人知。」
我知道阿雪有拍過幾次拖，佢應該好有經驗，而佢提出呢個要求，我實在諗唔到有任何拒絕嘅理由。
於是我答應咗佢。
從呢一日開始，我地真係拍拖。我地會拖手，我地一齊去海洋公園，一齊去睇戲，一齊溫書......佢為咗唔想我成日比當「Kai子」，拎咗好多隻流行曲比我聽，令我愛上咗陳奕迅同周杰倫。佢又會帶我去買衫，我話我無咩錢，於是佢帶我去旺角chic之堡買衫，佢話我以後都可以喺呢度買。
呢段日子，應該係我人生之中最開心。
但亦都因為咁，招來好多閒言閒語，雖然我無同其他人講過呢段關係，但有時出街比人撞到，佢地都話我係傻仔，比女玩，個女仔咁靚點會肯同我一齊做咁多野? 有時仲誇到話阿雪係出租女友......
而事實上，我真係洗咗好多錢，本來已經無咩錢嘅我，就更加緊拙。屋企方面，阿媽見我買咗好多衫，成日傾電話同出街，開始炮轟我唔讀書，就嚟會考先咁，激死佢。學校方面，我就比人標籤比女玩，配合返之前嘅經歷，我真係恨拍拖恨到成個超級大傻仔。朋友方面，佢地話我收風，知道阿雪間學校好多人唔鐘意佢，覺得佢扮野，發姣，仲話洗我咗我好多錢，話我比鬼迷，總之......好多好多好難聽嘅說話。
呢一日，阿雪話想部手提電話，叫我買部。我拒絕唔到佢，我亦都無錢買，於是我就偷偷地去做M記。有次比班朋友見到我做M記，收工之後原來佢地等緊我。
佢地叫咪撚再搵個女仔，佢根本就玩緊我。但我無理。
「阿明!你恨女恨到傻撚咗呀!佢玩你呀!你以為自己係邊個呀!你Kai子嚟架!佢會睇得上你咩!」
我無理亦唔想同佢地解釋，我覺得兩個人之間嘅事，唔需要同第二個人交代。同埋最重要嘅係，我答應過阿雪唔話比人知。
嗰晚，我返工太夜返屋企比阿媽知道，又比佢罵，佢擔心我升唔到中六而激動到喊。沖涼時侯，一諗起呢段受盡白眼同返工捱夜嘅日子，我都忍唔住喊咗出嚟。
終於，阿雪要飛了。果然，除咗佢屋企人之外，真係無人送佢機。我將打工嘅錢買咗手提電話比佢，算完佢心願。
但佢竟然唔要。佢話:「部手提電話唔係我想要，而係想你買比自己。咁大個人，你應該要有部手提電話。」
之後，佢送咗隻CD比我，係周杰倫隻大碟「11月的蕭邦」。
「聽多啲歌，得閒買下衫，唔好再比人當係Kai子呀!知唔知?」
呢刻，我唔知講咩好，腦海一片空白。最後睇住佢轉身離開，慢慢消失喺我視線。
我好想講一句:「我會等你返嚟。」但我最後無講到。
返到屋企，回到寂靜嘅環境，好似所有野都回到起點一樣，阿雪都好似無存在過咁。
唔係，阿雪係有存在。至少，我起碼有一部手提電話、有新衫、識聽歌、拍過拖......
我放隻CD喺電腦到播，望望窗外天空，不禁說一聲:「多謝你。」
我一路向北 離開有你的季節
你說你好累 已無法再愛上誰
風在山路吹 過往的畫面全都是我不對
細數慚愧 我傷你幾回
《完》
*****************************************************************
凍到手指都硬哂.....一路打字一路凍.....
每隻字都係我辛辛苦苦咁打出嚟
希望大家鐘意。
陳奕迅話過自己好鐘意唱歌，而我都可以同大家講
我真係好鐘意寫故仔。
近來有好多人like咗我個Page，好多都係比卡超而嚟
但其實大家都可以睇下我以前寫嘅故仔.....支持下。
天氣真係凍，大家記得唔好扮型唔著衫
出租女友tvb 在 香港愛情故事- 出租女友 的推薦與評價
香港愛情故事- 出租女友 ... 7號起星期一至五喺encoreTVB上有得睇!! 美國觀眾免費點播！ ... 美國觀眾• 隨時隨地• 免費睇 TVB 節目， 立即下載encoreTVB APP！ ... <看更多>