【不負責任影評系列】
《鬼片:驚嚇現場》
橋係有嘅，講嘔唔出劇本嘅恐怖戲導演
聽到有套傳說中嘅短片睇邊個死邊個喎
仲係鬼拍嘅鬼片喎
仲唔扯晒旗狗衝去搵
大佬鬼拍嘅鬼片都講得出
sell老細同投資方幾好sell呀咁juicy
但拍出嚟就真係另一回事
明明45分鐘講完嘅故事
故弄玄虛死拖爛拖都仲係得85分鐘
真係戥個導演辛苦
平時啲韓國恐怖片就算畫面唔夠恐怖
都會tune大啲聲效屈你機死要搞到你起機為止
呢套就真係返魂乏術
扭盡六壬都完全唔驚唔恐怖
好多對付鬼嘅內在邏輯仲睇到人一頭霧水
口講口賠，完全冇鋪排
睇呢套片就好似
睇啲令你完全扯唔到旗嘅咸片
搞嚟搞去都仲係冇料到
睇到人懷疑人生
點解可以悶到打晒喊露你老味
其實恐怖鬼片不外乎兩大原則
一係拍到啲鬼有咁恐怖得咁恐怖
一係講到啲人比鬼仲更加恐怖
但呢套嘢就兩邊都唔達標
連韓式結尾扭橋呢啲必殺老屈都完全欠奉
呢啲故事如果寫一頁紙sell投資係天下無敵
但衍生實行先知原來根本高難度到無能為力
譬如果條睇邊個死邊個嘅咒詛原片
你拍到咁雞真係好難令人投入信服架喎
仲話鬼拍嘅鬼片喎，真係搵鬼睇
我深夜扭開電視睇粵語殘片
然後諗起入面個個演嘅導嘅台前幕後
全部都已經死晒
都仲毛管棟過睇你呢套嘢
佢絕對係係我睇過最廢嘅韓國恐怖鬼片
沒有之一。
#鬼片驚嚇現場 #爛片驚嚇當場 #唯一支撐我嘅就係個氣質女主角 #唔好再隨便拍啲導演冇靈感冇題材嘅題材啦唔該 #唔恐怖扮恐怖先係最恐怖 #戲院同鬼本身已經贏一半點解可以輸突 #又係捉到鹿
