《中環有人情味的台灣小店。一起食堂》
我個人比較喜歡台灣美食，所以香港邊度有台灣餐廳，如果朋友推介我都會想去試。今日我就同朋友嚟到呢一間係中環嘅台灣餐館。
呢間台灣餐廳係小店經營，店面雖小但有一種溫暖嘅感覺。而且我不嬲喜歡撐小店，就睇吓佢可唔可以成功俘虜我嘅胃口。
我見到佢有原條嘅鰻魚飯（$138）我呢個鰻魚控當然要點！大大條鰻魚啖啖肉，而且肥美夠晒腍，佢仲去咗隻溫泉蛋，溝埋啲蛋汁同埋鰻魚食，每一啖飯都好幸福！
朋友就點咗個海鮮稻庭烏龍麵（$88）入面嘅海鮮有蝦，青口，蟹柳墨魚餅同埋墨魚丸，加上我喜歡嘅稻庭烏冬，清清地算不過不失。
佢仲驚食完主食驚唔夠飽，店家仲好窩心咁只要加$12就可以升級加多個小魯肉飯，我當然要加兩碗😂佢嘅滷肉飯真心得，肥瘦均勻而且上面嘅魯肉都唔少，$如果響其他香港的台灣餐廳，呢碗咁小嘅滷肉飯起碼賣$20-$30，12一碗係台灣價錢，真係良心小店啊！
我哋中咗點咗一堆小食好似台灣烤香腸（$28），肉燥燙青菜（$28），和風炸豆腐（$32）都好有台灣嘅風味啊😋😋
另外特飲我哋揀咗三杯，黑糖薑母茶仙草豆漿同埋蘆薈桂花雪梨茶，其中兩杯因為叫咗主食嘅關係只需要加$12一杯，另外一杯都係$24。黑糖薑母茶都幾夠姜，而且我嗰日有啲唔舒服，飲完都幾軀寒，仙草豆漿就成功將豆漿同仙草Mix左，朋友覺得唔錯，蘆薈桂花雪梨茶都幾香幾清潤。
同場加插左一件事我不吐不快，隔離枱一對大陸男女，個女人突然間用唔鹹唔淡廣東話投訴話佢覺得暈，原來係因為食青菜入面有一粒細過芝麻嘅青口殻（真係超細細到我地都睇唔到），佢聲稱比呢一粒咁細嘅青口殻銀到佢隻牙，老闆已經好客氣話免咗佢呢一餐飯，問佢有冇需要call白車，點知佢一聽到call白車即時又話唔暈，但係話聽日要睇牙醫，牙醫話佢隻牙有任何嘅損傷都要老闆賠，話即時冇嘢唔代表將來冇野，呢啲乜嘢屈錢黨嚟㗎?！😡😡😡🤬佢唔好話10年之後自己老到d牙甩晒又話係因為呢粒青口殼？痴線！佢仲越嘈越大聲，好彩老闆EQ夠高堅持唔肯賠俾佢，佢最後先死死地氣走左，唔知又去第二間屈第二個，點解而家呢啲大陸屈錢文化嚟咗香港㗎！好恐怖，不過好在老闆企硬，同埋非常有禮貌同嗰個女人解釋，而且我覺得佢處理得非常之好！真心抵讚！
整體來講呢一間這間真是一間性價比頗高嘅台式餐廳，整體味道算唔錯，重點加分係要俾小店老闆，面對一啲無理取鬧的顧客仍然非常高EQ，抵讚。
———————————————————
店名：一起食堂 (中環)
環境🏝：8/10
服務💁🏼♀️：8.5/10
價錢💰：7.5/10
食物質素🍝：8/10
整體🙆🏻♂️：8.4/10
中環域多利皇后街2號地舖
#吃貨玩樂在中環
#吃貨玩樂
#一起食堂
