🔮
#在日落前妄想日記
親愛的木野真琴：
「生日快樂！」，已經變成我嘅口頭禪咁，每年寫信俾你，第一句都係哩一句。雖然已經好多年，但同你嘅關係，似乎走唔出異地戀哩個題目。
異地戀係一回咩事呢？所有聚少離多嘅關係，都應該叫異地戀，但問題係只要離開1秒我都嫌長，相聚一世我都嫌短，所以請把握好可以相處嘅時間。今年係第幾年呢？我都唔記得啦。或者有一日我地會忘記晒所有銀禧金禧，忘記所有紀念日期，記憶體被生活嘅瑣碎事佔據：「要幾時交租？」、「個仔幾點放學？」、「雪櫃入面仲有乜嘢食材？」、「聽日同學個仔結婚，我地一家三口，做幾錢人情⋯⋯」⋯⋯聽人講，木星力量，有幸運嘅意思。我希望我地夠幸運，可以陪伴對方，去經歷人生中每一次忘記，鬧少少交，然後氹番。
未來會經歷啲乜嘢變化，我地冇辦法預測，好似每年頒獎典禮都會有好多得獎歌手會話：「下年我會繼續努力。」，有時都會諗，可能真係唔知下年係點，所以先講繼續努力。我地一直都好努力，所以都冇得再努力啲，我只希望下年我地會繼續平淡，繼續都係咁啦。一段關係上，唔追求啲咩成就，得到對方，都唔需要其他獎項喇。
未來見 檸
