做黃昏節目的時候，我記得有一條jingle 係「做議員唔係做KOL」，幾乎日日都要播一次畀所有聽緊嘅議員議助聽。點知好似呢一句嘢，就辣到某泛民政黨嘅所謂軍師，話我呢d 做KOL 嘅阻住佢地搵食，尤其是佢地想做嘅，就係想將自己個主子捧成KOL，之後就有好多票，可以同其他泛民大佬拗數話你要睇我頭，因為拉票嘅既時候佢會去你度站台，就可以一票aaa，一票bbb 咁同選民講配票。於是佢地嘅黨羽，就不斷咁係各個唔同嘅地方話我維穩啦。
咁佢地話我講得冇道理嘅點係邊呢？佢地話「鄺神都係做到KOL先選到，佢話議員唔係做KOL 即係想泛民選唔到啦，仲唔係維穩係咩？佢係鬼啦！可以無啦啦30幾歲上到呢個位，又冇背景，剩係得果個爛鬼學位，唔係鬼係咩？」一直以嚟，無的放矢。我選擇點回應？
我唔再講，由得佢地做KOL。之後佢地自己對呢個政權心越嚟越雄，以為影幾張影樓相 ＃見字飲水 ，扮下填詞人去吓研討會有幾個文青女fans 就係鬥贏政權。
然後呢？然後冇咩然後。我唔需要日日再論政，我只係將論政回歸到一個「正常人水平」嘅濃度，睇住呢群 KOL 用佢地嘅力量令佢地好撚中意嘅香港變成佢地不能估算嘅模樣。
我成日都係節目質疑，如果議員嘅工作唔係議政，只係發聲，只係出post 要like，咁點解唔係做KOL，而係去做議員？
我認識真係做議員嘅人，搞議員，maintain social media 只係佢地工作一部份。但我認識更多嘅前議員，其實佢地四年嘅工作只係諗選舉果一刻點樣可以繼續做議員，佢地日復日究竟有咩實事可以做到，我真係試過搵黎搵去都搵唔到。當曾經有一個議員嘅賣點只係100％出席率，選民都收貨嘅時候，你就知道佢地做多只會辛苦自己。
所以，大家如果記性好d，我有第二條jingle 係話：「唔好鬧d議員，有咩選民，咩有咩議員囉。」然後我第二條被泛民議助安插嘅罪名，就係踩香港人抬高自己扮高等華人啦。哈哈哈。
香港選民有一個特質，佢地會覺得只要果個係專業人士（律師、醫生、會計師、飛機師），佢地嘅論政質素就會比我地呢d讀社會科學學位嘅人高，他們嘅說話會比我地呢d 日日做research 睇新聞看時事思考分析嘅人可信。然後當有真係政論嘅網友，講幾句真話果陣，就話呢個人只係KOL，唔明點解仲有咁多人睇佢信佢。
我好慣好多人叫人「唔好慣」之後就回到正常生活，做gym做愛做自己。咁很好很好，畢竟政治是生活一部份，唔係生活嘅全部。只係大家都係度講 ＃唔好慣，＃cls 嘅時候，自己又係咪慣左，同埋自己先係 ＃cls果個？
