《真正嘅世界末日，唔係一剎那，而係一個永無休止嘅狀態》
記得好耐之前喺呢個page 講過，我從來都唔鐘意任何儀式，如果有唔再寫作嘅一日，唔會say goodbye，只會靜雞雞咁fade out。以「輕輕的我走了 正如我輕輕的來」嘅方式收自己皮。我唔係覺得咁特別有型，只係覺得「唔好諗到自己好重要，人地得鬼閒理你咩」…
2020 年好忙，忙到「轉身射個3分波」嘅時間都冇，個心靈忙到好空虛。喺咁忙嘅情況之下，竟然都仲透過個page 收到意想不到嘅notification。包括尋人啦，問我去左邊，問係唔係Facebook short 左，收唔到我個page 嘅update。仲竟然收到notification，有人report 我幾年前嘅post，話我唔知侵犯左咩咩咩，Facebook 仲強行收埋左我俾人report 嘅post。收到report notification，我先知原來真係有人咁鬼得閒理我。
2020明白咗好多… 好想同大家一一分享 …(如果大家想聽的話)
經過左2020 年，我終於知道世界末日，唔係我想像嘅…
細個會以為世界末日係好似titanic ，或者明日之後咁，總之一日之內，或者頂盡幾日就會完結，我以為會冇啦啦，bomb 一聲，everyone 人體爆炸就玩完。
今年我係領略到，世界末日點會咁便宜我地班仆街，一時三刻有個解脫係益左大家，原來真正嘅世界末日，係一個永無休止嘅狀態，係keep 住loop 一樣你解決唔到嘅悲劇。
大家有冇聽過一個說法，講18 層地獄。其中一個對於18 層地獄嘅解說，講到18 層並唔係指空間嘅上下，即係唔係好似高樓大廈上下層嘅概念，而係時間嘅長短。
第一層地獄嘅時間單位，係人間嘅3750 年為1 年，入左第1層地獄，即係要坐1 萬年左右。以呢個formulae 來計，18 層嘅年期，打條直式出來計，我都係唔識計，即係好耐好耐好耐…
我係從來冇想像好耐好耐好耐即係幾耐，2020 我終於知「永遠幾遠」…就係你永遠睇唔到個盡頭嘅時候，而你冇得走。喺呢個咁辛苦嘅狀態，有人話：好想放棄，唔想堅持，唔知做得啲咩，長期都好唔開心，好似搵唔返開心嘅節奏，返唔到轉頭。
我都不停思考，你喺個地獄度，仲點解要努力同積極生活呢？個point 係邊？
本pair 嘅成本真係最低，只要你順住個勢，唔積極同唔happy 咁跟大隊喺個地獄到浮下浮下過世都未嘗不可。
我亦都覺得自己冇能力，改變世界。只係而家唔比你走，唔比你玩完，喺無間地獄當中，一路受，都想有少少甜頭，做啲覺得爽皮嘅野。
至於咩係爽皮嘅野？你想做就係爽皮嘅事了…
以前我好反對人生仔，覺得增加人口係自私嘅慾望。而家我會諗，如果佢真係好自私，想自己爽下有個仔，點解唔可以自私？已經喺個地獄度，理得人啦，佢想做咪做囉，有人話而家個環境生個仔係害左個細路，佢想生仔又其實唔使同群眾交代，佢想生個仔出來一齊受，佢覺得開心，你阻佢其實都係自私架。
以前我亦好反對人移民，我覺得講到咁愛港，why not共存亡？而家我覺得大家喺個地獄入面，大家都受緊架啦，大家都咁唔開心，就唔好顧慮別人。
我覺得大家都唔使諗到大家太偉大，成日諗點付出，點貢獻，大家都冇互相虧欠，為自己做啲自私得來又開心嘅事，就係喺無間地獄可做嘅事。
喺無間地獄係唔使顧全大局，因為好早之前已經冇大局可言。好好take care 自己嘅感受，為自己活著就係最正確嘅事了。
＃大家都其實互不虧欠大家的
