520愛情電影特選之《我左眼見到鬼》
'"Do the best you can do"
—
《我左眼見到鬼》看似胡鬧，實質溫情。
—
兩個人相愛，係咪就代表可以喺埋一齊？可能係因為生死，因為病患，因為社會地位嘅落差，因為背景嘅不一樣，因為家庭壓力，因為種種嘅原因而令兩個人唔可以相愛相守。但係咪唔可以一齊，就代表愛就此結束呢？
—
鄭秀文識咗老公七日就結咗婚，七日嘅時間到底可以有幾愛？愛咪又係愛佢啲錢！然後鄭秀文就開始咗食煙飲酒放棄自己嘅生活，如果要比呢段愛一個期限，我諗個期限就最少長過三年。
—
《我左眼見到鬼》嘗試以現世人嘅沉淪側寫亡人愛情嘅偉大，當你以為鄭秀文已經愛得好深嘅時候，但原來佢老公DANIEL愛得仲深，化身成小學同學王勁威，死咗都仲顧住老婆嘅生活：老婆無咗命佢去救，鬼差嚟錯咗佢去趕，老婆凍就幫佢CUM被，無咗生命意義就幫佢搵番返嚟。
—
老公透過做呢啲嘢，可以獲得啲咩？最後佢終於要投胎轉世，飲過孟婆湯，忘卻一切嘅前塵往事。原來佢做咁多嘢都唔係為咗佢自己，而為咗佢所愛嘅人。Daniel知道即使自己已經無辦法再同老婆一齊，但佢仍然有能力令老婆喺未來可以更加開心，唔理要冒幾大嘅風險。
—
「君子相分，不出惡言」，好似係老生常談，但現實社會入面又經常發生一啲由愛情衍生出嚟嘅悲劇，幾痴線嘅嘢都做得出，好多人都以為愛係等於「佔有」，得唔到你就要攬炒，我唔開心，就要搞到你更加唔開心。
—
《我左眼見到鬼》展現嘅，係更高層次嘅「我愛你」，因為呢種愛係唔理「你愛唔愛我」，甚至DANIEL嘅外貌同生活習慣都係特登模仿整車嘅SAM WONG，目的就係希望鄭秀文可以放低過去，同第二個男人有嶄新嘅未來。
—
執念可以令人沉淪，但亦可以成就好多美麗嘅事物。愛唔可以被時間、皮相或旁人嘅指指點點所定義，甚至超越生死。愛一個人，就係盡力去守護對方，喺局限之下比對方自己嘅最好, do the best you can do。
