早上在老人科復康病房巡房，面前86歲的婆婆是剛剛轉過來的。
根據 transfer summary 轉院摘要，婆婆獨居，今次因為氣喘入院，被發現心臟功能不太好，故此急症病房醫生為她處方了不同的藥物。另外，她在病房時情緒曾經有點不穩，更試過揚言要去死，故此同事請了精神科醫生來看她，亦轉她到這裏來觀察。
「婆婆，你有無唔舒服呀？」我先對婆婆說。
「好，你有心！我無嘢呀。」婆婆自然地答道。
「仲有無氣喘？仲有無邊度痛？」
「無呢啲嘢嘅。」
「哦。。。咁咪幾好。。。咁瞓覺呢？琴晚瞓成點呀？」我開始轉換話題。
「無乜點，你有心！」婆婆顯得有點冷漠。
「咁。。。你仲有無唔開心呀？」曾經在急症病房揚言要死，我當然要了解一下婆婆現在的情緒狀況。
「無！邊個咁衰亂咁噏呀？我幾時有話過唔開心？唔好咁無陰公亂噏喎你哋。。。」婆婆突然反應甚大。
「睇吓你有無嘢啫，婆婆。。。唔係話你係急症病房唔開心，同人講想死咗去算咩？」我嘗試向婆婆解釋。
「無呀。。。唉！我結咗婚6年，個老公話我唔靚唔要我，咁點呀，佢有第二個我咪自己湊大對仔女。。。點知個仔50 幾歲突然死咗，隔多年連個新袍都死埋。。。唉！要唔開心要死一早做咗啦，使等宜家？」婆婆說得堅定。她望着我，眼神帶着一點倔强。
捱過這麼多年，什麼不如意的事，都影響不了她。
望着婆婆，聽着她說自己的故事，我停了半晌。
「你有心啦。」婆婆再開腔，仍然是。
人生就是有着不同的經歷，當笑過、哭過、憤怒過、傷心絶望過，回到再看，日子原來還是一樣的過着。與其自怨自艾， 終日鬱鬱寡歡，倒不如學習釋懷，學懂接受？
