【電影吹水潭】
《安歷卡：全是誤解》Anelka: Misunderstood (2020, dir: Éric Hannezo)
聽晚終於有波睇，今日會唔會考慮先睇一套足球紀錄片？
這套紀錄片的主角顧名思義係已退役球星安歷卡。我認識佢嘅時候佢係曼城球員，亦即係我啱啱開始睇波嘅時代。後來佢輾轉去咗好多唔同球隊，最終係車路士叫做安定翻少少。
安歷卡當時比我嘅感覺係，佢係弱隊就有啲大才小用，但喺強隊嘅時候又擔唔到大旗。今次正式回顧佢嘅年少時候，終於可以了解一下佢點解出道嘅時候效力嘅都係強隊，但係踢踢下會踢到去保頓。
如果以戲論戲，呢套紀錄片唔算好睇。一嚟安歷卡做得主角，無論點電影都會將佢再吹大啲（事實上佢頭幾年，只係喺阿仙奴打咗一季好波咁大把），所以套戲即使一直都想塑造到佢好勁咁，但係係做唔到，只能夠拍到佢有幾鍾意扭計；二嚟其實安歷卡喺球員時代嘅所有風波並唔係好Juicy，來來去去都係轉會，做球壇浪人，大不了就發吓脾氣。尤其今日球星大過一切嘅年代，有咩搞笑離奇嘅球星故事我哋未聽過吖？安歷卡嗰啲以今日把尺黎講可以話係濕濕碎。
成套戲最有趣嘅可能要去到後段，關於2010年世界盃時期法國隊嘅風波。不過套戲都係講得幾避重就輕，電影入面所透露嘅嘢可能google 吓已經搵到。
成套紀錄片都冇獨到嘅見解或者深入嘅發掘，所以談不上為一套好嘅紀錄片。都係等聽日睇波算！
