【將軍澳Weekend散策攻略】
//全文另見Medium，入去Clap完文我會捐咗啲錢呀//
住咗幾年寶林，除咗太濕之外，查實呢度真心好住，今次就同大家講吓點解:
#單車板場
-呢度有全港唯一嘅單車館，入嚟踩單車朝聖記得帶定頭盔護踭護膝，因為假期都幾多小朋友喺度玩, 撞跌整傷就唔好啦。
-除咗單車館, 呢度仲好難得有個X Game場，開到夜晚10點，平時唔少新手都會喺度練板，我得閒都會開架Scooter過去，所以入得嚟就不妨帶埋滑板、滑板車 、Roller嗰啲入嚟玩啦，不過都係嗰句，做足防衞措施，以防整親。
#行山
寶翠公園附近有兩條好啱新手嘅行山路, 一條就係早幾年俾好多網媒勁煲嘅 #小夏威夷徑, 沿途好多瀑布仔睇, 起點喺 #將軍澳村公廁, 終點喺 #井欄樹, 嗰度有車出返彩虹、西貢。
另一條喺 #英明苑 對面, 俾我叫做晨運徑, 有時weekend起身冇嘢做, 就會同老婆行吓, 向左邊上可以去到將軍澳之巔 #鷓鴣山, 幾wok吓, 唔好隨便上; 向右邊行可以去到 #科大, 叫佢晨運徑, 就係因為我哋成日晨運行去飲早茶。
再冷門少少，#翠林邨 後山其實都有條路，可以一路行出 #藍田，屬超級晨運路線，平時都會好多師奶阿伯去嗰頭散步㗎！
魔鬼山呢啲咁出名就唔多講喇，但可以同大家分享吓，康城好Q遠好荒蕪，但真係去到嗰邊嘅話，其實有條5星級秘道，座落 #峻瀅 後面，一路樓梯直上，就可以去到「香港三尖」之一嘅 #鈞魚翁，體力好一路直剷上去45分鐘可到山頂，烏瞰成個清水灣5星級靚景!
#慧安園
慧安園商場簡直係良心商場，入面啲嘢食平到癲呀! 今時今日咁嘅物價，$8食到雞蛋仔，$5食到13粒魚旦，印撈仲要$10 3底，驚死你食唔飽，平時食飯Budget唔多，餐餐捱開麥記嘅，絕對要嚟朝聖呀！
#戲院
鍾意住將軍澳，就係因為呢度多戲院， 寶林新都城有MCL，將軍澳Pop Corn有STAR，真心推介去寶林睇，啱啱新裝修，而且票價平市區一大截，我做埋會員， 平均$60–70一張飛，抵睇到爛。今個星期日Fast & Furious、Toy Story 4、撕紙王呢啲大熱電影都有夜場添!
#Decathlon
性價比超高嘅運動用品店Decathlon 最近喺將軍澳尚德開咗分店，行山要買Pole，踩板要買護具，可以入寶林踩板踩車之前去呢度買定先。
#交通
入嚟將軍澳玩，最麻煩就係交通，將軍澳隧道好易塞死，地鐵呢要一路去到調景嶺先有得轉車，所以我好多時都會搭巴士，經安達臣山路出城。98A出觀塘、98C出旺角深水埗長沙灣、93K出九龍城旺角、798出沙田新城市、290去荃灣、690出港島西、694出港島東，坐慣咗其實都幾方便。另外最大優勢就係超快可以入到西貢清水灣呢啲後花園，入嚟玩完再搭車入西貢夜鈞墨魚，都爽㗎！
最後，寒舍有個花園仔，成日都會邀請朋友過嚟BBQ，如果weekend嚟到寶林，見攰想抖吓，隨時call我啦，一齊燒個嘢食又點話啫!
小 巴 98c 在 [由地鐵站步行往101M小巴站方法]... - 順緻街Shun Chi Street 的推薦與評價
由地鐵站步行往101M小巴站方法] 喺坑口站B1出口（連理街商場）出，然後轉左會見到巴士總站入口，入咗巴士總站後喺九巴站長室對開、98A/98C巴士站旁邊沿斑馬綫橫過車道 ... ... <看更多>