《我唔想好似杜甫咁「飽死」呀》
岩岩睇到一個post，令我好感觸， Cliffy 決定脫離全職圖文作家嘅行列，佢解釋話因為家人有事，過去一年，佢用咗好多方法靠賣佢嘅創作品維生，奈何佢努力搵食，都唔夠食，所以要向現實低頭，返去打工搵錢。
睇到cliffy 呢個post，我真係好心寒，好感觸.....
今年2月，我喺page 講過，我已經裸辭，希望全職寫作。今日嘅cliffy，會唔會係明日嘅我？
我Resign 後，大家第一句都係問我：「咁你幾時搵返工？做返野？」
聽到嘅時候真係覺得個世界好好笑，我彷彿聽到大家嘅心聲「抖下都好嘅，hea 下再返工囉」。大家覺得全職創作係一個Joke來架，唔算係做野。「寫野搵唔到食，諗住hea 幾耐先？幾時返回現實先？」
可能我散發住強烈嘅窮撚氣息，大家都唔想睇到一個悲劇嘅誕生，於是都發揮同情心。有啲好關心我嘅朋友refer part time 俾我做，甚至有朋友同我講「真係無錢搞唔掂出聲喎，我可以借錢俾你架」......個刻除咗感動之外，我有一個感覺，原來做全職創作人，係會令所有朋友都好擔心，大家都想對我落實「扶貧計劃」，同我捱過「無飯開」嘅日子。
※※※※※※※※※※※
點解香港咁鬼淒涼.....創作人要過「貧僧」嘅生活.....
cliffy 無奈決定脫離全職圖文作家行列嘅舉動，令我諗起幾個人，一個係陶淵明，陶淵明當年就係不為五斗米折腰，毅然辭官歸隱田園，最後餓死架。另一個就係梵高，大家都知佢嘅作品生前無人欣賞，後來佢感到懷才不遇，仲精神失常，有時我會諗，如果當日佢係生活得如意啲，一個咁有才華嘅人，可能唔會癲架。最後我諗起另一個悲劇創作人，杜甫，傳說話，杜甫因為窮得濟，好耐無食野，最後有朋友扶貧，請佢食野，杜甫因為太耐無食野，一次食得飽得濟死咗。呢啲 創作人嘅悲劇，聽起上來好「麥兜」，好似好好笑，但我幾乎可以想像，一個不為現實而低頭嘅創作人，個種堅持同慘不忍睹嘅下場。
我喺fb 睇過一個post，一個傳媒訪問坤哥，講佢未紅個5年，無咩收入，都要屋企support，自己只係一個屋村仔，有段時間都好想放棄。然後我見到有個好多人like嘅comment「好心你啲 屋村仔明知無錢，就腳踏實地搵份工啦，自己發明星夢，講到好似人哋逼你捱咗5年咁.....」。我唔知坤哥係唔係只係想做明星定真心想唱歌，但呢個comment，令我明哂大眾對窮人講夢想嘅睇法..... 「你又唔係JUNO，講咩實現夢想姐，你係唔係on 9 架，無錢點實現夢想呀？」。你窮，就算你有咩理想都千其唔好同人講，喺香港，你要朝九晚六搵食，搵到食你先好喺晚九朝六用錢來實現夢想。
※※※※※※※※※※※
今日見到好多人喺cliffy 個度留言講加油，我唔會話呢啲加油唔重要，都係一種心靈support，只係呢句加油對cliffy 來講，可以話好廉價。呢一年來，好明顯大家都唔太踴躍咁買佢嘅創作品，佢嘅收入唔足以support 生活，先返去打工。cliffy 一年以來努力掙扎求存，大家都唔太關注，到佢捱唔住，大家就出來講「好sad，好唏噓呀，香港創作真係搵唔到食架」。
我覺得呢個情形就係「你真係好可憐，我同情你架，但我唔會幫你架，我都無能力啦......」。或者大家就好似欣賞梵高咁，「佢唔死，未去到絕路，無咩值得欣賞架喎......佢成為一個悲劇我先欣賞佢嘅才華啦，我等緊佢死架」
※※※※※※※※※※※
其實大家都有能力幫創作人架......
早兩日，有朋友見我出書，佢問我「有無得送返本俾我呀？」，然後仲有人問我「買多有無discount？」......我真係好想跳樓死。其實你哋知唔知作者嘅收入係低過拎綜援架？一本書用幾多時間寫？一本一百幾十蚊嘅書，你食個紫薯芝士綠茶乜鳩都一百幾十啦，你去食呢啲垃圾紫薯芝士綠茶乜鳩，會唔會叫人俾discount？你仲好意思叫我平啲，係唔係想我變下一個「餓死嘅陶淵明」？
你哋如果真係支持任何本地創作，鐘意嘅，拎一百幾十真金百銀出來俾個創作人維生啦。創作人真係唔係植物來架，我哋唔可以透過光合作用製造飽肚嘅感覺架。
其次，個啲廣告潔癖撚，我好明白你哋啲心路歷程，即係你睇youtube，有啲 video 真係好多廣告，你好撚忟。喂，咁個Youtube 免費俾你睇架嘛，你咪捱咗啲 廣告囉，再唔係你咪click skip ad 囉，嘈咩姐？免費都要屌人有廣告，人哋食風架？開把風扇對住個口吹就飽過食buffet 咩？有啲 錢係要俾人賺架嘛。
再來係，如果你係做開廣告，你鐘意邊個創作人，就麻煩你哋盡量sell 俾公司，你鐘意得，即係佢有市場價值，一個創作人有廣告，先有得繼續創作你哋鐘意嘅野。
最後係，個日我睇一念無明，好記得曾志偉一句「我哋唔係要你幫手，我只係想你哋唔好踩多兩腳姐」，如果你覺得創作人唔打工係不務正業，唔緊要嘅，我覺得生物多樣化，大家想法唔同。但請你做返個君子，唔好口出惡言，屌創作人on9，唔向現實低頭，不切實際。我哋想要返份尊嚴姐。
PS. cliffy，我真誠地希望你一齊安好，我會真金白銀咁買你嘅作品。共勉之
