【玻利維亞最美荒源｜活在當下想去就去啦，唔好等到世界末日】
事隔近兩年先執到玻利維亞相。無它，我智利、秘魯、哥倫比亞都有好多紀錄，又有寫旅行日記，但玻利維亞真係兩眼昏花，眼睛去緊旅行、體力都撐唔到幾多。
因為呢三日完全冇任何網絡，加上個景靚到你根本冇時間拎手機，夜晚又同班團友圍埋玩card game－－我好鍾意同世界各地唔同地方嘅人玩card game、對住個火爐睇民族舞，充實到一個地步，我連旅行日記都冇寫到。
然後，我一到Uyuni就俾人反鎖廁所，繼而巴士無啦啦去咗第個地方，半夜俾人掉低咗喺路邊，天寒地凍唔識西班牙文搞咗一大輪，終於上到車，結果一鋪去到高海拔差啲缺氧。係就係好靚呀，但三日冇沖涼又意外頻生，仲要幾乎冇訓覺睇完星空睇日出，接住浸喺冰水睇天空之鏡日落，焚燒青春，累到hihi。
所以，呢幾日係我行程睇過最靚風景，但係我唔得閒記低，今日睇返唔係好記得咩名，不過睇住一張張唔駛tune都好治癒嘅相，幾紛亂心情都平伏返。
近期呢度又唔去得、果套又話封關，短期內你真係想去旅行，都唔知可以去得邊度。世界那麼大，其實有好多地方，都唔應該、兼唔好等到老先至去，例如早前澳洲山火，又例如早排話復活節島Moai風化情況好嚴重，世界變得太快、人類正步向滅亡，好多嘢你就算有命老咗去睇，風景都未必同今日一樣。
下次下次下次大概可以，我原本真係打算儲夠錢，明年再去埋南美餘下拼圖，依家呢個時勢工又冇，同埋，明年世界末日未都唔知。執住相，睇吓情況啦。
有關呢堆相嘅景點，可以睇留言連結介紹。
‼最後機會‼小弟執筆之原創小說已賣剩最後一批，售完即止，請即訂購：http://bit.ly/2PKXYFA
【IG請follow】www.instagram.com/travelerwithmovie
