【少甜慎入】女朋友畀綠帽我戴－大學篇（1)
是咁的，大家好，又係我Matthew，上次同大家講過一個綠帽故事，今日忍痛繼續。
認真投入一段愛情，結果發現佢恐怖嘅一面，平時一臉純真嘅佢竟然斷正偷食，令我對愛情失去晒信心，去到大學先再鼓起勇氣，發展人生第二段感情。點知⋯⋯又係仆直收場。
今次會分開一篇篇寫，等大家唔使一次過睇成萬字。
第二段故事開始。
上次分手後，無晒心情溫書，但可能個天可憐，又畀我負負碌碌拎到14分升中六，再搏多兩年入埋大學(非三大)。
上次女主角係Yuki，今次叫Samantha。佢唔再係著住校服裙嘅怕羞女仔，而係長裙文青風嘅少女打扮。
我同佢嘅認識，喺大學宿舍。有人話只要一個陌生人見三次，你對佢嘅戒心就會減低。
好幾次去上堂，我都同Samatha撞到正，到咗第三次，佢同我點點頭，笑咗一笑。呢一個笑容，對於失去晒信心嘅我，好似對愛情有返少少希望，呢個世界仲有純情嘅女仔。
第四次，佢話我聽佢叫Samantha。
第五次，佢話我聽佢讀中文系。
第六次，我問，不如一齊去食Lunch？
佢又笑住咁點點頭。
同佢一齊行去Canteen嘅一段路，好似係呢幾年嚟最開心嘅時間，雖然之後會係一個悲慘嘅結局。
佢：係呢，咁你讀咩科？
我：英文。
佢：咁你英文咪好叻！
我：OK啦。
佢：你平時有咩做㗎？
我：都係瞓下覺，冇乜特別⋯⋯
平時我一定會好花心思去同佢傾偈，但呢刻嘅我好似已經唔識同女性相處。每講一句都諗起以前拍拖嘅情境，一直以嚟都係令自己忙啲唔好亂諗嘢，當你花盡晒心思去一個人度，好似已經冇力再重新開始。
不過Samantha好好人，一直搵話題同我傾，係咁同我講佢嘅事，所以我都同自己講：喂，咪再咁頹廢啦，人總需要勇敢生存呀，於是擔返主動權，好熱情咁同佢傾落去。
傾傾下，佢話：「一陣冇嘢做，不如一齊出去行下？」
我有少少覺得一切嚟得太快，但世事可能就係咁話唔埋，唔好諗太多了，所以我答佢：「我都冇嘢做，等我換件好少少嘅衫先出去？」當時我只係著住件Camp Tee⋯⋯
「咁15分鐘後，Hall樓下等？」
換返件恤衫，Gel返好少少個頭，我望住塊鏡叫自己唔好再諗以前嘅事。
見返Samantha，佢都換咗Look，一件T恤加一條短裙，大概有165cm高嘅佢，對腳好修長。
「望咩呀！行啦！」畀佢發現咗。
入到大學，見到咁多女仔，當時只係心諗：這些機會⋯⋯而今日，幸運兒終於輪到我。巴士上面，我唔再單丁一個住兩人位。
客套嘅閒談就唔同大家詳述喇，佢有兩個細妹，天蝎座，拍過兩次拖，依家冇男朋友。
佢：咁你啦？一定拍過好多拖啦。
我：一次咋⋯⋯
佢：唔信，拍咗幾耐？
我：幾個月。
佢：個女仔點㗎？
我：算啦，過咗去嘅唔想提喇⋯係一次好差嘅經驗。
呢個時候，佢哄到好埋咁話：「講啦，點差法呀。」我同佢只有幾CM距離，佢好似噴咗香水，突然間咁近距離接觸令我紅都面晒、心跳加速、唔知講咩好⋯⋯
我：咁妳呢？
佢：都係好差。
我：點差法？
佢：畀我發現佢識咗第二個女仔，仲要醜我好多。
原來，佢都係同路人，聽到佢咁講，我覺得放心好多，佢應該會係一個好女仔，因為佢都身受其害，應該會專一。
所以，我都拋開珈鎖，盡情同佢講晒之前我遇過嘅不幸事件，點樣大大頂帽由頭笠到落腳。
佢：你都好慘喎，依家仲有冇聯絡？
我：我已經Block晒佢所有嘢，一眼都唔想見到佢。
同病相憐，令我哋更加投契，成餐飯都同大家盡情傾訴，同佢講晒出嚟，好似舒服好多。
我覺得，人生嘅新一頁，即將會有個好開始。
點知，返到宿舍，唔單止係一個新開始，仲係一個意想唔到嘅重大進展。
佢：「我同房唔喺度，你嚟唔嚟飲下酒同睇戲？難得我哋聽日都Day-off，咁早瞓好悶啫！」
如果我係喺高登講呢個故事，一定會有好多巴打話：吹水嘅、FF少陣啦、又一個思覺失調、咁大個人咪幻想咁多⋯⋯但眼前嘅畫面唔係發夢，就連我自己都唔敢相信。
佢呢一句講得好自然，令我覺得係唔係我自己太大驚小怪。唔再係中學雞，入到大學就係咁即食㗎啦，仲慢慢談情說愛？你只係需要諗去定唔唔去⋯⋯
Samantha住4樓，我住8樓，當架𨋢去到3樓嘅時候，我畀咗個答案佢⋯⋯
（待續）
－－－－－－－－－－－－
希望大家仲記得呢個故事，希望仲有人想睇啦！
返工好忙，好難先抽到時間打文，但我會繼續嘅，
而呢一篇會同上篇一樣咁Hurt，大家要有定心理準備。
打文好困難，回憶好痛苦，上次大家都慷慨哋畀咗400個Share我，
小弟今次要求唔多，100個Shares就夠(愈多愈快)，當係悲慘中嘅一個鼓勵啦。
夠數就下一篇，唔夠就眼淚在心裡流算了。
謝謝你們。
如果你想睇返上篇，可以去呢度：http://bit.ly/2eXz4P7
FB: 莎比亞
IG: sapeiar
怕羞女仔 在 點知個女仔係怕羞定唔想睬你？ - 港澳感情事 的推薦與評價
... <看更多>