關於 惠康 新 logo ，我們在網路上蒐集到這些相關的討論、資訊與評價

你哋食出前一丁鍾意夾咩配料？日式叉燒？火腿？五香肉丁？

以前同阿媽一齊住，最怕聽到佢講：「煮個麵你食吖。」唔係唔鍾意食麵，而係佢會將食唔晒嘅餸擺晒落碗麵度，你明唔明呀，想食麵係因為阿媽啲餸失手，但你煮個出前一丁畀我，又將啲餸擺返落去，咁有咩分別呀......

突然講起出前一丁嘅配搭，因為早幾晚見到一位朋友post相，佢夜媽媽喺屋企煮咗個鮑魚出前一丁，你冇睇錯呀，真係大大隻鮑魚擺落碗麵度，搞到我愈睇愈肚餓，屋企有出前一丁但冇鮑魚，你叫我情何以堪呢！

好在打開廚櫃一睇，人生仲有希望，我有 #出前一丁北海道小麥粉豬骨湯味 同埋 #出前一丁北海道小麥粉黑蒜油豬骨湯味，呢個「北海道小麥粉」系列之前得麻油味，即刻試新嘢啦！個人好鍾意黑蒜油豬骨湯味呢款，因為佢加入咗炸蒜粒，湯底香味大大提升，另外個豬骨湯味就加入咗紅薑粒，湯底層次又係另一種昇華。

湯底掂，個麵當然要有卡士啦！同上年推出嘅「出前一丁北海道小麥粉麻油味」一脈相承，麵條採用100%北海道產小麥粉製作，色澤更金黃，口感亦更煙韌彈牙，散發甘甜麥香。

話明食麵食麵，出前一丁先至係主角，配料要乜都好，其實只係錦上添花，最緊要湯底同埋麵條高質吖嘛，快啲去惠康、百佳、Aeon、Donki同埋759等各大超市入手啦，睇下你鍾意豬骨湯味多啲，定係同我一樣大愛黑蒜油豬骨湯味吖，識唔識分北海道小麥粉系列同港版日版之間嘅分別先？好易睇㗎咋，見到包裝印有金色小麥同埋金色北海道地形圖案分列左右，兼有紅色「100%」喺中間嗰個logo標誌，呢款就係「北海道小麥粉」系列喇！

好想知大家有咩喜好，分享下你食出前一丁鍾意夾咩配料吖！

#出前一丁 #北海道產小麥粉 #豬骨湯味 #黑蒜油豬骨湯味 #紅薑粒 #炸蒜粒

［合久必分，分久必合］兩間怡和互控N年，快將又成為歷史。之後只會得返Jardine Matheson

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，3月中開始失業。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80

1. 慎防後生嘅唔識，怡和（或稱渣甸）下面有一大抽東西，比較出名嘅當然係 牛奶國際（包埋美心 萬寧 惠康 7-11，唔止香港添，不一一細數），置地，文華東方酒店等等。有冇發現成抽嘢都冇在香港上市？在新加坡。說來話長，但當然都同當年97回歸有關（仲有，再再再之前渣甸在中國嘅業務全數被新中國收歸國有的）。

2. 但即使只講怡和，都實情仲有兩間上市公司，固然都係在新加坡。就係圖入面呢兩間，一間Jardine Matheson怡和洋行 J36 （坡仔曲）或者叫 JAR。另一間Jardine Strategic 怡和策略 J37或叫JDS。（其實仲有間怡和合發C07，但細好多）

3. 咁堆乜鬼 置地／文華／牛奶在邊？就好問題了。理論上，就應該係在 JDS入面。實際上？都有點……複雜。是但啦。因為JAR 同 JDS 交叉持股，仲要互相都渣超過50%，人形蜈蚣咁，邊個係頭邊個係尾都唔知。實情JAR渣住JDS 85%，然後JDS又渣返JAR59% —「計啲股權值幾錢就要整個 無限嘅 Geometric Progression 了，S= a/(1-r)」（是真的）

4. 呢抽咁嘅人形蜈蚣點整出嚟？亦係說來話長，但有返咁上下年紀都知，係防止其他人狙擊，等蘇格蘭佬可以不受威脅

5. 怡和個logo正係蘇格蘭國花，而Keswick家族亦蘇格蘭人，留意w是唔發音的。所以係凱瑟克，唔係凱瑟域克甚至凱瑟沃爾克。至於點解會由 Jardine家族變咗Keswick就比較複雜了，包玉剛同吳光正咁上下，Jardine有人娶咗Keswick家嘅女，之類。

6. 咁但，合久必分嘛。呢啲咁嘅交叉持股，學者屌足咁多年。OK蛋頭學者窮酸冇錢，咁事實美國投資者都屌足咁多年，絶對係corporate governance 公敵。日本啲公司你渣我5% 我渣你5%已經係咁媽，何況兩間嘢互渣超過50%？

7. 於是乎，唔知做乜，忽然良心發現。咪話JAR渣住JDS 85%？而家買埋嗰15%。即係變相私有化（又，有冇奇怪，點解渣住85% 都可以上市？冇public float？不負責任嘅答案係：新加坡嘅嘢。負責任啲嘅嘢：大公司有exemption啦），畀現水呀下，幾好，55億美金之嘛。出33蚊一股買JSD，溢價20%，咪好咯。之後只會得返一間怡和，亦存在咩互控，JDS 呢樣嘢會消失

8. 留意JDS一升就升到32.8，收購價只係33蚊，即係必然搞掂？雖然，都仲要舉下手咁嘅，而好似有啲小股東會反對的。繼續花生

9. 今次JAR買起JDS嘅原因？官方解釋：預料有關收購可簡化集團公司架構 ，提升營運效率。「即係貴集團過去N咁多年都係冇營運效率的？」

10. 點解係而家？唔知喎，即管發揮你嘅維園阿伯式陰謀論咯。唔知呢。但的確咁做之後，理論上又會有機會畀人狙擊。為乜？唔知喎。不過話時話，嗰33蚊，都仲係同淨資產有20%折讓的。

11. 留意同系嘅牛奶國際都升咗8%。買到坡股嘅，不妨諗下文華同置地。當然輸錢嘅，搵李光耀賠畀你啦。

12. Keswick家族到底渣住幾多怡和？答案係……唔知。請define「家族」先，N咁多房人，正如你間李氏家族渣住幾多東亞，但班遠房親戚根本唔係一致行動人士（呢啲就問證監啦，反正大劉同細劉都唔係一致行動人士，咁事實真係唔係喎，唔通一條女兩份上？）。公司就話43%，但有人話大約係17.5%— 而你見到了，正係因為交叉持股，所以渣咁少都可以控制住間公司。幾咁狗。

13. 不過，正路地，又唔使驚Keswick家族會畀人趕出去。唔知係咪恰當嘅比喻，但你見李國寶之前都一路有得玩，佢公子都仲有得在東亞玩啦。但大股東？你話呢？一路有人話東亞係「港資」銀行，我心諗乜港？巴塞羅那港定橫濱港馬六甲港？你上港交所睇下大股東乜水？港乜資？西牙日本馬來西亞美國我都見，就係唔見港資。

14. 定東亞個CEO香港人就港資？咁港交所係克羅地亞資定阿根廷資？「定香港註冊就港資？」「咁中國移動941係咪港資？」（你又可以上聯交所查下941在邊度注冊），「毛記葵涌係咪開曼群島資？」

15. BTW，怡和大廈大家知（都係叫康樂大廈甚至渣甸大廈夠親切夠英殖），怡和街 渣甸坊大家都知，但銅鑼灣仲有好多地名都同怡和有關。有名你叫Jardine Matheson，當然包括勿地臣街，怡和大班。百德新街同埋波斯富街都係怡和大班（你以為係波斯王子？）

16. 不過最有趣嘅係，好短嘅敬誠街。敬誠是甚麼？正是Keswick，拿，敬誠呀，冇w的。你睇香港人嘅英語水平幾高！不過條街之前係叫……奇士域街。即係同梳士巴利道 vs 疏利士巴利道（＊）一樣。不過春園街仲係春園街，緬甸台仲係緬甸台。

（＊）關於疏利士巴利道，應該有人估到，我想講……王家衞。《2046》入面，王菲多次提到「疏利士巴利道」，有啲友仲以為人地大陸妹唔識嘢。實情故事嘅年代，就係叫「疏利士巴利道」。王家衞喎大佬。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折