關於 意大利u21足球 ，我們在網路上蒐集到這些相關的討論、資訊與評價

【是離別, 也是相遇】

先不說「移民」, 但對於「在海外生活」我還是一點都不陌生, 因為我18歲時就在意大利獨自生活了一年, 我當然不是什麼「移民KOL」, 但也算是半個「過來人」, 就分享一下我當年的情況, 也許可以給朋友們一些海外生活的小鼓勵。

我好記得自己在來到意大利的頭3個月是異常難頂:

1) 語言不通: 我的意大利文是來到意大利才學的, 之前是一句都不會, 好像怎學也學不會 (因為我覺得意大利文實在係一個好蠢的語言), 還好當時有2位好照顧我的老師, 他們自願留下來跟我談天, 給了我一定的支持及鼓勵 (對! 我是那種不受罵的一套的, 但你用鼓勵我會好接受)。所以到英國的朋友基本已經沒有了語言障礙。

2) 沒有朋友: 更不要說會說中文的朋友/同學, 日本同學倒是很多, 但問題他們的英文比我更水, 所以只是從「樣貌」上的接近而得到一些安慰, 事實上也須要用意大利文去溝通。後來比較好, 因為來了一位台灣同學, 也有個西安傳教士 (不知他現在如何), 又, 我在溫州餐館混熟了 (每星期光顧至少2-3次), 甚至可以進廚房自己煮食。現在到英國的朋友多是一家大細的, 更不會有此心靈的寂寥。

3) 全新環境: 我到意大利生活之前, 最遠只到過上海南京交流團, 雖然我從小就幫家裡做菜, 自己照顧自己的問題不大 (特別煮食上), 但始終四周東西都是全新, 加上最初都是看不懂, 又不知有什麼娛樂, 所以難免小小恐懼及悶氣 (時常聽說意大利治安好差)。但今時今日科技大改善, 尋找資訊太方便了, 世界大同, 彼此生活上已經沒有以前那麼明顯及巨大的區分, 所以到英國的朋友在適應上問題比以前細好多了。

我自問都算是個心態極積極的人, 但3個月以來發現鬥志也愈發消沉, 真的頂不順, 那時我跟一位足球雜誌的總編有些書信交流, 也從中說到自己一些「苦況」, 這位總編絕對是我這18歲迷茫階段中的一個指導, 好記得他跟我說:「能來到意大利留學機會難得」「嘗試用心, 去感受, 去學習, 去接受身邊所有新的人和事」, 就是他這2句說話令我有種覺醒: 與其消極及不開心地面對, 為何不放開自己的心, 給自己一個新的生活, 給自己一個新的成長, 給一個全新的自己?

- 我開始每個星期六日都去背包旅行: 第一個目的地是Pisa比薩, 什麼地圖什麼資料搜集都沒有, 膽粗粗第一次去火車站買火車票(那時還沒有什麼自動售票機), 所以除了Firenze佛羅倫斯, Pisa對我而言是個特別的存在。

- 我開始做更多的運動: 加了一支當地足球隊U21, 踢球會及學校的友誼賽 (那時的我應該是最Fit的, 現在就...)

- 我開始參更多學校的課外活動: 去參觀不同的美術館/博物館, 參加烹飪班等。

- 我開始閱讀更多有關意大利的書: 既是為了發掘更多的旅遊目的地, 也為了認識更多這個國家, 這個我還要在此生活好一陣子的國家。

- 我更加努力在皮廠中工作及學習: 這是為了留學之後的路。等等。

就是這樣, 我在意大利活下來, 來回地獄又折返人間, 直到現在。決心跟心態, 其實比起安排及計劃更重要, 從2019年下半年開始至今的種種, 難道還不足夠令你有這個想法?

共勉之。
Sharpe Law
2021年6月隨筆

［文化］羅馬尼亞越多「斯古」越好波？

任你點講，大家都係留意美洲國家盃，或者U21歐國盃，甚至J League，多過女子足球世界盃。根本係咁推嘅嗰啲友自己都唔睇。

講返U21歐國盃（寫呢篇文時踢完頭兩輪），羅馬尼亞U21足球隊今屆表現相當不錯，頭兩場已入8球，兩場已經出線，擊敗嘅對手係克羅地亞同英格蘭。世界圍住佢轉嘅當然只留意英格蘭大敗，或者今日先發現原來一代名將，所謂嘅「東歐馬勒當拿」赫傑，個仔小赫傑，都入咗國家隊 。

（又其實赫傑係 Maradona of the Carpathians，因為保加利亞嘅史岱哲哥夫又同時係「東歐馬勒當拿」，嗰個年代個個都係乜乜馬勒當拿，正如高比拜仁又好Grant Hill 又好個個都係新米高佐敦，同時後來又有德國奧雲迪斯拿印度奧雲中國奧雲，而家就有德國美斯馬連同埋日本美斯）

小赫傑第一場入克羅地亞波後，呢場又對英格蘭入波（http://bit.ly/2Yd7ClS）。呢場波十分痴線，最後最後15分鐘入6球，英格蘭兩度追平。同場加映當然係大賽必備嘅英格蘭龍門派膠。

羅馬咁勁，梗係留意有乜人在陣啦。唔識好正常，羅馬尼亞U21咋，咪認到赫傑個仔。仲有個名普斯卡斯，不過同匈牙利球王無關。

但我留意嘅除咗係有條友姓Ivan （其實1964同1994代表隊都有，唔知係咪爺孫父子），但另外就留意到嘅就係……
做乜一件「斯古」 都冇？

正如韓國多金多朴，越南人人姓阮，波蘭多斯基（2012歐國盃揭幕戰波蘭對希臘，絶對係講波佬惡夢），冰島多臣俄羅斯多夫多娃，咁羅馬尼亞，出名多「斯古」。

我等老嘢，應該記得當年羅馬尼亞好多「斯古」，做乜而家冇晒？一件不留。留意係姓唔係名，冇理由同潮流與改乜有關，畢竟改姓嘅人好少。唔通多咗移民？但就咁望又唔多似。

另一理由可能係，根本當年都唔係咁多「斯古」。都有少少孟德拉效應，望返，老嘢如我睇赫傑嘅1990 或 1994，其實大半隊都唔係「斯古」。

只係咁啱，斯古嗰幾件又好似特別出名，又好似好波啲，又好似多啲出外。樸比斯古，盧比斯古，杜米迪斯古，彼特斯古，仲有教波嘅 艾奧丹尼斯古（佢踢波年代一樣名將，布加勒斯隊拎歐聯冠軍添，但再早啲了）。當然仲有冇踢波但鍾意睇波最後個頭畀人當波踢嘅，壽西斯古。

但又到另一問題，係咪叫「斯古」嘅家族好波啲？定有錢啲？做乜佢地特別出名特別外流？定只係咁啱啲姓＂聽落＂差不多先有咁錯覺？反正 赫傑 列度斯奧 摩度雲 伊利 等等一樣都外流，沒有「斯古」。

科學少少，數一次，我睇晒歷任咁多隊踢大賽嘅羅馬尼亞隊嘅名單，唔計教頭。係有偏差架啦，踢大賽又唔代表所有足球員，足球員又唔代表所有羅馬尼亞人（等於你諗下，德國隊中嘅黑人比例，肯定多過全國）。但舊文話齋

鳩up最簡單，最撚好廿蚊有靜岡蜜瓜你食。但我地落手落腳寫文或做研究嘅，永遠係簡單／準確／快手之間拎個平衡。

結果如下，唔係講笑，原來史前係真係冇乜「斯古」。係真係去到阿叔睇波年代先忽然暴升，果然係嗰幾個「斯古」好波啲。打後就冇乜「斯古」

有睇開波嘅你，見到個圖仲諗到乜？就係，根本呢個圖，同羅馬尼亞足球隊國運，係差不多嘅！一樣係8/90年代開始上力，去到2000年無以為繼。當然，其實都可以話，係因為嗰幾位「斯古」好波

下面呢張圖係國際足協排名，93年先有，反映唔到最初上力嗰浸，但反映到2000年冇力嗰浸

而信不信由你，見唔見到羅馬尼亞排名，由2010開始反彈？發生乜事？登登，睇返上面個圖，「斯古」在2008去到谷底，之後就反彈！完全一致呀喂！

（但，其實只係由0變到1，仲要只係因為艾奧丹尼斯古教波啫，踢嘅一樣一個「斯古」都冇，正如今屆U21都冇一個係「斯古」)

無論如何，而家人名真係少咗「斯古」，就似乎係真的。睇下有冇高人講到我知點解。係只係咁啱足球隊入面少咗（因為多咗移民？），定真係全國都少咗？似係前者。

睇多少少，根據維基，其實乜乜「斯古」仲係好常見嘅姓，但呢個調查都十年前咁滯。不過又搵到羅馬尼亞仔講嘅四十大姓，都仲有好多「斯古」（http://bit.ly/2Yg802E）
另外，一如所料，乜乜「斯古」，同斯拉夫嘅乜乜「斯基」乜乜「域」之類一樣，都係代表邊個邊個個仔。留意，十分重要，羅馬尼亞語係羅曼語系，唔係斯拉夫語，十分獨特，同意大利文法文葡文西班牙文同源（事實上東羅曼語系就死剩佢地）。

佢地十分自豪十分執著，至少我在羅尼尼亞啲友係咁講，佢地亦都唔認為自己係「巴爾幹人」，「巴爾幹人」係隔離班成日打交嘅生番。正如克羅地亞人都唔講自己係「巴爾幹人」，原因同上，但克羅地亞語都係斯拉夫語系

有關羅馬尼亞足球，仲可以睇下著名羅馬尼亞電影新浪潮導演 Corneliu Porumboiu嘅 「陸軍對警察：二次開波」 （The Second Game ）(http://bit.ly/2YgpzzC)。此人之前套 「布加勒斯特以東午後八分」12:08 East of Bucharest係電影節偽文青恩物。信我，呢套 「陸軍對警察：二次開波」 （The Second Game ）十分精彩，你想像唔到當年在電影節上，完場時觀眾嗰種無力感。

我都寫過篇影評，但信我，劇透咗就冇意思(http://bit.ly/2Y8RdyD)