【多謝各位支持！】
先講聲唔好意思，派飛有少少混亂，有幾個座位處理上出錯咗，非常抱歉，特此致歉。
首先我要重申我冇喊，純粹諗住時間充足準備咗好多嘢講，有埋答問兼遊戲環節，點知最終都係遲咗，我腦海一片空白，所以講嘢一舊舊都窒窒哋咁，大家唔駛逐個Inbox問我做乜喊。
Any肥，我相信點講大家都唔信，反正我不嬲都感性L，你就當我喊🤣
言歸正傳，都係要喺度多謝你哋嘅支持，如我開場所講，都係我過去一年最深感受嘅。多謝你哋睇咗咁多年都不離不棄，過去一年我唔可以keep到日日有嘢寫，連寫延期片寫戲院關門都寫到冇嘢寫時，你哋都冇unfollow我，同大家關係一直由online走到落offline，我諗係過去一年大家互相扶持嘅最深刻回憶。
呢一壇嘢今年有好多意外，開頭真係以為搞唔成，好多流程上溝通上嘅嘢，令我有唔止一次想放棄，屌，咁鬼煩搵著自己嚟煩，而今年銷情後繼唔及舊年，都搞到我好緊張每一日睇住條數。但係，正正因為舊年嘅事，我明白到不要相信一切有下次，都唔好覺得樣樣嘢真係有下次，既然做得到不如就去做啦。
當你過去呢一年，每一日都聽到戲院末日、戲院將會喺2021年內消失時，自己曾經會覺得，舊年係咪第一次都係最後一次呢？今年係咪會搞唔到？咁，不如冒住蝕到癲風險都去搞啦！唔好後悔。
點知，最後大家幫我撐到盡、有超過300位觀眾，原本我諗住頭三行hold起，竟然可以賣到落去，同日同時間戲院都未必做到呢個效果，多謝你哋呀！🙏🏻
然後，再一次喺大銀幕睇到Marvel個字出嚟，你會何其激動，而過程中大家嘅反應都好好時，真真正正嘅Cinematic experience，返返嚟喇。我好感動嘅係，99%觀眾真係坐定定，去到最後最後一刻，可以集合到咁多人坐定定唔走，我喺下面望住大家，呢個畫面好靚。
感謝每一位支持我嘅你、感謝仲相信電影嘅你、感謝仲會入戲院嘅你。
散場有讀者朋友話，不如唔好一年一度，得閒搞多次細場啦。
可以嘅，但俾我抖抖先，我三日冇訓超四個鐘。
有朋友笑言，你成功搞咗一個人的婚禮，一個人搞曬一切嘢，然後又一個人送客，well, maybe, still enjoy。
但係，背後都有好多人幫助嘅。
多謝每一位幫助我嘅朋友，特別係幫我坐Reception table同影相嘅幾位，辛苦曬，都要多謝各位業界朋友喺咁危急關頭拔刀相助，last but not least，十萬個感謝 Golden Harvest 嘉禾院線 同海運戲院幫助，令呢一件事可以咁流暢完成，直頭連我都有驚喜（我真係今日先知有海報送）。
其實我純粹抽出面水牌水，人哋係神，我路過架咋🤗估唔到真係咁多人走埋嚟同我影相，書展之後好耐冇試過喇，多謝你哋😍
舊年出席人數係181人，今年係302人，明年如果大家仲喺香港，可唔可以再多啲？其實三百幾人我已經情緒緊張到極致，如果一年之後一切回復正常要我打爆五百幾個位，應該係情緒失常。
＝＝＝＝＝
講起情緒。又，就著我開場段speech，散場好多人轉介心理醫生同情緒輔導俾我，好多謝你哋關心，我真係走返出嚟冇事架喇，其實我尋晚咁講，都係希望用自己故事，令大家學識去關心身邊人嘅情緒健康－－我發現身邊好多人都過得好唔開心，而身邊人係唔識點處理。一年前嘅包場係好成功，只不過我冇表露出嚟，果段時間，係我一生中最低潮時刻，我係曾經depress到三日三夜冇訓過覺，我咩療法都試過，我覺得我就嚟死。
其實，要走返出嚟，唔係靠咩療法靠咩藥物，而係靠你自己本人，同埋身邊人嘅關懷陪伴。
姐係可能好多時你覺得人哋放負、你覺得人哋講嘢無聊、你覺得自己係全世界最忙，條友又求關注得閒先理佢啦，係，可能真係，我諗返都覺得自己可能一年前好撚煩，都喺度多謝身邊朋友嘅陪伴。
但其實，你嘅一句說話，真係好簡單一句說話，令對方覺得佢唔係alone、佢唔係對住空氣講嘢、佢有你同行，已經好足夠；都唔好求其講「嗯。係。哦。哈。噢。yes。ic」呢七字世上最絕頂廢話真言－－你唔係收緊兵唔係玩緊app唔該唔好講呢七隻字，一件事，可以從此改變。
陪佢食餐飯、同佢傾15分鐘電話、約佢一齊打個機，好簡單一件事，情緒可以大不同。唔係誇張，你嘅同行同陪伴，真係分分鐘可以救人一命。
