話說，我有兩隻貓，黑色果隻叫刀疤，金毛果隻叫辛巴。
刀疤好好彩，一生出嚟就有我接收，唔洗過流浪貓嘅生活，但佢好活潑好動，成日喺屋企探索，打爛過一對麒麟，一部電視機，同埋會踩我電腦，將手機踢落地，後尾仲幫佢搵咗個細佬辛巴陪佢玩。呢幾年，佢哋有時會嘔，會瀨屎，會玩到成地都係毛，有時玩得勁會咬我，沖涼果陣會抓人。
但我都無打佢。
唔係因為佢係我養嘅貓，而係因為佢本身係貓，佢唔會為人類改變，天性如此，無得揀。貓係咁，狗都一樣，佢唔識用言語話你知佢嘅感受，唔知道上咗美容枱之後會遇到咩對待，唔知眼前呢位陌生人會唔會用手上嘅利剪對佢做啲咩，佢會反抗、掙扎，會扮咬你，直到放下戒心。之前去學寵物美容，有啲狗場嘅狗後腳好攰，會不停坐低令你剪唔到毛，會驚會震會周圍屙尿，佢哋唔係刻意同你作對，而係佢真係驚、不安、攰。
為咗令你做唔到嘢，佢哋甚至會嗲你，同埋扮喊。
你可以揀氹佢、俾時間佢，亦可以鬧佢、打佢。但請你記住，佢入嚟你舖頭係主人嘅意思，佢無得揀上唔上你張美容枱。佢被你打，亦無得揀投訴、報警、po上網。
喺佢無得揀，而你有得揀嘅情況下，你仲揀去打佢傷害佢，恃強凌弱嘅你仲有人性嘅？！
我決定繼續進修，做一個有良心有愛心嘅寵物美容師，如果狗仔真係唔ready接受我服務，我揀下次再做，因為我覺得佢都應該要有得揀、有選擇權！希望所有寵物美容師都一樣，希望主人都一樣。
#好憤怒 #好難過
#主人信任你先放低隻狗
#打狗就咁勇武 #又唔見你打人
#無耐性唔好做呢行
#無品呀 #無人性 #無良心
#老師教我哋可以休息一下再做
#份工唔容易㗎 #有排學啦
