講兩句VIUTV劇集《二月廿九》
（講明先，好多插嘅篇幅，不喜勿讀）
—
喺預知結果會失敗嘅情況下，
你仲會唔會為可見嘅徒勞無功而努力？
講《二月廿九》，亦講VIU TV。
—
由睇套劇嘅第一集開始，我已經諗起幾年嘅一套科幻電影——《天煞異降》，戲入面女主角用超能力預視到自己個十二歲嘅女會有不治之症，同男主角結婚之後會離異嘅將來，但喺故事嘅結尾，佢仍然鼓起勇氣去愛，有挑戰命運唔服輸嘅意味。
—
係宿命，定係人力勝天？如果命運一早已經注定，咁遭遇仲有無改變嘅可能？2017年嘅女主角YEESA穿越未來，發現2020嘅自己將會遭遇致命車禍，而十集嘅《二月廿九》，就講女主角同埋一眾朋友，點樣嘗試「逆天而行」，救返未來嘅自己。
—
故事有趣，有趣嘅點在於，要救未來嘅YEESA實在太容易。只要你唔去日本，只要你夠定力，而即使你去咗日本，只要你唔跟既定嘅命運去行，就可以扭轉宿命。
—
而故事最有趣嘅地方，亦都係故事入面最大最大嘅敗筆，劇集由第九集開始，劇情陷入災難。故事安排女主角爸爸中風入院，YEESA愛父心切，加上佢相信命運已經改變，不顧一切去札幌，不顧一切去推翻自己幾年嚟一直努力嘅嘢，去迎接既定嘅結局。
—
咁樣寫劇本法，唔係唔得。但高手嘅寫法，編劇一定係要說服到觀眾，YEESA喺呢個時間去日本，呢個鐘數用呢條路線去醫院，要有絕對嘅必要性，你要幫觀眾抹殺任何嘅想像同可能性，令宿命無可避免地再度重演。
—
可惜，故事並做唔到呢種感覺，點解YEESA會重演故事，只因為佢急住見爸爸，只因為佢擔心RYAN，只因為喺連番不必要巧合之下衍生出嚟嘅「命運」。
—
只需要早一秒，遲一秒，轉吓路線，甚至換件衫，紮起把頭髮，就足以改寫命運，點解個結局要寫成咁？而再去到尾，御守力量大發神威，比咗YEESA最後一次機會，救返自己，救返RYAN，但犧牲咗會長，配合平行時空嘅結局，毫無邏輯可言，直情亂嚟，仲要寫到女主角嘅性格變成咁，暫此不忍多贅。
—
咁，其實個結局可以點寫？
—
其實，最後一個拎住化灰御守嘅YEESA，係唔應該出現喺2017穿越到2020嘅世界，因為只要佢出現，一切都仲係喺命運嘅掌握之中。當你明知自己會失敗，而最終真係失敗咗時候，咁你又係咪會變得一無所有？唔係，最少喺呢段歷程當中，YEESA贏到RYAN嘅等待同陪伴，贏到會長嘅幫助，贏到神聖幾何嘅一班朋友，同埋閏蜜嘅支持。
—
當臨近結尾RYAN死咗嘅時候，YEESA發揮御守神奇嘅終極力量（當然之前已經要交代可以點用，例如其實YEESA嘅媽媽喺難產嗰時都可以選擇用嚟保住自己條命，但佢為咗個女佢選擇犧牲自己，而今時今日就係YEESA希望犧牲自己嚟救RYAN，御守係可以係作改變命運嘅終極工具）。而恰恰呢個工具，其實只係宿命嘅另一個圈套，YEESA再次穿越然後自願比車撞，返番入既定嘅宿命當中。
—
跟住又點？宿命睇漏咗余家聰呢個人，估唔到佢竟然會代替YEESA去犧牲自己，呢個唔係命運嘅安排，而係「人」「情」嘅變數。為咗所愛嘅人而付出，打破咗宿命，雖然係悲劇，但大家都突破到命運，YEESA並無死到。（我嘅推論可能會好粗疏，忽略咗原作某啲設定，見諒，但係因為最後兩集我真係睇唔落去，而以上劇情改寫只係可行嘅方向之一。）
—
「天地不仁，以萬物為芻狗」
—
係咪努力，就可以成功呢？既係，但又唔係。上天唔會偏愛努力嘅人，為佢哋帶嚟好運，所以即使YEESA有幾努力，但最後都係差啲死（如果無會長嘅自發犧牲），但另一方面又正正因為佢嘅努力，令佢同會長建立咗連結，最後突破命運。
—
努力唔一定會贏，但懶就一定會輸。薛丁格的貓，一日未打開個箱，你一日都唔會知隻貓係生定係死。就正如《二月廿九》，一日唔做嘗試，一日都會故步自封。雖然講咗套劇好多好多嘅缺點，但我認為佢係港劇入面一個絕佳嘅嘗試，起碼頭八集嘅水準都好高，更重要嘅係，佢喺偏離香港人睇開港劇嘅框架之下，仍然拍到一套受歡迎嘅作品，又係突破命定嘅一個最好示範。
