.
【7月號 關於生活專欄】
.
抗疫多時，閒人少見，難得有聚，話題總離不開愁雲，一係問「打咗針未」？似屋邨樓梯道友寒暄；再唔係就問「幾時移民」？好似挪亞方舟動物閒談。餐飯，味即時減三分；支酒，香味馬上揮發七成，好鬼掃興。
.
好在上天安排，此時有十六加一使者，唔知點解短時間轟入大家腦袋，令全世界笠口罩者，都可以擠出兩隻心心眼，隔住口罩都見到笑容，功德也，講緊當然係Mirror Error 與花姐。
.
喺文青雜誌講流行，至少半數看官睥睨斥俗，「俗」者，扮《說文解字》講，即「谷人氣」也，但今次我係用功能性嚟講佢哋。
.
話說小弟雙親都六七十歲，飲飲下茶都突然間講起姜B，然後繼而發現全香港嘅長者，都知道呢班人嘅威力（喂連過氣高官都衝出嚟講就係顯影劑），導致近來家庭和睦咗好多：老中青三代食飯係一齊討論，變返七八十年代電視送飯，追節目再翻睇，傾極唔厭。更甚者，係阿媽同阿女一齊去追星舉牌，完全凌駕一切學校親子活動；父子唔追偶像，但會一齊睇Error節目，一齊笑下死亡恆星，一下子，全家上下大樂，此情此景萬金難得，尤其於全地球灰暗時。
.
有人會覺得天昏地暗時，沉迷偶像娛樂，乃精神鴉片，其實都係，大家都知，不過就如二戰電影，戰場上血流成河，斷手斷腳又未斷氣時，點都要篤幾支嗎啡，等自己舒暢少少。人嘅精神健康亦一樣，有少少刺激劑去轉移視線減低痛楚，半步釘都起碼含笑先，喺亂流下感覺平安唔係一件易事，Mirror明鏡台，從來喺你心中嘅遙控器度，開就有唔開亦冇問題，菩薩本無樹，Error就如塵埃，你拂拭與否，最後都係觀返你自己個心。
.
——〈論鏡與錯誤〉
梁栢堅
.
七月號《藝文青》已上架，可在7-11便利店、OK便利店以及各大書報攤購買。
.
#梁栢堅 #專欄 #關於生活 #藝文青7月號 #藝文青 #asartisticasyou
文青雜誌 在 藝文青- 首頁 的推薦與評價
藝文青。 13133 個讚· 74 人正在談論這個。香港實體文化藝術雜誌· 逢單數月份上旬出版推廣文藝· 鼓勵閱讀· 支持創作——#藝文青9月號現已上架—— #試當真〈時勢造 ... ... <看更多>