《自己買飛入場，唔係廣告》
《媽媽的神奇小子》一套不得了嘅作品
睇完套戲令我諗翻起好多年前有一個痙攣嘅好朋友。
佢有一排因為抑鬱，所以我成日搵佢傾偈，佢同我分享咗好多生活小片段，喺度同大家分享～
每次食快餐佢都希望可以自己成功攞住個餐盤埋位，但係由於佢身體痙攣，所以10次9次杯汽水都會倒瀉，但佢堅持唔搵人幫手，靠自己完成，因為佢想證明自己嘅能力。
佢去面試嗰時最怕就係要填form，但由於佢控制唔到自己揸筆，所以每次填表都會寫到張紙穿晒窿爛晒，而每次寫到爛晒，就會俾人發覺佢身體殘障，最後連一個面試機會嘅都冇。
佢嗰時喺一間社福機構工作，負責照顧啲嚴重智障人士，佢哋嘅飲食都需要人幫忙，每逢佢哋情緒唔穩定，一啲「專業社工」往往因為自己嘅工作量增加咗，會好惡咁樣鬧啲智障人士。但相反我嘅朋友會好有耐性咁攬住佢哋，希望安撫佢哋嘅情緒，而多數佢都會成功，因為雖然啲嚴重智障唔識用言語表達，但佢哋感受到我個朋友嘅善意。
佢份工雖然人工唔高，但係好穩定，最後佢都係選擇辭職，因為佢抵受唔住身邊啲「正常同事」覺得佢係因為身體殘障嘅優勢，所以攞到呢份長工。我個朋友同一啲殘疾嘅朋友分享，佢啲殘疾朋友都覺得佢好傻，因為連佢哋都認為，以佢哋嘅背景根本唔需要打好一份工，因為就算佢哋唔努力，社會都會照顧佢，點解要咁蠢辛苦自己。
佢好想成為一個創作人，因為創作係用腦袋，而唔係用身體，佢可以用作品同正常人公平咁比拼，所以喺創作裏面佢搵到真正嘅滿足感。
殘疾唔好怕，殘酷嘅現實世界先係最可怕。
@zerotoherofilm
@sandrangky
