真實狼人殺（上）
意外，往往發生喺最平靜嘅日子。
嗰日我同爺爺、嫲嫲、阿爸、阿媽、細妹，一行六人，一齊去郊遊。
我哋玩得好開心，歡聲笑語，突然間，三個持槍嘅男人撲出嚟，惡狠狠咁用槍指住我哋。
阿爸舉高雙手講：「三位大哥，係咪有咩困難？需要錢？」
爺爺沉聲問：「有仇？一人做事一人當！放過啲細路。」
三個男人一言不發，其中一個收埋槍，拎出一堆麻繩，綁住我哋嘅手手腳腳。
另外兩個男人用槍指嚇，我哋都唔敢反抗，只好乖乖俾佢哋綁。
我不斷諗，到底發生咩事？心底仲有一絲僥倖，可能係電視台整蠱節目呢。
但係，當佢哋綁到十歲嘅細妹，細妹太驚，大聲喊咗出嚟，仲嘗試掙扎。
「唔好嘈！」男人一槍打落細妹隻腳度。
細妹呼痛，然後即刻捂住自己個嘴，眼中充滿驚惶。
望住細妹腳上湧出嚟嘅鮮血，我瞬間意識到，呢個唔係遊戲。
呢三個男人可能係劫匪，可能係變態，亦可能係綁架，無論點都好，佢哋真真正正會威脅我哋嘅生命。
被綁住嘅阿媽哀求：「可唔可以畀我幫佢包紮？佢先得十歲......」
槍口指向阿媽個頭，威嚇之下，阿媽唔再出聲。
我哋六個人嘅手腳都被綁住，其中一個滿面鬍鬚嘅男人笑嘻嘻咁講：「唔駛驚，我哋兄弟都係嚟郊遊，想同你哋玩個遊戲。」
遊戲......睇嚟我哋真係遇到變態。
「有無玩過『狼人殺』？今日我哋玩簡易版，我係你哋嘅主持人。」
我玩過，但好明顯爺爺嫲嫲一頭霧水，鬍鬚男就簡單介紹玩法。
我哋每人抽一張卡，四個人會係「好人」，兩個人係「狼人」。
所有人蒙眼，狼人睜開眼，選擇殺死一個人。
然後大家都睜開眼，一齊討論，估到底邊個係狼人，並且投票，得票最多嘅會被處決。
狼人當然會聲稱自己係好人，誘導大家投錯票。
呢個流程不斷重複，直到好人死晒，或者狼人死晒，遊戲結束。
「呢個妹妹咁細個，又受咗傷，做唔到狼人㗎啦，畀佢做好人。」鬍鬚男將一張「好人」嘅卡放喺細妹面前。
然後，佢拎住五張卡，逐張抽，喺每個人面前揚一揚。
「睇到啦？每人都記住自己係咩身份啦？」
鬍鬚男講：「今日『好人大特惠』，我先畀你哋討論，投票處決一個人。」
我哋六個人都無出聲，默默望住鬍鬚男。
「怕我哋偷聽？好啦，兄弟退後啲。」
鬍鬚男揚揚手，佢哋三個退後幾步，但都注視住我哋，手上嘅槍依然無鬆懈。
我細細聲問：「佢哋係咩人？」
「衰人！」細妹帶住哭腔答。
爺爺沉吟咗一陣：「領頭嗰個，個樣有啲似我當年嘅一個仇人。」
阿爸好焦急咁問：「所以係你仇人嘅仔，帶人嚟復仇？」
「我唔肯定。」爺爺嘆氣：「不過佢哋一定唔係善類。」
唉，係人都知佢哋唔係好人。
阿媽咬咬牙：「我哋要團結，一定可以度過難關。」
我點頭，又問：「一陣要我哋投票，我哋應該點算？」
「棄權！睇吓佢哋會點，話唔定捱多一陣，就有人路過見到我哋。」阿媽答。
阿爸低聲建議：「不如我哋搵機會反抗？」
「唔得，佢哋有槍，我哋又有女人又有細路，點走得晒？」
阿爺反駁：「不如睇吓佢哋想做咩，未必會殺人嘅。」
嫲嫲點頭，我就隨口問：「妹妹係『好人』，啱啱邊兩個抽到『狼人』？」
爺爺講：「我係『好人』。」
嫲嫲、阿爸、阿媽都講：「我都係。」
玩「狼人殺」，所有狼人都會話自己係好人。
但係，我哋係一家人，面對緊一場真實嘅殺戮，大家唔係應該講真話，一齊諗辦法咩？
我有少少心寒，呢個時候，鬍鬚男行埋嚟：「傾完未啊？要投票啦，想處決邊個？」
我即刻話：「我棄權。」
大家都跟住講「棄權」，出乎意料地，鬍鬚男無駁斥我哋，只係點點頭：「無人被處決，跟住就到狼人殺人。」
「天黑請閉眼。」鬍鬚男幫我哋逐個蒙上眼罩，
然後話：「我會解開兩位狼人嘅眼罩同繩索，畀把刀佢哋，佢哋要殺一個人。」
我不斷思考，「狼人」會點做？趁機捅鬍鬚男一刀？唔得，佢仲有兩個同黨，都有槍。
我聽到鬍鬚男低喝：「狼人快啲郁手，否則到我郁手搞掂你。」
弊，鬍鬚男唔畀狼人棄權，應該係用槍指嚇佢哋。
咁狼人會點做？一定唔會殺自己人，我哋係一家人嘛。
但鬍鬚男會唔會惱羞成怒，真係開槍殺咗狼人？
我屏氣斂息，突然間，我聽到一聲女人嘅慘叫，
然後鬍鬚男好滿意咁講：「一刀割喉，唔錯啊，幫你哋綁番繩先。」
一陣繩索磨擦嘅聲音，之後我感受到鬍鬚男嘅手，喺我面上身上擦咗幾下：「狼人身上沾咗血，公平起見，每個人都擦少少血。」
到我嘅眼罩被解開，我見到阿媽瞓喺血泊中，已經無晒反應。
「媽咪！」細妹喊到聲嘶力竭。
爺爺、嫲嫲、阿爸同我，身上都有血，每個人都神色凝重。
佢哋三個，到底邊兩個係狼人？邊個親手殺咗阿媽？
「我哋係一家人，你點解要咁做？」阿爸用狐疑嘅目光，打量爺爺、嫲嫲......同埋我。
我難以置信：「佢係我阿媽，我點會殺佢？」
「唔係我。」爺爺否認。
嫲嫲都否認：「我一直都蒙住眼。」
睇嚟，呢次真係一場生死狼人殺，一係狼人死晒，一係好人死晒。
下集：http://bit.do/fjP89
將專頁設定為「搶先看」/ "See first"，最新故仔馬上睇！
月老畀三個願望我：https://goo.gl/Uu6nOq
妖精報恩記：https://goo.gl/epEXJS
#短故 #短篇 #小說 #陳美濤 #廣東話 #粵語 #tomatochan #真實狼人殺
