貝貝上個月嘅第一次做花女！終於執好晒啲相，可以陸續分享🤩今次睇住video先～ 特別鳴謝貝貝姑姐邀請咁細個嘅貝貝做花女😍其實好勇敢！😂
話說一直都察覺到貝貝好怕同男仔相處，可能因為平時太少接觸，所以我都有少少擔心佢當日會失場🤣，話晒要佢同個男仔一齊拖手行教堂喎，平時掂都唔畀掂！
話晒第一次做花女，都希望佢做得好好睇睇，於是我前幾日就開始youtube畀啲花仔花女嘅video佢睇，同佢洗定腦話當日除咗可以扮靚靚，仲會有好多人望住你靚，好開心架（咁貝貝內心的確係好有表演慾嘅！佢好鐘意人注視佢）之不過當話佢知，當日要同哥哥拖手！點知佢一聽到就好抗拒😂，話自己點都唔會拖，我一邊就繼續畀多啲片佢睇，話個個哥哥姐姐都係咁，大家只會覺得佢好靚😂，佢聽到又有啲心郁郁，然後我畀埋花仔張相佢睇，等佢有啲心理準備！開頭佢睇完都話唔要拖手，睇多幾次又話ok！咁我又有喺屋企同佢綵排下😂（佢真係好認真同我排），佢又行得幾好，玩得好開心喎！
到結婚當日到達教堂⛪️，去到門口佢就抗拒，唔敢落地，有啲扭計，我心諗唔通真係搞唔掂？好彩我地早咗去，warm up夠 ，到佢心情好返嘅時候仲不斷追問我哥哥喺邊😂
點知哥哥一出現咋，佢就全程跟咗人走，旁若無人，兩小無猜咁款！既主動拖住人地隻手，不斷跟住哥哥行，綵排嘅時候仲上晒身😂，不斷開心揮晒手，好似變咗佢地兩個結婚咁，睇到我同爸爸眼都突埋，說好的唔要拖哥哥？😆但夜晚果場就有少少混亂，但睇返都好可愛😂
成個過程都好順利，估唔到佢第一次做花女咁成功，直頭超晒班，完全睇唔出半點怯場，出場果下你地仔細啲睇嘅話可以睇埋佢對眼，完全唔知佢想點🤣🤣🤣🤣你睇得出佢超enjoy😂😂😂，我都睇得好開心，真係一個超難忘嘅經驗呀！
有冇人想徵專業花女呀？😆不過小心佢搶晒鏡！
——————————————
FB: 貝貝Alice-小寶貝夢遊日記
IG:bowl_lam
記得讚好我地 Page 之餘，仲要 Set 做搶先看呀～
#貝貝Alice #90後媽媽 #香港媽媽 #新手媽媽 #新手爸爸 #育兒日記 #育兒生活 #花仔花女 #2020婚禮
