【能歌善舞，最妖的—羅文——十問】
1. 其實佢有幾妖？
答：黃霑話香港歌手裡面佢係最姣嘅一個，仲封左「男妖」「女妖」呢個名比羅文同梅姐，佢哋兩個經常性鬥妖，由節目鬥到上演唱會。梅姐仲喺羅文嘅演唱會上面話「我係女妖，你係男妖，咁我地夾埋咪變左人妖！」（文末有link重溫）
另外，羅文仲有一個名叫「大妖」，「小妖」就係Danny陳百強，因為佢哋曾經同一間唱片公司(EMI)，大家嘅風格亦有些少類似，而羅文係前輩，因而得名。
羅文喺《包羅萬友》演唱會度話：「唔係扭動身姿就叫妖，妖係要發自內心。」
至於點解佢要行「妖」呢個路線，就可能係因為佢個人嘅風格，或者同佢去日本發展有好大關係。但佢忠於自己去「妖」，打破左好多以往嘅價值觀，例如性別定型。
2. 聽講佢個唱腔好特別？點解？
答：羅文能夠將廣東歌唱到好似唱粵劇/歌劇咁，好識運用佢把聲，好澎湃，同埋聲音嘅projection都非常犀利。最特別最特別就係佢唱歌字正腔圓。
3. 字正腔圓？
答：無錯，字正腔圓係羅文唱歌一個優秀/最具特點嘅地方。佢非常執著每一個字嘅發音，絕對唔會容許任何嘅懶音，佢係非常極度執著於改善懶音呢件事。
4. 咁佢點解會唱歌字正腔圓？
答：同佢細細個經常聽粵曲好有關係，羅文嘅公公好鍾意睇大戲，成日帶羅文去睇，所以佢細細個就好鍾意粵曲，好鍾意學人做大戲。做粵劇好講求字正腔圓，所以對佢日後嘅演繹方式有好大影響。
5. 佢有幾執著字正腔圓？
答：簡單黎講就係佢覺得懶音好難頂/難聽。佢訪問嘅時候曾經講過正確嘅發音係會影響下一代，「既然可以學習正確嘅發音點解唔學要學錯嘅呢？讀錯音係面子問題，好唔好意思架。」徒弟容祖兒曾經講過其實平時同羅文溝通有懶音都會比佢話，而歐陽佩珊就話唱歌嘅時候曾經將「你」唱左做「李」（懶音），羅文都聽得出，佢話好大分別。
6. 佢仲曾經做過「正音大使」？
答：係呀！話說之前港台有個節目叫做《群星匯正音》，每集就請藝人上去宣傳正音嘅重要性，而只要答啱一系列問題就可以做「正音大使」。節目裡面好多小劇場，有一集就係羅文催眠兩個不停將「難」讀成「蘭」（懶音）嘅人，最後矯正到佢哋嘅懶音。（文末有link重溫）
節目裡面羅文仲呼籲大家「準確發音，增強信心！」
上過呢個節目嘅仲有郭富城、周慧敏、李克勤，佢哋都係正音大使黎。
7. 但係佢後期唱歌嘅方法好似有少少唔同左。
答：無錯，90年代嘅時候羅文的確係改變左唱腔。佢自己喺演唱會都有承認。比起七、八十年代，佢90年代嘅唱腔比之前柔和左，無咁咬牙切齒去咬每一個字，亦無以前咁澎湃，佢話咁樣唱歌好似舒服少少。佢經常追求創新，所以改變唱腔其實唔出奇。
8. 聽講羅文跳舞都好犀利？
答：係呀，之前都提及過羅文細細個已經好鍾意唱歌跳舞，佢家姐都話佢細細個已經成日參加舞團。不過羅文對舞蹈嘅熱情唔淨止係中國舞，西方嘅舞佢都會跳，包括芭蕾舞。佢話佢爸爸媽媽雖然係知識分子，但係佢哋好鍾意帶羅文睇荷李活歌舞劇，佢會喺屋企攞拖鞋跳芭蕾舞，又會攞毛巾扮水袖。相信對羅文有好大影響。所以由細到大佢都好鍾意跳舞。佢曾經喺1983年電視節目《星光熠熠競爭輝》同蔣麗萍跳芭蕾舞，又同陳潔靈跳Charleston（文末有link重溫）。佢甚至覺得自己係鍾意跳舞先之後先發現自己識唱歌。
9. 之後先發現自己識唱歌？
答：無錯，羅文喺訪問講過佢黎左香港之後有一次去朋友屋企玩，當時就有人喺度練歌，咁就叫佢去唱下，d朋友就讚羅文唱歌幾好，羅文都幫呢隊band做業餘歌手，而呢隊band就係叫T.N.T.。羅文其後就慢慢發現佢對唱歌原來真係有少少天份。
10. 佢淨係唱流行曲？
答：唔係，佢可以話係乜都想試下唱。英文歌、廣東歌、日文歌、國語歌，由rap到音樂劇，粵劇到京劇再到國語時代曲佢全部都會唱。
封面照片：羅文 好歌獻給你 唱片封面
羅文&梅姐鬥妖片段：
第二頁截圖（左上角）：《羅文包羅萬友演唱會》：https://www.bilibili.com/video/BV1qs411h71i/?spm_id_from=333.788.videocard.0
第二頁截圖（右上角）《金鑽群星相輝映》：https://www.bilibili.com/video/BV1Rs411e71P?from=search&seid=15728598939020802247
第二頁截圖（右下角）《超級樂壇創世紀》：https://www.bilibili.com/video/BV1px411Y79g?from=search&seid=2573141748687084986
第二頁截圖（左下角）：《愛心滿東華》：https://www.bilibili.com/video/BV1GJ411K7Ub?from=search&seid=2573141748687084986
第三頁全部截圖：羅文參加《群星匯正音》成為正音大使：
https://www.bilibili.com/video/BV1dt411J7Ut?from=search&seid=5993416801317605415
第四頁全部截圖：《星光熠熠競爭輝》：
https://www.youtube.com/watch?v=KXnsDXZ9qAA
