【歌影留情】
本書終於開賣，我發現好多朋友都唔係好清楚本書其實寫d乜嘢，希望可以通過呢個post講下我寫呢本書嘅初衷。
本書其實好耐之前已經開始寫，大約兩年前嘅時候我就受出版社邀請去寫呢一本書。無奈呢兩年香港發生太多事，所以本書嘅出版日期不斷推遲又推遲，到左今時今日。
我相信最近大家見到d街訪去問d 00後識唔識d 90年代、80年代嘅明星。其實呢d街訪我已經唔係第一次見到，由幾年前開始我已經不斷咁見到呢d「好有趣」嘅訪問，內容包括：唔知張國榮同張家輝有乜分別、唔知《對你愛不完》係邊個唱、郭富城唔識、古天樂唔知邊個、《深愛著你》係張國榮唱、梅艷芳我啊爺個年代等。呢d片段我估主要係利用年輕人對過去嘅無知作為笑點，去突出過去嘅嘢就等於無價值、無聊（至少我睇完係咁覺得）。我每次見到呢d街訪，粗魯d、直接d講簡直係on9當有趣。可能呢d「老餅野」唔係你個年代，唔識嘅話難怪，但個問題在於好多人會為自己對果個年代嘅無知而沾沾自喜，覺得自己唔識係一樣非常值得驕傲嘅事，甚至覺得自己唔識就等於自己企喺潮流嘅尖端，再去取笑一d認識呢d「老餅野」嘅人，一句：「我啊爺個年代」就嘗試將成件事合理化。
但係如果你嘗試去問佢哋點解呢d野唔值得被重視，其實佢哋答唔出。我真係唔明，究竟係乜心態？當年香港係東方荷李活，梅姐、哥哥佢地嘅歌可以話紅遍全世界，東南亞更加唔洗講，究竟有咩值得羞恥？唱k唱一首舊少少嘅就要比人笑？點解以往年代嘅野成日都會比人掛上老土、無聊嘅標籤？我都經常聽依家流行嘅kpop，點解我聽一首陳百強嘅歌就要比人笑老土？
「我唔聽死人唱歌」、「人都死左做咩要懷緬」乜乜乜再難聽嘅野我都聽過。
我好想用年輕人嘅身分去作出改變，我唔覺得我鍾意陳百強、張國榮、梅艷芳、許冠傑甚至周璇就等於老土。我唔想再收收埋埋怕喺學校比人笑，因為我一直相信佢哋係有價值嘅嘢。所以有機會嘅時候，我就寫左呢一本書，去講我同呢d「老餅野」嘅緣份/故事，並且訪問左一d歌迷前輩同埋同我一樣鍾意「老餅野」嘅年輕人，我希望更多人會重視文化傳承嘅重要性。呢d經典係唔會隨時間嘅流逝而被忘記，希望帶出依家仲有好多好多年輕人去保護同傳承呢d有價值嘅嘢。
我絕對唔係文化學者、寫文章好犀利嘅人，所以我唔擅長於分析梅姐哥哥佢地嘅電影、歌曲，但係我有嘅係身為年輕人鍾意「懷舊野」嘅經歷，所以喺本書寫曬出黎，希望同大家分享。我相信有好多不足嘅地方，希望大家可以多多包容同指教，但我真係落左好多心機寫架！😭😭
留情
圖：2017年影嘅，當年我16歲，見到星光花園梅姐嘅展覽海報上面俾人簽左個名，唔知點解接受唔到就聯絡左歌迷會，我嘅老餅旅程就咁開始左。
