//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //
不足一年前仲響度鼓吹全港青少年投入大灣區懷抱嘅「國際關係大師」沈旭暉，而家立場一轉，又叫人全力進軍功能組別──似乎除咗佢嘅老本行國際關係之外，幾乎每一樣嘢佢都非常積極參與，沈大師嘅「國際關係大師」稱號似乎亦應省略一下，直接升格成為「國師」。
相比起多年尻叫「爭取雙普選、一席不能少」嘅飯民政客，以及近年跟風轉軚、立場由消滅功能組別變成進軍功能組別、卻無恥到連點樣做都講唔出嘅時事KOL，沈國師的確係有啲料到──喂立法會飯民過半點樣可以因此達到雙普選，你至少都要拎出個「普選路線圖」出黎架，唔係同特衰政府有乜分別？幾好笑嘅卻係，直至沈大師之前，飯民一直都無諗過有呢樣嘢嘅需要，但另一邊卻要求政府交待普選路線圖同時間表……
好多人以為立法會過半飯民就可以為所欲為，但其實卻係錯哂，因為響「行政主導」嘅香港，所有重要提案都必須要由特首主動提出，立法會只有否決權；至於私人草案除咗有「分組點票」呢個緊箍咒之外，只要涉及修改政府開支同重要政策，政府係可以拒絕草案提交。然後再加上政改方案必須要經「人大五部曲」同三份二大多數通過，透過立法會爭取雙普選根本係無可能任務。
於是沈國師決定索性繞過哂呢啲立法障礙，將進軍功能組別同進軍選委綑綁埋一齊，然後提出咗佢嘅「國際關係四部曲」：
第一步：飯民先攻陷特首選委過半，選出支持雙普選特首
第二步：飯民特首提出更改功能組別投票方式議案，建議將所有功能組別由公司票變成個人票，亦即所有市民均可依循自己職業投功能組別票
第三步：再由飯民控制過半嘅立法會通過，香港立刻變相擁有雙普選
第四步：唔知有無，視乎佢覺得功能組別變個人票係咪已符合咗普選要求
好多稍有理智嘅人聽到呢度可能都會忍唔住講句「痴撚線」，因為果種一廂情願其實係同特區政府聽日突然宣佈香港獨立差唔多──即係點解同一班人口口聲聲話港獨絕無可能，但去到咁痴線嘅普選計劃，卻又可能面不紅氣不喘咁叫人Dream the impossible Dream？
但純粹謾罵係無助搞清事實，所以我決定向沈旭暉提出10條佢必須回答嘅問題，等大家分辨一下，究竟沈國師提出嘅，係一個切實可行嘅願景，定純粹係一個騙局？
一、香港特首參選需要經過中央默許、當選需要通過中央任命；假若政綱中有五大訴求缺一不可的內容，*請問飯民代表特首候選人如何避過被DQ命運？*
二、人大對於基本法有最終詮釋權，亦不止一次就香港政制方案釋法。沈國師認為中共會容許這種賣弄小聰明、繞過「人大五部曲」的變相普選政改方案嗎？*請問飯民如何避過人大釋法否決普選議案？*
三、*假若最終飯民未能爭取特首選委過半，請問沈國師會否促成飯民與商界聯手推舉候選人？如果會，商界又有何動機要接受飯民雙普選提議？*假若商界特首候選人堅拒採納沈國師建議推動雙普選，請問飯民係會含撚投票支持商界特首候選人當選，定係以取消提名要脅其屈服？如果是前者的話，反正你係唔係都含，點解要同你傾？
四、以上幾條問題同樣適用於立法會選舉。*請問沈國師與飯民如何避免中共政府透過DQ飯民候選人，以阻止飯民立法會過半的企圖？*
五、陳沛然從未被視為飯民同路人，又曾投票贊成一地兩檢無約束力議案，並於最終議案唔跟飯民大隊投反對票而棄權，請問如何能被視為過半之一？當日李國麟莫乃光梁繼昌投票支持水炮車撥款，唔通佢地又叫飯民？
仲有鄭松泰一直被飯民黃屍屈係分化撚同鬼，依黃屍邏輯，理所當然會預期佢響普選方案投反對票，計埋計埋，飯民就算響功能組別多贏兩三席，立法會所佔議席亦不過31-32席，*究竟飯民立法會議席過半係如何計算？定係欺騙選民嘅語言偽術？*
六、飯民已有不止一次出賣香港人的投票紀錄，甚至包括沈國師過去亦曾為中共走狗。請問要選民如何相信你地真心爭取普選，而唔係重建飯民大台後為中共政權維穩？功能組別議員多年來立場搖擺不停卻不受選民懲罰，原因就係只有界別選民先可以投佢一票，佢地多年黎亦享盡作為功能團體嘅好處，多次將業界利益擺響公眾利益之先（例如成立創科局）。
*如果連過往立場搖擺不停嘅飯民議員都仲可以擺響連任名單，我點相信佢地響關鍵時刻唔會再出賣香港人多一次？*
七、*假若飯民九月選舉未能獲得過半議席，有無Plan B繼續響議會進行抗爭？所有參選嘅飯民議員係咪至少要簽番張全面抗爭誓約書、同埋宣佈自己捐出所有議員薪金，證明自己唔係為份糧打工？*定係好似而家咁，響鏡頭前面扮下憤怒，呃下曝光，然後繼續鍾意開會就開，唔鍾意就缺席會議唔投票，就當自己盡咗議員責任，十萬蚊照袋？
過去咁多年，香港人就係發覺飯民議員永遠都要等議會過半先能夠發揮作用，一日唔過半一日就可hea住黎做，於是先出黎街頭抗爭，而家你兜兜轉轉又叫香港人重返議會，但個抗爭方法卻仍然係等運到，咁同以前有乜分別？
八、*對於九月當選之後，唔開會唔投票失職、又或者拒絕全面抗爭嘅立法會議員，係咪會有明確嘅懲罰機制？*如果議員失職、唔開會唔投票係完全唔需要受到懲罰之餘，下屆仲可以借住「立法會過半」呢個口號訓響度連任，咁我點解會相信佢地入咗議會後會盡力而唔係繼續偷懶？
九、沈國師指「相信若有當選人不獲任命，國際社會或會對香港實施制裁」，*咁我想問點解之前香港有多番DQ事件，外國社會係對此完全無動於衷？同埋飯民會唔會到時又出國游說外國政府放棄制裁，拖抗爭後腿？*
當日公民黨郭榮鏗同楊岳橋都反對國際社會制裁香港，用「一國兩制、殘而不廢」、「香港法治、有險可守」作為反對外國因《逃犯條例》修訂同警暴問題對香港作經濟制裁，我點知佢地會唔會又再重施故技？
十、最後沈國師指出：「若是通過北京破壞自己設計、已先天不公的制度，卻是製造了後天土壤。北京兩害相權，選擇非理性的反枱機會不應超過50%；假如真的有了非理性決定，那是de facto certify一國兩制，對港人而言也是個解脫。」
我想問沈國師作為學者，呢50%嘅推論係點黎？北京難道未試過透過DQ、釋法等方式非理性推翻香港選舉結果嗎？以呢個背景作參考，飯民想透過選舉爭取過半再控制政府呢種形同港獨嘅做法，北京非理性的反檯機會點可能唔係99%？
至於最後一句「對港人而言也是個解脫」，即係點？解脫咗之後繼續做順民？定係接受你沈國師建議，「超越邊境嘅想像，番大灣區創業」？呢個係第十一個問題，但同上面十問無直接關係，純粹係我好奇：＊沈旭暉，究竟你係咪鬼？＊
