《再見了，俄羅斯人妻》
唔知大家仲記唔記得我有個俄羅斯人妻朋友仔呢？佢係我喺法羅群島第一個識嘅朋友，亦都可以話係唯一一個真係會經常聯絡嘅法羅群島朋友。佢份人好健談，第一次約出黎見面我已經知道左佢同佢老公嘅愛情故事。佢16歲嘅時候就識佢老公。佢地兩個都係運動員，一個游水，一個玩水球。一路拍拖拍到廿二歲結婚，而家廿八歲，已經有兩個好可愛嘅小朋友。到第二次見面，就係我結婚當日嘅小派對，佢送左親手整嘅朱古力畀我做禮物，佢同佢老公係當日最後一個離開嘅賓客，因為太健談，講到唔想走。到第三次見面佢就煮俄羅斯pancake 畀我食，仲見埋佢父母，佢媽媽煮左正宗羅宋湯畀我飲。人妻亦依舊咁健談，今次我知道埋佢best friend 嘅愛情故事。我同人妻一見如故，雖然淨係見左三次面，但係我已經當左佢係好朋友。我去紐西蘭嘅時候仲寄左張明信片畀佢。我地一直想再約見面，但唔係我返左香港就佢兩對仔女輪流病，加上法羅群島嘅托兒所嘅保姆罷工，佢就更加忙，所以完全約唔到見面。
不過我地真係好有緣。大家仲記唔記得我喺法羅群島飛機場準備上機飛去哥本哈根嘅時候，突然話航班取消？當日我喺機場同人妻喺WhatsApp講再見，咁啱得咁橋，佢話佢都喺機場，情境有如拍電影，我地就只係隔住左一棵聖誕樹，我地即刻黎個深情擁抱，原來佢都係同我坐同一班機去哥本哈根，再轉機返俄羅斯過聖誕。於是我地喺機場又傾起上黎，我地講好左等我3月返法羅群島就一定要見面。點知，當日就成為左我地最後一次見面。
放心，俄羅斯人妻健在。而係佢要離開法羅群島啦😢佢老公本來係被法羅群島嘅泳會高薪請去教國家隊游水，點知最近被解僱左，本來計劃喺法羅群住3年嘅佢，3月就要離開法羅群島啦。我知道之黎晴天霹靂😭我原本計劃6月喺法羅群島補辦婚禮，我已經邀請左人妻個女做花女，但無諗過，我地一聲再見都無佢就要輕輕的走了。老實講，我唔知會唔會去俄羅斯，佢都未必會去香港，可能我地呢世都唔會再見面。我一諗到就有種莫名嘅失落感。
我諗起當年我考中文會考時嘅一篇文
「每一個人都只是穿插在他人生活中的一個片斷﹐這注定永遠只能陪人一程。你愛自己的父母﹐希望他們長命百歲﹐但你再孝順他們﹐他們也會走在你前面﹐你只能陪父母一程﹔你喜歡自己的兒女﹐時刻夢想用自己的身軀為他們遮風擋雨﹐然而﹐你再高大﹐總有一天你也要走在他們前面﹐你只能陪兒女一程﹔你擁有一個心心相印的妻子﹐但是﹐她前面二十多年屬於父母﹐後面幾十年會被兒女﹑命運分割﹐你只能陪妻子一程﹔你看重朋友之間兩肋插刀的友誼﹐然而﹐不是朋友離開你﹐就是你離開朋友﹐你只能陪朋友一程……
因為只能陪人一程﹐你應該學會珍惜。他們饑餓時﹐你的關愛要成為一隻蘋果﹔他們寒冷時﹐你的呵護要變成一件棉衣﹔他們快樂時﹐你的笑容應該是最燦爛的﹔他們傷心時﹐你的撫慰應該是最真摯的……」
多謝俄羅斯人妻都陪我走過剛剛搬去法羅群島嘅孤獨五個月。雖然佢可能只係我生命中一個短暫嘅過客，但係都係我生命中一個重要嘅回憶😊每人都係每人嘅過客，篇文講嘅係死亡，但當然仲有唔同因素令你只能成為別人嘅過客。但重要嘅係大家會珍惜同每個「過客」相處嘅時光同佢地陪你走過嘅嗰一程係開心難忘嘅❤️我到八十歲嘅時候，會同我d孫講，你阿嫲曾經有一個好好嘅俄羅斯朋友。大地之友們有無即刻諗起咩朋友想約食飯好耐但又因為種種藉口無約成功架？事不宜遲！今日即刻約！
***好啦，我都係唔好做drama queen 😆其實而家坐飛機好易🤣我會去俄羅斯探佢架！
---------------------------------------------------
❤️如果想睇更多大地之嫂同大地之子嘅無聊小故事，大家記得去我個page度較返See first 呀！
❤️仲有要記得follow埋ig: whereisfaroeislands ，
https://www.instagram.com/whereisfaroeislands
