逸澤社區主任——王頴思
☎️電話／WhatsApp：6222 9162
📧電郵：arcwong@civicpassion.hk
【03-07-2018 逸澤社區工作小記】
今日同天水圍手足一齊去天逸邨，處理完地區恆常事務，我地就去左邨後面的天秀墟巡視。
提起天水圍墟市，相信唔少人都會諗到天光墟。天光墟係由天水圍當區居民自然聚集而生成的地攤市集，以販賣蔬果等食品及日常生活用品為主；係呢個墟市，居民可以買到平餸，小販透過小本買賣得以搵兩餐，大家各取所需，地區經濟活動亦得以發展。
然而，中間發生左一宗悲劇：地攤小販為左避開食環追捕，情急之下跳落明渠遇溺身亡，引起社會極大迴響；政府於是將原本的天光墟墟市轉移去天秀路，撥款交由NGO去管理，變成而家的天秀墟。
以上的故事，係我讀社工課程時聽過無數次，然而由天秀墟檔主親口娓娓道出，從佢地的想法、角度出發，再聽到時又令人別有一番體會。
猶記得初次落天秀墟，個日又曬又熱，我同手足經過一間士多，老闆娘好熱情，主動問我地想飲咩；傾傾下，老闆娘仲拎凳出黎比我地坐，又沏茶招呼我地。老闆娘除左賣涼果零食外，佢仲識調製花茶、中藥養生茶；佢見隔離鋪無咩野賣，就將自己識的教曉對方，等佢可以做多啲生意。
「我地係度開鋪，好多野都要靠自己，呢啲時候更需要互相扶持，你幫下我、我幫下你，個墟市先會旺。」老闆娘邊講邊幫我地斟茶，話口未完已經有幾個檔主行過，同佢打招呼，有啲仲一齊坐低飲茶玩貓。
「岩岩開始搬入黎開檔時，無咩人，個墟市開八點收八點，咁我就同寫字樓講，將開放時間延長到夜晚十點，等啲街坊食完飯都可以黎散下步、傾下偈，咁個墟市先會旺，大家都可以做多啲生意。」
老闆娘直言，開頭佢提出各種意見時，都遇到不少阻力，但佢一再堅持，聯同埋其他檔主同負責管理的NGO開會，最終意見獲採納。「機構又好，政府官員都好，佢地要記住，呢個墟市係屬於我地元朗、天水圍居民，應該要以我地利益行先。」
係老闆娘身上，我再次感受到過往香港人為生活拼搏的精神，係天秀墟裡面，我再次睇到昔日個種街坊街里，鄰舍互助的精神。因著新市鎮的發展，現時的公共屋邨飽受領展霸權欺壓，社區被天橋駁商場、商場又駁返天橋的設計綑綁，以致公共空間愈來愈少，失去供街坊聚腳打躉的地方，令到人與人之間的關係日漸疏離。
係天水圍區，天秀墟正好可以發揮到聯繫街坊的作用，聚人同時推動地區經濟活動，讓居民能自給自足，各取所需。
7月13號（星期五）晚上8-9 我地會係天秀路公園重啟泰式運動，等街坊多個機會聚下、聯誼下。老闆娘同其他檔主知道後，第一句就話要義工即管同佢地開聲，佢地隨時歡迎大家去佢度飲茶傾偈😊👏🏻 老闆娘沖嘅茶真係好好飲，大家參加完泰式運動，可以一齊去試下佢手勢，開心傾偈玩番晚！
#逸澤社區工作小記
#天水圍
#天北
#天澤邨 #天逸邨
#天秀墟
#泰式運動 #女子組
#天秀路公園
#鄭松泰立法會議員辦事處
#逸澤社區主任
#王頴思
泰式運動 在 脊椎運動保健＃泰式按摩＃瑜珈運動按摩想要學習... - Facebook 的推薦與評價
脊椎運動保健＃泰式按摩＃瑜珈運動按摩想要學習＃脊椎保健及按摩，還有＃長照學分的朋友歡迎報名參加中華國際全方位照護學會的保健課程師資： 中華運動保健技術協會 ... ... <看更多>