《流行榜 我總可以上一上.......某一週 我極度流行》
今日下晝收到朋友嘅一張相.....
第一刻見到真係好開心，第二刻我即刻諗「係唔係朋友自己擺上去？」，我就係咁多疑，於是我自己都去睇下，原來係真架 T.T
好感動，我嘅內心background music 就係關家姐個首「流行榜 我總可以上一上.......某一週 我極度流行」。本書出咗街一個月，呢一個月以來，我每次行過書局，都會睇下個「豬肉枱」，新書都會放喺「豬肉枱」，然後朋友話，如果你本書唔賣得，佢就會好快將你本書由「豬肉枱」搬上「骨灰位」，「骨灰位」即係「鬼見到」，唔會再有人睇到個啲位， 只有「親友拜山」突登搵先搵到。所以我呢一個月來，一直都只係希望本書keep 住喺張「豬肉枱」度，唔好咁快上「骨灰位」。
所以見到我本書由「豬肉枱」擺上榜，確係感動…
可能係因為我啲 朋友呢個星期掃貨，推高咗條數，但點都好，好多謝大家。可能好快佢就上「骨灰位」，但我會好好記住呢個位。對於個啲 成日上第一位嘅朋友，當然唔會care，但你要明白，我就好似「陳曉東出道N 年首次拎叱吒十大」咁，個啲「好似容祖兒」嘅作者，唔會明架啦。
最後係，我好想引用蔡依琳拎金曲獎個句「要謝謝曾經很不看好我的人，謝謝你們給我很大的打擊，讓我一直很努力，謝謝一路以來對我還是很支持的人，因為你們對我的期待，我要讓自己一直維持最好的狀態。」.....好記得，有個唔熟嘅朋友曾經同我講「你都出書？寫得啲乜？你自己買返呀？」，仲有一個唔識嘅人同我講「你都有幾萬like呀，香港人啲 taste 屎真係每況愈下」...多謝你地咁仆街，我會狠狠地努力落去。
PS. 第九位係同一出版社作者，馬菲作品 -- 黑色救護誌
