［我看見時代的眼淚］日本黑社會青黃不接，半數成員50歲以上
Guardian 原文：Making a slow getaway: Japan's anti-yakuza laws result in cohort of ageing gangsters （https://bityl.co/3OcV）
TLDR：其實都係risk and reward。政府加強執法刑罰又重，入黑社會分分鐘電話卡都出唔到，坐完出嚟都七八十，搵邊個認你做辦事人？加上經濟不景，business model又過時，一大班廢老阻上位，根本見唔到上流空間。點吸引年輕人入行？入嘅都只會係南亞仔。
1. 日本人口老化，應該人人都知。咁當然係打擊各行各業，而yakuza（極道，其實即係「暴力團」，以下就叫黑社會）亦不例外！
2. 當然某程度上日本嘅黑社會係「合法」的，但無論合法與否，人口老化都打擊日本（甚至全世界）各行各業。你可以想像到，黃業都不例外，啲中港台同胞就富起來又有廉航，個個一年去幾次日本韓國，邊得嚟咁多純種日本妹韓國妹？亦唔好性別歧視，根本牛郎舞男鴨男妓（whatever）亦係一樣。不過呢啲留返畀友版 新田飛地 研究。我地呢度都係講返黑社會
3. 留意日本人真係十分嚴謹，連黑社會都做人口普查（香港地嗰啲頂多供強積金，有冇睇《無間道》？）。2006年已開始做普查
4. 今年嘅黑社會人口普查就震憾啦—第一次有超過一半嘅成員（51%）係50歲以上！而增長最多嘅「新力軍」，係70歲以上嘅嗰堆！
5. 固然日本極道有極長歷史，真係由德川家康統一日本講起都仲得，但呢個老年化趨勢，係好近期先出現的。2006嘅第一次黑社會人口普查，三成人係3字頭。但而家3字頭只佔14%。2字頭嘅？更少，5%。而7字頭嘅超過一成，死未
6. 原因啦喎，固然係人口老化。但仲有其他「行業獨特」嘅原因。一切都係risk and reward．Risk方面，警察加強咗執法，坐監嘅機會大增，然後坐監就年金（唔知係國民定組織嘅年金？）都冇埋。Reward呢？經濟不景，最好賺往往係旅遊業，但政府當然唔會畀黑社會有得參序。而黑社會嘅「傳統業務」，當然係式微，冇乜錢搵。唔記得睇邊套港產片講，仲收保護費？個個交租畀領展喎。領展啲場唔會有人拎盤桔入去下話？
（廣告時間：請支持Ivan Patreon 。一個月一舊水唔使，一生期三篇，開張一個月已500人訂！仲有兩篇免費試睇：https://bit.ly/31QmYj7）
7. 風險大但著數少，就好難吸引年輕人入行了。
8. 政府嘅執法，亦都令到黑社會嘅會員唔多方便—四五十年前可能冇乜所謂，但而家難搞。例如乜？你係黑社會嘅，就制裁你（哈）。冇信用卡，冇得開銀行戶口—咁點網購？唔止，買唔到保險，仲要係電話都出唔到！會死人的嘛！
9. 文章訪問咗已退休嘅老行尊，都話世界唔同啦，「好多後生仔入會一年就走」「我年代就諗住搏殺上位，有錢有靚車有女人，但而家年青人睇唔到上位嘅希望呀」哈，好似拎去各行各業世界各地都啱用。
10. 當然，除咗話人口結構唔同外，黑社會嘅會員數目亦少咗好多（唔知香港有冇呢方面嘅統計）。1960年代，講緊差不多18萬註冊會員（埃汾按：咁少？），到第一次詳細人口普查，2006年，得返一半都冇，8萬幾。而家？得返14000個註冊會員，「同我Facebook Page差不多」。仲有14000個 associate（唔識譯，駁腳？炒散？）。最大嘅當然係大家都知嘅山口組，都唔夠9000個會員。（張圖呢位仁兄就係司忍，山口組組長，80歲都嚟緊頭）
11. 當然有好多人都係冇正式入會（而家仲玩斬雞頭燒黃紙滴血咩），但聽聞香港地都幾十萬黑社會會員（維基話的），分分鐘多過全日本！
12. 仲有，日本政府加長咗刑期又係一個問題。以前啲友，真係為阿公做嘢，出冊都仲係四張幾，仲有大把世界，仲可以上位。但而家分分鐘坐完出嚟都七十，甚至終身。分分鐘當年叫你去做嘢嗰條友都死撚埋，仲講義氣？入老人院搵佢都唔知認唔認得你。大D話齋，「上屆等今屆，今屆等下屆，下屆我畀個警務處長你做！」
13. 第度唔敢講，但日本呢，傳統黑社會呢個 business model，係肯定玩完的。冇鬼唔死得人，烏蠅唔叮冇裂痕嘅蛋（Blame the victim spotted！）．政府之所以夠膽大力執法，亦因為黑社會本身出現問題。首先佢地冇以前咁有錢，冇錢自然冇人睇你台戲，呢方面真係向杜琪峰嘅《黑社會》學習下（順手懷念譚炳文）。另外，黑社會亦都失民心。以前係填補咗政府嘅不足（你睇意大利亦都係），但而家多數係神憎鬼厭。民間已經唔係四十年前咁紙醉金迷，你仲去收保護費，就係啲廢老玩爛嘅business model了
14. 講返嗰位退休嘅黑社會叔父，佢都話自己感因，活到而家。但畀佢揀多次，都唔會再入黑社會。有乜謂？坐咗三次監，而家冇家庭，冇工開，亦都冇儲蓄
15. 埃汾按：實情日本黑社會有冇外勞？我講真的。去開日本都見啲便利店呀餐廳呀酒店呀多咗好多有色人種或中國人（亦有可能係台灣人）。香港黑社會都多咗好多南亞人，反正又識廣東話，機會成本又低（做任何嘢都係睇呢樣嘢），對社會又不滿，又膽正命平，唔會跑一陣就冇氣（＊）。不過如果靠外勞，新一代就更加上唔到位。但可能新一代都唔多在乎，做黑社會同做便利店，可能都係shitty job，好難請人了
（＊）呢，昨晚先有件，跑兩嘢就腳軟了（https://bityl.co/3OcM）。（美斯）「你埃汾好撚醒？你咪又係跑兩嘢腳軟」「所以我咪唔會去做賊咯」
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7
——————————————————————————
［收費短片第九擊］美股科技股是否泡沫爆破？價值投資之選
課程資訊：https://homebloggerhk.com/course_detail/?code=CC009
內容:
*美股急跌點算好
*科技股係咪泡沫爆煲？
*有乜價值投資之選？
本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145
另外想買返第八擊（美國總統大選股票部署）都仲可以：https://bityl.co/3NPn
