【多謝你搭的士】
今年書展都算係精彩。有村上春樹大作被歸類為二級不雅，老實說，第一眼見到報紙標題，自動加咗向西兩隻字然後忽略咗，後來先發現本下品圖書真係嗰本來自日本嘅正嘢，難怪《我的你的紅的》都入唔到圖書館。然後食熱狗事件亦算係空前絕後嘅直播，峰迴路轉嘅劇情，喺唔同場合，既飾演被害者，有時又切換為加害者，唔跟足真係唔知發生緊咩事。年度作家候補爭議更加發人深省，其後雲海嘅爆料就更加恐怖，真相似乎永遠被蒙蔽，視乎你較相信哪一個說法。要簡單而明瞭咁描述今年書展，好簡單：豐乳飄搖。
好彩，薯仔有薯仔嘅好處，除咗食花生同數下啲書幾時賣曬之外，對我黎講最重要嘅只係得兩場簽名會。老土都要講，衷心感謝咁多位嘅支持先，你哋嘅鼓勵對我黎講真係好重要。美中不足嘅係，簽名會好似醫生睇症咁，每個讀者黎到，簽名，講兩句，影張相就BYE BYE，唔係唔想傾計，無奈喺後面等緊嘅人又唔少，想交流耐啲，又驚後面等得唔耐煩，嗰種矛盾咁陪伴住我度過兩場簽名會。
親愛嘅讀者們問過我幾個問題，當時只可以匆匆簡單交代，喺呢度詳盡少少講下。
有讀者問我係咪真係有揸的士，哈哈，喺香港如果想單靠寫文章搵到食，咁嗰位作者一係好出名，一係好節儉，所以我真係有必要揸的士㗎。
承上題，揸的士真係咁多特別嘢？
簡單答就係喺嘅，詳盡少少可以咁樣計。每更平均載二十個客，十個客平平無奇，另外十個有計傾但係五個講無聊嘢，淨低五個再除二，兩單得啖笑，三單值得寫，已經夠我出POST出書出專欄。但係最重要嘅係，你能唔能夠喺普通嘅事情中見到值得一寫嘅事，甚至引到乘客同你傾計而且傾得舒服？呢個可能較為難啲。
記唔記得我？講堅，如果我係唔係都話記得，就未免太虛偽。但係經常喺FB留言，有大頭相嘅我都有啲印象，或者PM過我嘅都會記得少少。重點係，我係好歡迎大家留言或PM傾計㗎，只係有時我揸緊車，唔會咁快就回覆到。
始終，簽名會嘅交流都唔係咁大，或者有機會搞下講座，唔知大家會唔會到呢？（聽講遲啲真係有，待定）希望可以喺文字以外，繼續同大家交流。
最後想講嘅係，今年新書成績雖然未出，睇落就無紅的1咁好。上次睇完係會笑，今次睇完應該會有嘢諗。建議大家將紅的2放喺廁所，大腸蠢蠢欲動時就翻開睇下，睇完一到兩單故仔，下半身應該都完成偉大嘅使命，咁好快就睇得完本書，然後期待下一本，希望會期待啦。
白告
IG：lazytaxihk
熱狗事件 在 【歡樂動畫】要掉下去啦!!【熱狗事件】一根熱狗引發的慘案 ... 的推薦與評價
... <看更多>