https://www.patreon.com/posts/yu-qi-wen-jia-ni-52334272
特登Skip咗6月9日呢個日子寫抗爭回顧，原因就係對於我黎講，真正嘅抗爭運動開始並唔係響所謂百萬69大遊行，而係凌晨一班有志之士留守聚集，然後響林鄭發表垃圾回應後響立法會外圍發生衝鐵馬一刻。
出乎意料，尋日竟然響唔同地方都有人探討同一個問題：「如果番番去兩年前，你會唔會寧願場抗爭運動無發生過？」雖然好多人都公開講「唔後悔」、「起碼有試過」，但其實香港民意研究所響2019年11月經已做過類似嘅調查，而匿名嘅數據從來最誠實：唔單止藍絲，就連大半嘅黃絲都寧願呢場抗爭從未發生。
我相信，今時今日擁有呢種意見嘅黃絲只會比半年前更多。我覺得呢種諗法好自然，只係無人敢講出黎：事實上亦好正常丫，如果你知道場抗爭有咁多人被捕流亡後，最終只會令你兩年後生活更差更痛苦的話，歷史重來寧願佢唔再發生係人之常情。
所以我覺得個問題其實係有啲問錯咗，真正應該問嘅係：「假若歷史再來，你有嘢可以做得更好？」要反省嘅，唔係點解我地咁蠢明知輸都去做，而係下次機會再黎嘅時候，點樣可以避免之前所犯嘅錯誤，例如：
1.唔好再比班和理非廢老拖勇武後腿
2.所有捉鬼天屍一律當仇敵看待
3.唔好再妄想果啲臨時加入嘅「淺藍轉淺黃」會幫倒場抗爭手、唔好再妄想可以響體制內改革、再講35+唔係ON9就係共諜
4.籌錢應該用響有用嘅地方，而唔係變成騙徒呃錢樂園，又或者養到班完全無為抗爭貢獻過嘅黃標KOL肚滿腸肥
5.唔好再信口講「好撚鍾意香港嘅人」班友，佢地往往最先離棄香港走人
至於抗爭者本身，有無嘢可以做得更好？例如點樣令自己更能夠避開危險嘅同時，支援更多嘅人？當然更多人需要問嘅問題係，仲要比自己幾多藉口，先至可以面對縮入冷氣房尻留言係改變幫助唔倒抗爭呢個現實！
成日講盡人事聽天命，經歷過去兩年我地都會明白，有啲嘢有時無天時（例如特朗普落台），就算有地利人和都無用；但至少盡咗人事，先有資格等待天命嘅來臨。都係果句，辛亥革命都係失敗咗十次先成功啦，你睇共產黨響當年解放中國前，點樣比人打到一仆一碌？
羅馬唔係一天可以建成，中共立國前都有長征一段不堪回首嘅折墮經歷，區區兩年都仲捱得住，我希望大家亦都一樣。
