《果欄中的江湖大嫂》欠個人渣？
一口氣看到十五集，這劇的題材其實幾好寫，兩個嬌滴滴的女人同時面對人生挫折，走進陽剛的男人世界果欄，敗部復活，東山再起，再加上容易討好觀眾的寃家戲，三生三旦的愛情戲，仲要每一對都有些三角關係，很多受歡迎的元素也齊了，首周平均收視有二十六點，第二周也有二十五點，算是不俗了，劇也不能評她不好，但不知何解，其實唔算太起勁去追，唔似得《三個女人一個因》，會星期日擔定櫈仔等住睇。唔知大家有冇同感？
材料其實齊，但總覺得欠些調味劑，激出鮮味，令大家吃不停口，欲罷不能。關鍵可能係好人太多，衰人甚至人渣唔夠。煒哥和香香這對姑侄，太容易在果攔站穩陣腳，甚至選埋會長，成個果欄咁大，除了黃光亮和他鬥氣外，其他的人也很客氣，又有人情味，無人攪針對，用詭計靠害，一定要驅逐她們出欄，連最大奸角黑社會大佬Kent哥都係未夠人渣，反而他手下高B仲人渣過佢，場面基本上幾和諧，輕輕鬆鬆鄧梓峯，無咩唔好，戲味唔夠啫！這設定相信和此劇基本上是處境喜劇有關，但從喜劇角度看，佢又唔夠好笑，個人感覺有點唔上唔落，熟口熟面欠驚喜。
有些演員的演出是可取的，首先爆出甄詠珊的惡人菊，另外馮盈盈的MK妹小狼女，算是第二個爆點，受網民喜歡和獲得最多報道，樊亦敏做的醋埕小龍女，做得夠放幾好睇，香香亦很努力突破，煒哥亦交足貨。三位男角只能用保持水準去形容。
可能是30集的原故，要開多些線同拖長來做，唯有寄望下半段緊湊些。
#果欄中的江湖大嫂 #陳煒 ＃岑麗香 ＃馮盈盈 #王光亮 #黃浩然 #楊明 #TVB劇集
