首先要強調，我從來認為社交平台係跟人走，我自己都親身經歷由ICQ、MSN再轉去Whatsapp嘅時代；過去我曾經好長一段時間堅持響自己架構嘅網站寫Blog，但而家亦已完全放棄；另外我明白有唔少人轉去MEWE、Signal係一種對社交媒體霸權壟斷嘅一種抗爭，亦支持認同呢種理念──尤其係文匯大公已認證MEWE做「亂港」平台之後。
但點解我仍然（暫時）唔會搬去MEWE同Signal呢？呢度我想一次過同有問過我嘅網友解釋一下：
一、搬屋太費心力。雖然本Page係有超過一個作者參與營運，但實際行政人手卻係少得可憐，但卻係同時Run緊幾個平台。我唔似其他KOL可能係全職Run緊社交媒體靠佢搵食、又或者直頭有Team人養住專門處理呢啲嘢，本身實在太忙太多嘢做，每當費心神去搞搬遷事宜，就代表少咗時間寫文。
二、想睇定啲先。從Facebook同Whatsapp跳船，離不開三大原因：反壟斷、順應潮流同保障私隱。但當中MEWE同Signal係咪代表真係守護言論自由同私隱嘅燈塔？我覺得言之尚早。
當日Signal創辦人養大咗Whatsapp，就將成舊嘢賣咗比Facebook，有呢段往績實在令我相當遲疑；至於MEWE則已有唔止一個人表示，因為張貼支持特朗普相關內容而被刪文──Signal又好MEWE又好，佢地都係一盤生意，究竟佢地係開創咗新路，定只係另一個無咁多人用嘅FB同Whatsapp，我想睇再耐啲先。
三、缺乏搬屋動力。因為最近我又比班黃屍投訴，Facebook又出咗警告恐嚇我本Page隨時被收皮。老實講如果係響幾年前我因為王蟲事件多次被禁言果排有MEWE出現，可能已即刻跳撚咗去。但而家處於一個尷尬嘅局面就係BAN又未BAN到我，響FACEBOOK嘅人走又未走得哂。
Signal亦係同樣情況：好簡單，你老闆同事究竟走哂去Signal未？未咪即係仲要保留住個Whatsapp囉。而我一向係好少利用Whatsapp作為私人上嘅交流，離開嘅動力就更細。呢度我當然係佩服一早走咗去開荒嘅先行者，但響開拓新平台呢一方面，就請恕我決心唔係太大，真係要等緊一個衝擊性理由。
四、相比起轉場保護私隱，時刻警惕保障自己安全更加重要。我覺得好危險嘅一點就係，以為轉咗場，你講乜嘢就可以完全得到保障，反而令自己身陷險境。我身邊都唔止一次有勇武、抗爭義士被拉，然後成個TG群組比人起出黎啦──時刻保持警覺，響任何時候確保自己唔會因社交平台嘅資訊暴露自己不必要嘅行蹤，關鍵內容改用暗碼，學習反跟蹤、反追查嘅基本，係每個抗爭者嘅責任。
更甚者，我身邊已有人奉行「網絡天體主義」，即係保持一種「任何人執倒我部電話、解埋鎖，都唔會對我構成任何傷害」嘅狀態，無任何痛腳比人揸手，自然亦無必要大陣仗用啲乜嘢保障私隱程式。
五、留低都係一種抗爭。我覺得逃離Facebook、Whatsapp，同今時今日香港人響現實世界移民，其實有幾分相似。當然而家Facebook同Twitter等社交平台巨頭係非常仆街，但我就偏偏要留響度繼續屌七佢地，直頭班垃圾管理層再忍唔住，要將我全面封殺為止。
同果班飯民垃圾會議員唔同，我留響度並無收人錢，亦唔會為咗苟且偷生而自我審查。不過都唔駛解釋咁多，因為而家主催移民果班，咪個個都仲Keep住響Facebook同Whatsapp出Post，等佢地真係完全走哂先算。
六、社交媒體困局始終需要解決。其實好耐之前已有人計過數，如果Facebook真係要完全放棄取用用戶資料而維持盈利，大概每個月需要收40蚊美金月費。結果當日調查有六成用戶希望Facebook放棄取用自己私隱，但得不足兩成人願意比錢，呢個就係現實。
社交平台複雜嘅地方係，一定要多人用先有意思：你願意比錢加入一個保障私隱嘅平台係無用的，係要你所有朋友、觀眾同讀者都願意比錢先得。結果免費嘅平台終有一日可能搵你私隱去填數，收費平台卻唔多人願意用，呢個困局真係唔知幾時先搵倒解決方法。
七、最後亦係最重要一點，就係只要民智唔提升，就算走去邊度都無用。而家好多話轉去Mewe、Signal果班，有啲就係毫無理念，人去佢又去嘅普通人，又有一班混水摸魚諗住R著數嘅黃標KOL，更甚者，就係連果堆蠢撚黃屍都話要搬埋去──既然大家都識講，相比起社交平台，使用者係更加重要，如果過到去都係要面對同一班懵撚，咁搬唔搬對我黎講，其實真係無乜意思。
當然，搬去Mewe都仲有一個理由嘅，就係當果邊愈來愈多要比我屌嘅撚樣時，走去挑機就係最大動力。
