《訪嚇》影評
「GET OUT吧老SEAFOOD！」
—談「被剥削者」與「上位者」之爭
—
—
—
—
—
—
雖然我對《訪嚇》呢套戲感覺一般，但電影還是有一定的警世意味，不如就講多兩句，會有劇透，未睇嘅見到呢行字好行番出去：
—
個故事其實好簡單，就係講黑人CHRIS食左個白人鬼妹露絲五個月，然後就去左見家長，一路都隱隱出現好多唔妥嘅事情，仲要半被迫咁參加埋個大型白人派對，最後黑人就比女主角一家捉左去換腦，原來基斯係比人睇中左個強勁嘅黑人基因BODY，而CHRIS都唔輸蝕，將露絲滅門之後就逃出左絕命鎮。
—
黑人與白人嘅強烈對比，我諗好多人都會將套戲聯想到有關「種族歧視」的議題上，但係咪僅至於此呢？對我而言，套戲嘅命題反而就係「虛偽」，而電影衝突嘅對立面就係「上位者」與「被剥削者」。
—
明顯地，白人當然係「上位者」，係象徵緊係社會上已經完全佔有資源及地位優勢嘅果堆人，而黑人就係「被剥削者」，即係果班很努力卻苦無出路，面對歧視仍然要笑住含嘅那群人。
—
係表面上，壓迫好似完全唔存在，HEAVEN IS A PLACE ON EARTH，當基斯比差佬無理檢查證件嘅時候，露絲為男友挺身而出，仲講左句唔比任何人傷害自己男友嘅豪情壯語；露絲爸爸想基斯用催眠戒煙，比媽媽阻止左，雖然食煙係唔健康，但白人家庭堅決維護黑人食煙嘅自由；係派對入面，基斯係大家嘅寵兒，大家噓寒問暖，絕對做到BEYOND所講嘅「可否不分膚色的界限」。
—
有睇套戲就知，電影中白人表現得愈「真誠」，係現實裡就係愈「虛偽」。口講唔比人傷害你，原來就係夾埋成村人去綁架你，口講比你有選擇嘅自由，原來就會係夜晚無啦啦催眠你；口講話好喜歡你，原來就摸緊你試下你岩唔岩做自己替身。一切都係大話同謊言，哄你入局，誘使你乖乖就範，就算出賣感情，出賣肉體，出動大龍鳳都在所不計，仲要奚落話你係細個果陣無救自己個老母，令你自卑，令你覺得自己的確係抵被「剥削」的。
—
而事實梗係相反，黑人嘅身體基因正正係白人所仰慕嘅野，好似係贏到賽跑比賽嘅身體素質，經過鍛鍊可以成為「野獸」等等，其實黑人先係較為優秀嘅人種。至於點解白人做到「上位者」，一切都係時也命也使然，與能力未必有必然嘅關係。
—
而鍾意胡思亂想嘅我突然就諗起今時今日嘅香港，係九七之前，經濟興旺，人人都過住「馬照跑、舞照跳」嘅生活，你去買股票，你去買樓，大部份人都係只賺不蝕，因為錢滾錢，樓換樓，「上岸」嘅人大有人在。而今時今日呢？個個大學生搶住去考只會按章工作嘅政府工，有志者苦無出路，一係就去撈商界或者地產保險，想畫畫運動或者寫野？SORRY，我只可以比個LIKE你，但實際就係支撐唔到生活基本開支，令你唔敢諗結婚，唔敢諗生兒育女，唔敢諗自己將來會有個安樂窩。
—
而社會其實都一直提倡多元架，比你發展好多志趣，又生涯規劃又乜又物。但弊就弊在出到社會工作之後就傾向一元咋嘛，就好似香港班官員話香港嘅教育制度真係非常好，但自己就送曬子女去外國讀書。
—
而係職場入面，好多「上位者」都堅稱社會係遍地黃金架，只不過佢地無講係廿年前就已經比佢地執曬咋嘛，所以呢佢地就會話比野做你就係比機會你學多D野，做人要蝕底D，我鬧你即係教緊你，知無？
—
實際上，呢班「上位者」其實就係試圖以一個好華麗嘅包裝令自己乜野都唔洗做，雖然佢地人工可能係你幾倍，做兩個月已經係你一年嘅人工，但你偏偏就要幫佢做埋佢果份嘅野。點解？就好似白人誘拐黑人咁之嘛，用甜言蜜語，用學野，用好多唔同嘅野去包裝自己唔要得嘅行為，因為佢地貪圖緊你一些佢地無嘅特質，例如精力同才能。
—
所以，《訪嚇》最後個結局係爽架，「被剥削者」大開殺戒，殺到露絲成家人仆街，真正要GET OUT於社會嘅其實就係果班不思進取，只係識搞大龍鳳抽水嘅「上位者」（無意掀起世代之爭，當然努力耕耘嘅上位者亦大有人在）。而現實又做唔做到？唯靠覺醒啦，因為係社會上，總有一大班「被剥削者」痴望有一日可以「捱出頭」來，可以加入「人生勝利組」，然後指住其他「被剥削者」黎恥笑架嘛！而佢地永遠都唔會記得，無人係理應被剥削嘅，更何況自己曾經都被「剥削」過，何苦要助紂為虐呢？有能者居之，對社會進步發展永遠都係最好的。
—
《GET OUT》
Universal Pictures Hong Kong
