兩年前生日我喺IG轉載咗呢個段落:
歲月的流逝並不可怕，可怕的是心態的老化。30歲未婚女人，面對是非非，要一顆平靜的心靈去過自己的生活，時光已有逝去，對錯已經定性，事到如今都沒有了太大的意義。
第一次閱讀到呢個轉載嘅時候心裏衝擊好大 - 因為我係非常認同。30歲以上而仲係單身嘅女人會遇到各方不同門派不同代表嘅問題同建議，我永遠都可以冷靜咁一笑置之。喂，你問我點解條件唔差都搵唔到男朋友，不如你問下點解你都嫁得出啦 <- 講笑 ... 我覺得緣份同外貌條件只係間接，而並唔係直接有關係。咁有無曾經遇過可以付托終身嘅人而現正後悔呢？是但啦，人同事每分每秒都喺度變緊，你從前信嗰一套而家都未必可能適用，過咗去嘅嘢依家講返都無乜意義，不如比勇氣積極向前望仲好。
坦白講我唔係扮清高，當然喺單身嘅日子裏面我都會發出寂寞嘅嘆氣聲同怕自己嫁唔出，但係我會單純咁將拍拖婚姻視為一種緣份，如果遇唔到"對的人"，係絕對唔會因為各方面嘅壓力同大眾認為嘅所謂適婚年齡而退而求其次變得desperate；如果到最後我都係不幸嫁唔出嘅話，只怪運氣唔好緣份未到，無人可以話我唔自量要求高無自知之明死中女所以無人要 (只有單身嘅中女先會明白嗰種壓力...嗚...其實真係好煩) 。從來就係好難用歷史結果去成敗論英雄，好多時除咗當事人之外仲要講天時地利人和，即係timimg。
喺一個人渡過嘅四年當中，我多次一個人喺跑道上面跑完一圈又一圈，就算攰或者跌倒都會爬起翻身，抹干眼淚然後繼續跑，練習自己一個人，練習同自己對話。只要你放下怨氣，努力不停探索自己、了解孤獨、了解愛情嘅意義，了解其實你想要個咩嘅人，咁樣愛情就會最後出現到係你面前。
你要信我。
你一定一定要相信我，共勉之。
#因為愛情㩒咗我門鐘啦 #生日原來都過咗一個月 #咁又三十二 #女人像鹽
