＜圖文不符，長文慎入，不喜勿插＞
2014年9月Tiny誕生，2016年10月在朗豪坊開左第一間 Popup專門店，因為得半年租約，所以只試請左四位 Part Time, 其中一位就係Coco, 因為Popup租好貴, 所以同另一本上漫畫品牌一口剩點心合租，之後Suki, Eddie, Ice加入Tiny, Zoe做Part-Time店員，而 Wind, Ivy, Yuki就係在一口剩點心做Sales & Marketing而認識他們，還記得開店4個月後2017年農曆新年大家仲一齊擺維園年宵，又過幾個月又一齊在 EMax擺第一界香港玩具節，之後又書展，見到他們三人十分有活力，投入去賣蝦餃仔，燒賣仔，留下十分深刻印象。
如果說Tiny開店經歷同故事，可能都可以出本書，開店過程艱辛絕對同開發產品過程有得揮，記得之後一口剩縮減業務，2018年3月我就邀請Ivy, Yuki來左荃新天地店開荒，7月再去皇室堡分店開荒，Ronald加入美麗華店，2018年9月Wind同拍檔創業，開了元朗Tiny店，之後Emily加入元朗團隊。轉眼間兩年了，這730天當中，大家同公司，人生同生意都經歷過高高低低，當中出現過淚流滿臉的場面，當中出現過依依不捨的回憶，當中出現過生離死別的時候，香港經歷了巨變，大家在這段期間互相扶持，自強不息，在逆境中也不段學習同進步。
每年前線同事都有年考，考卷一年深過一年，合格升職加薪，不合格安排補考，見證着好多團隊由全隊肥佬到全隊高分，Tiny 200款常品，比例有十幾個，舊同事全部背得晒係因為佢地真讀，真背，真考，真識，當然比起各界高手師兄就真係無謂獻醜，但都知產品一般知識及俾到少少意見。仲記得今年年考，因為我出錯答案，問題係列出三部有轉向設計既Tiny Hobby1/43模型，而我也記漏左 HART Sprinter高空拯救係有轉向，Suki答啱而改錯左無分而令她59分欠一分合格，翻check試卷加翻一分俾佢合格翻時，佢即刻喊左出黎，令我記起1996年入大學OCamp時一位師兄說過，只有你在過程真正投入付出過，在終點時才會為自己歡呼喝采。
好多人成日話香港八九十後年青人不思進取，只懂吃喝玩樂，但Tiny, B51, 13間店13個店長中80％25歲都未夠，而我作為由面試同他們見面到試工，到轉 Full Time, 見證他們努力溫習考試，在逆境中幫公司，看到他們一次又一次跨過困難同挑戰，無論領導能力，面對逆境的意志同堅持係唔會比成年人差，各方面也做得比我更好，學得更快，我既角色係負責開一扇門，引領大家去一個又一個舞台，各展所長。
Coco, Wind, Suki, Ice, Eddie, Ivy, Ronald, Yuki, Emily, Zoe, 彤大家由4年前 Tiny第一間店結緣至今，好開心幸運一齊經歷左一個奇妙旅程，大家亦憑著自己的努力，經驗已是各店的店長，副店長，真係實至名歸。仲有兩位同事由前線調到office繼續努力，就係銅鑼灣店既Masaki同Rainie。這班同事同好多支持左我地好耐既您，從講車仔，講歷史當中建立左深厚友情，好多情願跨區上班都唔願離開原店的客人朋友，我自己點睇Tiny店，就係有一班熱血同事，有一系列熱血車仔，有一班熱烈支持客人，所以加起來都係暖D, 有温度D, 有人情味D, 希望將舊香港玩具店應有人情味帶入各區商場。
上星期派左10位office新同事在超級新貨週Part.3到各店幫手，好多同事反映十分驚訝各店同事認到80％排隊的客人，店同事都以禮待人，在香港冰冷的零售市道下用心留一點溫度，其實大家都知，每位到來專門店支持我地既您，真係大愛嚟，真係自己友，唔係必然，所以我可以好坦白講，Tiny前前後後對於大家既支持，雪中送炭真係感激！
元朗千色店...不捨...無奈，元朗店1.0既99呎搬到2.0既400呎，但店面細細近六位數租金管理費，今時今日傾續租一蚊都無減，就係大業主小租客社會寫照，唔想搬但唔搬唔得，但元朗新旅程準備為大家展開，YOHO I新店大一倍，靚一倍，好有心機做緊一個元朗大馬路場景，消費有免費車位泊，交通呢，近鐵路站巴士站，落雨唔駛濕身，Ivy, Ling姐，Yan元朗三女俠正在努力 set場上架，希望大家多多支持，Ronald, Yuki, Iris會在屯市新店作開張準備中，9月中下旬開業。
全職CS同事上星期放大假，雖然已找 Ronald回 office幫手也覆唔切，因為超級新貨週三星期好多 Enquiry. 明天CS上班會繼續回覆，不好意思，可以用 fb inbox或 whatsapp, 一定會回, 我們CS亦會明天檢討人手安排，在一個月內增加人手，提升番售後服務至大家期望的水平。
新手入坑入會的朋友，不妨去各 Tiny店打下躉，同我地D店同事傾下車仔經，吹下巴士水，互相交流一下，大家都互相分享一下大家故事。
做好香港玩具，說好香港故事
皇室堡分店 在 皇室堡Windsor House - Facebook 的推薦與評價
皇室堡 Windsor House, Causeway Bay. 62787 likes · 130 talking about this. 位處銅鑼灣黃金地段，樓高17層，雲集食肆、零售美食、時裝飾物、童裝及嬰幼兒用品、個人 ... ... <看更多>