【龔成問答信箱】（Q18021-Q18040）
Q18021：
龔成老師你好～追蹤了你Facebook 一段時間，覺得你推薦的月供優質股票方法很好，最近亦睇緊你兩本著作《80後2百萬富翁》及《50值博倍升股》，以下是我的情況及想請教：
1. 本人和先生分別31、33歲，月入穩定合共8萬，扣除開支可每月儲起一半
2. 現有200萬資產（包括100萬現金、55萬月供基金、及45萬月供股票（#823 平均價約@46））
3. 想一年內買入800萬物業作自住及生小朋友用，所以想手上資金可以充裕一點留作未來需要。
4. 月供基金是長線退休投資產品，不想此刻賣掉套現。
5. 如何運用手上資金去投資股票？用1年時間如何升值至300萬？或應該先買入500萬細價樓上車？
龔成老師：
由於你地打算一年內買樓，因此，要先計好你地想的首期數目，以及之後是否在「供得起」方面無問題。
投資股票要長時間才能增值，因為要等企業成長，而中短期股價，往往只基於當時的大市情緒，因此無得估的。
因此，會建議你多留現金。
買股票的部分，會假設買樓時不需動用，股票一定是長遠的財富增值。
現時你手上有$100萬現金，建議你在一年內儲多少少現金，等你買樓時資金更足夠，到時唔好賣股票，目標物業$800萬是可以的。完成物業後，到時再加大投資股票。這方法會更穩健。
------------------------------------------------
Q18022：
龔成老師你好，本人23歲，澳門居住。平均每月儲蓄4000元。現持有1500股2800 @22.8，目標5年內累積到100萬儲蓄。
最近內銀股（3988，939，1398）價格回落，應該趁低價入市嗎？
請問龔成老師，我應如何投資？
龔成老師：
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。
因此，中行（3988）、建行（0939）、工行（1398），以你的年齡來說，並不適合。
你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18023：
你好龔Sir,我係你澳門粉絲，想你俾少少意見我現在持有的股票，本人現在有現金大概有50萬(不計股票)
月入大概3萬多，想係半年內在澳門置業，由於現金存款唔多所以都係先考慮購買唐樓先上車。
現有股票如下
1810 有2000股@16.8
9999 有200股@145
241 有4000股@20.7
9988有100股@244
788 有16000股@1.63
3175 有15000股@4.69
本人希望可在半年至一年內用現有股票來增值，你覺得可繼續持有嗎？還有你覺得是否應該靠股票來現金增值再儲款多一段時間來購買電梯樓比較好呢？
還有你點睇386 and 2812 (ETF)前景呀
龔成老師：
由於你打算在半年內置業，因此，你現時應該要準備好相關的現金數目。
如果你現時$50萬並不足夠，就要開始賣出股票，不要等到時買樓先準備足夠現金，無人知到時的市況，因此這刻應該要開始準備。
另外，你應該想好買樓的大方向，因為買樓始終有一定的成本，所以你要先決定，你想買唐樓還是電梯樓，如果你較想買電梯樓，而只是差少少首期，就應該儲多一年去累積到。
留意，股票長遠能增值，但中短期（如1年，往往只睇到時市況，你好難用「依靠」股票增值去滾存到首期的，時間不足），因此應該著重儲蓄。
至於你現時持有，如果我同長期角度分析，基本上無問題的，Ｆ三星原油期（3175）唔建議持有太多。另外，你組合較多潛力類股，比例太多。
至於中石化（0386）收息股，增長力不強，三星中國龍網（2812）之投資目標為追蹤中證全球中國互聯網指數之表現，都有長線投資價值。
------------------------------------------------
Q18024：
老師你好 我係岩岩開始接觸股票 但係買乜輸乜 lol 一般都係買啲大圍股
1.所以好想學習如何物色有啲有潜力嘅股？
2.如果去投資的話我應該進行什麼投資可以令收益加大
3. 另外我1.62 買左1950 就插左水. .. 我應該keep 定止蝕好。謝謝解答
龔成老師：
1）如果你想買潛力股，就要有一定的投資能力，因為這類股較難分析及估值，當一般人「發現」這股時，已經是升左，因為真正投資者找潛力股，要自行在2000間上市公司裡尋找，比市場早一步發現。
2）如果能掌握買賣時機，回報更高，但這又要有一定的技巧。
其實我建議你先從基本的著手，投資一些穩健股，同時努力學投資知識。你想建高樓大廈，就要先打好地基。
3）深藍科技控股（1950）無特別優勢，之前只是人為的炒作，根本不值當時的價，因此好難上翻去，賣出較好。
------------------------------------------------
Q18025：
請問龔sir 2238我入8.06應該繼續持有定係沽咗呢？請給我意見
龔成老師：
廣汽（2238）都有質素的，不過生意近年有下跌情況，盈利有點波動。整體都是正面，但增長力未必好強。
守住先都可以，但預佢上翻去都要時間，同時唔建議持有過多。
------------------------------------------------
Q18026：
老師， 你好，之前睇你嘅FB介紹，11.00買入2128 ，有4000股，現在已經升左37%， 請問是否可以現在繼續月供？前景如何？謝謝，麻煩晒。
龔成老師：
中國聯塑（2128）有一究的質素，前景仍正面，這股在我的《50值博倍升股》都有推介，現時股價上左唔少，這刻仍未算貴，仍有投資值博率，但注碼就無之前咁多。
如果你已有一定的貨，可以減少金額，但如果你貨仍不算過多，這刻保持月供可以的。
------------------------------------------------
Q18027：
你好，我今年24歲，我之前無試過買股票，最近先開始想接觸下投資。
想問下如果我得10萬，我想買盈富基金做長期投資
1.應該放幾多錢落去？現金同投資個比例係幾多？
2.應否留番d現金響手？
3.同埋如果我淨係投資一隻基金會唔會有風險？
謝謝
龔成老師：
1）你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
你可以投資$3萬-$5萬在盈富（2800）。
2）由於你未有投資股票經驗，暫時唔應該買太多，因此應留低$5萬-$7萬的現金。
3）由於盈富已是一個50隻股票的組合，因此，風險度不高。但長遠，你要慢慢學習投資其他股票。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18028：
龔sir, 請教一下，我買的都是優質股，有平價入，有合理價入，有貴價入，共14隻，會太分散嗎?
要賣走幾隻嗎?
但貴買的是潛力股，平入的又唔捨得賣，應怎樣做呢，謝謝
龔成老師：
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
如果你持有的股票，是有質素的，出現了短期的下跌，但長期來說，仍是有投資價值。
相反，如果你持有的企業無質素，股價下跌，就要立刻賣出。
------------------------------------------------
Q18029：
龔成老師你好，本人30歲，月入$30,000左右，現金大概有70萬，股票市值約40萬。
現時股票組合
-20,000股 中廣核（1816）@$3.5
-500股中國平安 （2318）@$87
-5000股 中國銀河（6881）@9.4
-800股 藥名康德（2359）@$113
-200股 阿里巴巴（9988）@$195
-3000股 建業新生活（9983）@10.6
-8000股 睿見教育（6068）@$4.65
-3000股 維亞生物（1873）@$10.4
請問：
1. 當中1816和6881的買入價距現價已跌了一半，可以繼續持有待股價回升才止蝕嗎？
2. 現時股票組合有冇問題，可以長期持有嗎？
3. 若打算一兩年內置業，應該將剩餘現金投資在平穩增長的股票還是低風險的定期儲蓄以抗通脹？
4. 若疫情結束，可以考慮哪一類的舊經濟股投資？
龔成老師：
1）中廣核電力（1816）質素算是中等，並不是全無質責，不過，這股的增長力不強。如果你想組合有較強增長力，可以考慮轉其他。
中國銀河（6881）質素中等，這股都有投資價值，但就唔適合持有太多，佢業務會較受投資市場影響而法動，要注意風險。如不多可持有住先，業務都有基本增長力。
2）組合問題不算大，但組合中有較多上市年期不算長的企業，這些企業始終有不確定性，因此唔建議佔比太多。
3）應該留現金較多。
除非大市出現明顯下跌，就可以把握機會買平貨（但都不能用盡現金）。
4）地產、零售、旅遊。其實這刻已可留意地產。
------------------------------------------------
Q18030：
龔sir 你好
我最近一個月先開始留意股票
我有物業出租
有存款約200萬
目前冇工作冇收入
所以想靠投資股票增加小小收入
請問應該點樣做？
謝謝
龔成老師：
你應該建立一個平衡的財富組合，你本身已有物業，之後的資金，應該投資物業以外的項目，股票是較好的。
你可以將部分資金，投資平穩增長股，以及收息股，穩健並有不定的股息回報。
你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
同時投資收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18031：
老師，最近在考慮投資車位（月租可達3千至3500）， 在家附近，開價160萬，借4成，即支付首期90萬，諗住講價至150萬， 你覺得值得投資嗎？車位前景如何？謝
龔成老師：
車位是資產的一種，都可以投資，是穩定現金流的投資工具。
車位的前景都不差的，但近年升得太多，回報率已減，因此預期之後增長力唔強。
你要分析下，預期的租金回報率是多少，比起周邊車位的回報率如何，同時大廈單位與車位的比例是多少。
------------------------------------------------
Q18032：
老師，我記得之前追po見過你話1686係潛力股，點睇？
龔成老師：
新意網集團（1686）有質素的，我在《50優質潛力股》都有新加入這股，這股可長線投資。
佢是一隻另類的收租股，擁有一定的「地盤」，加上香港數據中心的角色正增加，長遠發展仍正面，現價合理區中上部，都可以長線投資，但這刻未到大手時機。
------------------------------------------------
Q18033：
龔sir，如果想長線持有,變成倍升股.銀行股可趁低吸納嗎？
老師你有推介的嗎？
龔成老師：
銀行股的賺錢能力比過往略減，雖然都有投資價值，但你預佢較難倍升，現時不少銀行股都處合理區中下部。
較優質的你可以留意恆生（0011）、中銀香港（2388）。
你預佢地主要是收息，加上有少少增長力，而不是大升類。
------------------------------------------------
Q18034：
龔Sir，有兩個問題想請教下你
１）首先想問關於香港電訊，最近母公司電盈將now tv賣比香港電訊，作價大約20億左右，但香港電訊現金流只有18億左右，換言之即係必須要向銀行借貸，而公司本身負債比率已經60幾%，會否對公司將來加添壓力？
而且單計now tv呢項電視業務，會否視為競爭大而且比較夕陽嘅行業？雖然每年仲有盈利，但睇到每年用戶人數上升慢，但平均消費呈斜線下降趨勢，整體來說可唔可以話呢個交易係對香港電訊較為不利的一方？
阿仔要幫阿媽接收呢個爛橙，仲要幫阿媽套現20億出來，增加負債，減少現金流將來未必能作其他收購和發展，而派息方面仲可否維持每年遞增？此股仍值得長線或超長線持有嗎？(10年以上)
２）最近睇你本50優質潛力股(20-21增訂版)推介嘅潛力股，和最近都睇到好多人喺你Facebook關心嘅中國鐵塔，想請教下呢隻股票
首先佢嘅鐵塔市佔率已有成97%左右，而且每年盈收都近乎平穩地賺嘅公司，其實調返轉諗，能夠再有突破或爆發性嘅增長動力係咪反而會較難出現？
而且雖然話中國三大電訊商喺中國可視為國企，非常穩陣，但鑒於國家近年一直要求手機／通訊／流量降費，長遠會否間接對此造成不利因素？
而且之前股價已或多或少反映左憧憬5G呢個因素，如果不久將來5G在中國使用量和流通性都冇預期之中咁樂觀同理想，此風險係咪不容忽視？
另外研發5G係需要成本的，之前借落嘅錢要喺每年年報嘅折舊及攤銷到扣除，其實中線嚟講呢隻股票係咪都唔應該睇太好？而長線或超長線嚟講都只係龔Sir你標準嘅平穩增長嗎？
Thanks you Sir，身體健康！
龔成老師：
1）根據2020年度中期報告，佢「現金及銀行結餘」數目有約$50億，因此不用擔心。
now tv又不是無質素的，不過就唔會有太大期望。整體的確會令香港電訊（6823）的風險度增加左，但就未至於有好大負面因素。
2）中國鐵塔（0788）有長線發展的，市佔率9成幾，即是話，佢的發展就要睇行業的發展。
至於你上述所講的風險因素，的確存在的，中國有時的政策好難估，這是不確定性。至於增長，由於5G長遠的應用都大，初期未必好明顯，但發展後就會更擴，佢的增長力仍在。
潛力度未算強，相信平穩增長無問題，若果5G市場有突破，佢增速將會提高。
------------------------------------------------
Q18035：
呀sir你好～
想請問一下我而家成本有十萬
但我無番工 所以無收入
所以無諗住買月供股票
想用呢十萬買D有潛力值長既股票
想中長線持有
我而家有7手泰格（買入價115）
兩手時代鄰里（買入價13.06）
本身諗住揀醫療同物管股比較穩陣
但都跌阻幾日
想請問我應該繼續持有 還是轉倉買其他？有無其他更好既選擇？謝～
龔成老師：
如果你這刻無收入，在理財上，應該留有較多的現金，唔好太心急投資股票，要確定是「閒錢」，先投資。
因為我地投資股票，原理就是買入企業，等佢成長。
如果想投資潛力股，建議你考慮一些較穩健的：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
時代鄰里（9928）有質素的，不過現價都唔平。都有長線持有價值。
泰格（3347）係中國的綜合生物製藥研發服務提供商，主要經營臨床試驗技術服務，例如提供臨床試驗運作服務，包括藥物及醫療器械臨床研究，業務發展都唔差，同時都有一定的規模。
生意與盈利都有理想增長，賺錢能力唔差，不過上市時間唔長，數據的參考價值會減。
質素都有，長遠發展正面的，不過股價潛在波動較大，加上上市時間唔算長，唔建議投資太多。
另外要提翻2個概念。
第一，物管股整體是有質素的，但一般都唔平，要留意。另外，醫療股並不是低風險的行業。
第二，買股票就是買企業，唔會因為中短期股價下跌就決定賣出，你要作質素、平貴去考慮。
------------------------------------------------
Q18036：
成老師，想請問一下你所推介的股票是何時入也可以嗎？我實在揣測不到何時是低位。。另外美股也可以考慮嗎？非常感激。你課程，我會考慮的
龔成老師，忘記了問，強積金計劃全選了恆指可以嗎？但其實已經跌了8萬左右。需要改變嗎？謝謝！！
龔成老師：
我推介的股票，是從企業層面去講，即是該企業的業務是優質，有前景的。不過，有些可能較平，有些可能較貴，如果掌握唔到，可以問我，或自行分注投資，因為我地一般在「平」或「合理」的區域投資。
強積金是超長期的投資，我地只要好簡單咁人生階段、風險承受能力去配置就得。例如年紀較輕就進取，中年就平衡分配，年長就保留，咁就得。
例如年輕就可進取的，可以將較多資金，投資在較為進取的類別，少少在平衡組合，咁已經得。同埋，強積金唔需要經常轉來轉去的。
我由初踏出社會開始，都是100%恆指的。
------------------------------------------------
Q18037：
我聽朋友講入左 02007碧桂園，跌左，點算好？
龔成老師：
投資股票，唔好太著重中短期股價，要睇企業的長遠發展。
碧桂園（2007）質素算是中等，有品牌與規模，不過負債就太高，這會令股價上落較大，有一定風險，你要自己衡量是否面對這風險。
如果你本身較保守，就未必適合投資這股。
另外，股價中短期上落，好正常的，你要學會平常心面對。
------------------------------------------------
Q18038：
龔sir,小米是屬水桶1的潛力股，而家股價算係合理區中部嗎？
係的話可以現時入50%資金，如果之後跌到合理低約10元就再入，如果升就月供到尾，咁樣可好？謝謝！
龔成老師：
小米（1810）是潛力股，有長線持有的價值，現時在合理區中上部。
留意，任何單一股票，都唔應該太集中，去到15%已是上限（從長遠的股票組合比例計）。現價你分注投資可以，但就不是大手時機。
------------------------------------------------
Q18039：
老師 我一年半前開始follow 你 ，覺得你既投資方法及觀念好好，好適合我2019年年初開始進行月供股票， 月薪4萬，扣除支出後可儲2萬5 ，月供股票主要如下：
66 $1500
823 $2000
2800 $4000
1211 $2000
2388 $1500
由於2019年已開始供，當時價高，現時以上股票仍處於帳面上蝕既階段，但由於你教既長線投資，而家價低就平均成本變便宜了，故就算股市大上大落 我依然無動搖過
但內心仍會怕中美關係惡化 應該有排都會keep住蝕 內心又開始有d唔開心
龔成老師：
一般來說，我地月供股票都要5年以上，先有效果，因此中短期的情況，唔需要太理會。
以一個5年的月供來說，怎樣的股價走勢，會對你有最大的得益？
答案就是先跌後升，你入的貨平均成本會最低，之後的回報會最高。
你持有的都是有質素的股票，只要長線就得，最好是唔好理，照供，好多事件只是中短期問題，對長遠企業價值影響唔大。
------------------------------------------------
Q18040：
老師，請問利福中國（2316）前景如何？此股有機會私有化嗎？本人平均買人價頗高（3.35） ，現下跌這麼多，還可持有嗎？
龔成老師：
利福中國（2316）本質不過不失的，不過中短期可能會因中國疫情或經濟而令佢較波動，長遠會慢慢好翻，你可以持有。
就算想賣，也最好等疫情過去，經濟穩定翻先賣出。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
